Bakı, 25 yanvar, AZƏRTAC 

Azərbaycan Milli Elmlər Akademiyasının (AMEA) Nizami adına Ədəbiyyat İnstitutunda “Ədəbi proses-2015” yaradıcılıq müşavirəsinin məruzələr toplusu işıq üzü görüb.

İnstitutun direktoru, akademik İsa Həbibbəylinin topluya yazdığı “Janr zənginliyi və gənc qvardiya” sərlövhəli “Ön söz”də “Ədəbi proses” yaradıcılıq müşavirələrinin əhəmiyyəti və müsbət nəticələri geniş izah olunub.

AMEA-dan AZƏRTAC-a bildirilib ki, 2015-ci ilin ədəbi prosesi müxtəlif istiqamətlər – şeir, poema, nəsr, dramaturgiya, tənqid və ədəbiyyatşünaslıq, bədii tərcümə, uşaq ədəbiyyatı üzrə təhlil olunub. İnstitut əməkdaşlarının müasir şeir, ədəbiyyatın janr məsələləri, satira, roman, povest, hekayə janrları, dramaturgiya, ədəbiyyatşünaslığın nəzəri məsələləri, tarixi roman və ədəbi tənqiddən bəhs edən məruzələri 2015-ci il ədəbi prosesi haqqında geniş təsəvvür yaradır.

Filologiya elmləri doktoru Vaqif Yusiflinin “Bölgələrdə ədəbi həyat” sərlövhəli məqaləsi respublikamızın müxtəlif bölgələrində, həmçinin Azərbaycanın hüdudlarından kənarda yaranan ədəbi nümunələri təhlilə cəlb etməklə maraq doğurur.

Filologiya üzrə fəlsəfə doktorları Günay Qarayevanın uşaq ədəbiyyatında nəsr və dramaturgiya, Aygün Bağırlının uşaq şeiri haqqında məruzələri ədəbiyyatın bu mühüm sahəsində müşahidə edilən müsbət keyfiyyətlərlə yanaşı, qüsurları da obyektiv şəkildə diqqətə çatdırır.

Filologiya üzrə fəlsəfə doktoru Cavanşir Yusiflinin “Bədii tərcümə və ədəbi tənqid” mövzusunda məruzəsi 2015-ci ildə dilimizə çevrilən bədii əsərlərin tərcümə baxımından keyfiyyətindən bəhs edir.

Filologiya elmləri doktoru Salidə Şərifovanın ədəbi dilin inkişaf xüsusiyyətlərinə və problemlərinə, filologiya üzrə fəlsəfə doktoru Pərvanə Məmmədlinin Cənubi Azərbaycan ədəbiyyatına həsr olunmuş məqalələri də aktuallığı, geniş və obyektiv təhlili ilə yadda qalır.

Geniş oxucu auditoriyasının ixtiyarına verilən bu nəşr bir daha sübut edir ki, “Ədəbi proses-2015” elmi müşavirəsi həm ədəbiyyatşünaslıq elminin, həm də bədii ədəbiyyatın inkişafına təkan verən mühüm hadisədir.

“Ədəbi proses-2015” Ədəbiyyat İnstitutunun bu seriyadan çap etdiyi üçüncü nəşrdir.