Ağdaş, 5 aprel, Şahnəzər Bəşirov, AZƏRTAC

Son günlər cəbhə bölgəsində ermənilərin təxribat əməllərinə Azərbaycan Ordusunun layiqincə cavab verməsini, düşmənin canlı qüvvəsi və hərbi texnikasının darmadağın edilməsini, Təhlükəsizlik Şurasının toplantısında Azərbaycan Respublikasının Prezidenti, Ali Baş Komandan İlham Əliyevin çıxışını ölkəmizin hər yerində olduğu kimi, Ağdaş sakinləri də böyük sevinclə qarşılayıblar.

AZƏRTAC xəbər verir ki, cəbhədəki gərgin vəziyyətlə bağlı aprelin 5-də Ağdaş rayonundakı Heydər Əliyev Mərkəzində ictimaiyyət nümayəndələri ilə görüş keçirilib. Rayon icra hakimiyyətinin, hüquq mühafizə orqanları əməkdaşlarının, idarə, müəssisə və təşkilat rəhbərlərinin, ictimaiyyət nümayəndələrinin iştirak etdiyi toplantıda torpaqlarımız uğrunda həlak olmuş şəhidlərin xatirəsi bir dəqiqəlik sükutla yad edilib.

Sonra rayon icra hakimiyyətinin başçısı Tofiq İbrahimov aprelin 1-dən 2-nə keçən gecə erməni qoşunlarının təxribatını və Azərbaycan ordusunun düşmənə sarsıdıcı zərbəsini bir daha diqqətə çatdıraraq, Prezident İlham Əliyevin Təhlükəsizlik Şurasındakı çıxışının erməni separatçılarına ciddi xəbərdarlıq olduğunu söyləyib.

Rayon rəhbəri vurğulayıb ki, cəbhədə tez-tez təxribatlar törədən düşmənə qarşı tutarlı cavab zərbəsində ermənilər xeyli canlı qüvvə və hərbi texnika itirib, bir sıra strateji yüksəkliklər azad olunub. Azərbaycan ordusunun erməni təxribatına cavabı xalqımızda qələbəyə inam yaradır.

YAP rayon təşkilatının sədri Cavid Osmanov, rayon ağsaqqallar şurasının sədri Rafiq Nəbiyev, Qarabağ əlilləri, veteranları və şəhid ailələri ictimai birliyinin Ağdaş rayon şöbəsinin sədri İsmayıl Xudiyev çıxış edərək ermənilərin təxribatının qarşısının alınması istiqamətində Azərbaycan ordusunun şücaətini yüksək qiymətləndiriblər. Onlar cəbhədə gərginliyin yaranmasında və baş verən hadisələrdə məhz işğalçı Ermənistan dövlətinin və onun havadarlarının günahkar olduğunu bildiriblər. Dəfələrlə dinc sakinlərimizi atəşə tutan, atəşkəs rejimini pozan düşmən, ordumuz tərəfindən layiqli cavabını alıb. Ağdaşlılar hər zaman olduğu kimi, yenə də ordumuzun, Azərbaycan dövlətinin yanında olduqlarını, Azərbaycan Respublikasının Prezidenti və Ali Baş Komandan İlham Əliyevin ətrafında sıx birləşdiklərini qeyd ediblər. Gənclər torpaqlarımızın düşməndən azad edilməsi və şəhidlərimizin qanının yerdə qalmaması üçün döyüşlərdə hər an iştirak etməyə hazır olduqlarını bildiriblər.

X X X

Son günlər cəbhə bölgəsində baş verən hadisələrlə bağlı Qəbələdə də ümumrayon toplantısı keçirilib.

Tədbirdə Azərbaycanın ərazi bütövlüyü uğrunda şəhid olan Vətən övladlarının xatirəsi bir dəqiqəlik sükutla yad edilib.

Qəbələ Rayon İcra Hakimiyyətinin başçısı Səbuhi Abdullayev məlumat verib ki, aprelin 1-dən 2-ə keçən gecə qoşunların təmas xəttində Ermənistan Azərbaycana qarşı növbəti dəfə silahlı təxribat törədərək cəbhə bölgəsində yerləşən yaşayış məntəqələrini atəşə tutub. Bu silahlı təxribat nəticəsində hərbiçilərimiz və mülki şəxslər həlak olub.

Qeyd olunub ki, bu təxribatın qarşısının alınması və mülki əhalinin təhlükəsizliyinin təmin olunması məqsədilə Azərbaycan ordusu qısa vaxt ərzində strateji əhəmiyyətə malik bir neçə yüksəklik və yaşayış məntəqələrini düşməndən tam azad edib. Rayon rəhbəri ordumuzun şəxsi heyətinin döyüş qabiliyyətini, hərbi təcrübəsini və döyüş ruhunu yüksək qiymətləndirib.

Rayon ictimaiyyətinin nümayəndələri Azərbaycan əsgərinin göstərdiyi şücaətdən qürur duyduqlarını, ordumuzun işğal altındakı torpaqlarımızı azad etməyə qadir olduğuna inandıqlarını bildiriblər. Onlar hər an Ali Baş Komandan, Prezident İlham Əliyevin əmri ilə Vətən torpaqları uğrunda mübarizəyə atılmağa hazır olduqlarını söyləyiblər.