REGİONLAR
Ağdam şəhərində Azərbaycan-BMT tərəfdaşlığı üzrə strateji məsləhətləşmələr keçirilib - YENİLƏNİB
Ağdam, 16 mart, Tahir Ağaməmmədov, AZƏRTAC
BMT ilə Azərbaycan Respublikasının əməkdaşlığında vacib olan proses və təşəbbüslərin, qabaqcıl yanaşmaların müzakirəsi məqsədilə Ağdam şəhərində strateji məsləhətləşmələrə həsr olunmuş dəyirmi masa keçirilib.
AZƏRTAC-ın bölgə müxbiri xəbər verir ki, tədbirdə Azərbaycan Respublikasının Ekologiya və Təbii Sərvətlər, Kənd Təsərrüfatı və Səhiyyə nazirliklərinin, Dövlət Şəhərsalma və Arxitektura, Ailə, Qadın və Uşaq Problemləri üzrə Dövlət komitələrinin, Minatəmizləmə Agentliyinin rəhbərləri, Azərbaycan Respublikası Prezidentinin xüsusi nümayəndələri, Əlaqələndirmə Qərargahının İdarələrarası Mərkəzində təmsil olunan Prezident Administrasiyasının əməkdaşları, habelə BMT agentliklərinin Azərbaycanda fəaliyyət göstərən ofislərinin rəhbər şəxsləri iştirak ediblər.
Azərbaycan Respublikasında BMT tərəfindən qəbul edilən Davamlı İnkişaf Məqsədlərinə nail olmaq istiqamətində davamlı işlər aparılmaqdadır. Ölkəmizin işğaldan azad edilmiş ərazilərində həyata keçirilən əsaslı bərpa və yenidənqurma layihələri həmin səylərin tərkib hissəsi olaraq mühüm əhəmiyyət kəsb edir.
Ölkəmiz inkişaf məqsədlərinə ilk növbədə daxili potensial və imkanlardan, eyni zamanda, çoxtərəfli beynəlxalq əməkdaşlıq mexanizmlərindən istifadə etməklə nail olmaqdadır. Bu əməkdaşlıq ölkəmiz üçün əhəmiyyətli olan müxtəlif sahələri, o cümlədən ətraf mühitin qorunması, səhiyyə, kənd təsərrüfatının inkişafı və digər məsələləri əhatə edir. Eyni zamanda, Azərbaycan üçün əsas prioritetlərdən olan Böyük Qayıdış çərçivəsində işğaldan azad edilmiş ərazilərdə iqtisadi davamlılıq, humanitar minatəmizləmə, ərazilərin sosial-iqtisadi reinteqrasiyası məsələlərinin dünyada mövcud olan təcrübənin nəzərə alınması ilə təşkili önəmlidir.
Azərbaycan Respublikasının sözügedən istiqamətlərdə bu günədək həyata keçirdiyi tədbirlər beynəlxalq müstəvidə yüksək qiymətləndirilir. Bir neçə aparıcı beynəlxalq təşkilat, o cümlədən BMT tərəfindən bərpa və yenidənqurma işlərinin ilkin mərhələsi müsbət qarşılanıb. Yaxın gələcəkdə bu istiqamətdə müvafiq ərazilərdə əməkdaşlığın genişləndirilməsi gözlənilir.
Bugünkü tədbir ötən il Şuşada təşkil edilmiş Azərbaycan-BMT tərəfdaşlığının 30 illiyinə həsr olunmuş toplantının davamı olaraq baş tutub.
Tədbirdə azad edilmiş ərazilərdə həyata keçirilən bərpa və yenidənqurma işləri, oraya əhalinin qayıdışı və bu prosesdə beynəlxalq təcrübənin tətbiqi müzakirə edilib.
Həmçinin bu müstəvidə BMT, Dünya Bankı və Avropa İttifaqının birgə postböhran mexanizmi olan bərpa ehtiyaclarının qiymətləndirilməsi metodologiyasının ölkəmizdə tətbiqi sahəsində fikir mübadiləsi aparılıb.
Tədbirin yekununda “Heydər Əliyev İli” çərçivəsində Ağdam şəhərində ağacəkmə aksiyası keçirilib.
11:33
Ağdam səhərində Azərbaycan Respublikası Hökuməti və ölkədə fəaliyyət göstərən BMT sistemi arasında İllik yüksək səviyyəli strateji məsləhətləşmələr keçirilir.
AZƏRTAC-ın bölgə müxbiri xəbər verir ki, 35-dən çox hökumət və BMT rəsmisini bir araya gətirən tədbirdə Azərbaycanın Dayanıqlı İnkişaf Məqsədlərinə (DİM) nail olmasının daha da sürətləndirilməsi, bu prosesdə uğurla həyata keçirilən azad edilmiş ərazilərin bərpa və yenidənqurma işlərinin rolu, minatəmizləmə və onun DİM-lərə təsiri, ətraf mühitin qorunması və su ehtiyatlarının səmərəli istifadəsi, kənd təsərrüfatı, səhiyyə, şəhərsalma, gender və ölkəmizin BMT ilə digər əməkdaşlıq istiqamətləri diqqət mərkəzində olacaq.
Həmçinin Ulu Öndər Heydər Əliyevin 100 illik yubileyi ilə əlaqədar ağacəkmə aksiyasının keçirilməsi də nəzərdə tutulur.
Qeyd edək ki, 2022-ci il martın 18-də Azərbaycan Hökumətinin BMT sisteminin müxtəlif agentlikləri ilə birgə Şuşa səhərində birgə tədbiri keçirilmişdir. Tədbir çərçivəsində azad edilmiş ərazilərdə dağıntıların miqyası və həyata keçirilən bərpa və yenidənqurma işləri BMT agentliklərinin nümayəndələrinə təqdim edilmiş, onlarla həm bu ərazilərdə, həm də ümumiyyətlə ölkə daxilində iş birliyinin təkmilləşdirilməsi məsələləri müzakirə olunmuşdur.