ELM VƏ TƏHSİL


Akademik Akif Əlizadə: Bu il AMEA-nın magistraturasına 120 tələbə qəbul olunub

Bakı, 16 sentyabr, AZƏRTAC 

Azərbaycan Milli Elmlər Akademiyasının (AMEA) Rəyasət Heyətində “Bilik günü” münasibətilə tədbir keçirilib.

AZƏRTAC xəbər verir ki, tədbiri giriş sözü ilə AMEA-nın prezidenti, akademik Akif Əlizadə açıb. Akademik 2015-ci ildə Prezident İlham Əliyevin dəstəyi ilə AMEA-nın magistraturasına ilk qəbulun həyata keçirildiyini və bunun elmi ictimaiyyət tərəfindən uğurla qarşılandığını deyib.

Qeyd edib ki, Prezident İlham Əliyevin 2009-cu il 4 may tarixli Sərəncamı ilə “Azərbaycan Respublikasında 2009-2015-ci illərdə elmin inkişafı üzrə Milli Strategiya”nın və “Azərbaycan Respublikasında 2009-2015-ci illərdə elmin inkişafı üzrə Milli Strategiyanın həyata keçirilməsi ilə bağlı Dövlət Proqramı”nın təsdiqi akademiyaya magistratura pilləsinin yaradılması üçün həm stimul, həm də hüquqi dəstək verib. Bu da öz növbəsində Milli Strategiyada Azərbaycanda elmi məktəblərin qorunması və elmin varisliyinin təmin edilməsi ilə yanaşı, ölkədə elmi tədqiqatlar mərkəzi olan AMEA-nın yüksəkixtisaslı kadrlar hazırlanması sahəsində fəaliyyətinin yeni əsaslarla qurulmasını ön plana çəkir.

AMEA-nın rəhbəri akademiyada magistratura yaradılmasının bir neçə istiqamətdə problemlərin həllinə hədəfləndiyini söyləyib və bunlardan ən əsasının kadr hazırlığı məsələsi olduğunu qeyd edib: “Kadr hazırlığı istiqamətində AMEA-da yeni nəfəs hiss olunur. Hazırda AMEA-dan məzun olmuş 134 nəfərin 82-si bizim əməkdaşdır. Ümumiyyətlə isə AMEA magistraturasına indiyədək qəbul olunmuş 204 nəfərin 166-sı təhsil almaqla yanaşı, həm də əmək bacarıqlarını bizim laboratoriyalarımızda daha da zənginləşdirir”.

Akif Əlizadə akademiyada elm və təhsilin inteqrasiyasına da çox ciddi diqqət yetirildiyini xüsusi vurğulayıb: “Bu məsələ AMEA-nın əsas prioritetlərindən biridir. Çünki günümüzün dinamik qlobal iqtisadiyyatı bilgi və bilgilərin inkişafına əsaslanır. Bu isə o vaxt uğurlu olur ki, təhsilalanın iştirakçısı olduğu cəmiyyət bir neçə elmi biliyə yiyələnir və multidisiplinar keçidə hazır olur. Yaradıcı, uyğunlaşabilən, tənqidçi, işbirliyi bacaran kadr hazırlamaq üçün elmlə inteqrasiya olunmuş təhsil bilikləri auditoriyada və praktikada öyrətmənin ən effektiv yoludur və təhsilalanlara hərtərəfli tədqiqat aparmaq imkanı yaradır”.

Akademik bildirib ki, AMEA-nın magistraturasını bitirmiş məzun magistrlərin əksəriyyəti təhsillərini doktorantura və dissertantura pilləsində, 74 məzundan 48-i öz təhsilini fəlsəfə doktorluğu hazırlığı üzrə davam etdirib. Akademik beş nəfərin İngiltərənin Oksford, Fransanın Monpelye, Çinin Jilin Kənd Təsərrüfatı, Rusiyanın Moskva Fiziki Tədqiqatlar və Türkiyənin İstanbul universitetləri kimi dünyanın qabaqcıl ali təhsil müəssisələrinə qəbul olunduqlarını, bu ilin məzunlarından 1-nin isə Türkiyənin Kocaeli Universitetinin geofizika ixtisasına tam təqaüdlə qəbul edildiyini bildirib.

Akif Əlizadə institutlarda müasir tələblərə cavab verən auditoriyalar, praktik dərslərin aparılması üçün müasir laboratoriyalar, eləcə də maddi-texniki tədris bazasının təkmilləşdirilməsi prosesindən, magistrantların elmi nailiyyətlərinin artırılmasına dəstək vermək, təhsildə və elmdə yüksək nəticə göstərən tələbələrin fəaliyyətini stimullaşdırmaq məqsədilə hər il təşkil edilən “Magistr” müsabiqəsindən də bəhs edib. Bu ildən isə yüksək balla magistraturaya daxil olan, həmçinin elm və təhsildə fərqlənən tələbələrə AMEA prezidentinin xüsusi təqaüdünün veriləcəyini bildirib: “Bu, tələbələrin elm və təhsilə marağını artırmaqla yanaşı, həm də onların sosial durumunu daha da yaxşılaşdırmaq məqsədi daşıyır. Artıq AMEA-nın yataqxanası magistrantların sosial şəraitinin yaxşılaşdırılması üçün öz imkanlarını səfərbər edib. Bu da o deməkdir ki, magistrantlarımız bizim tələbəmiz olmaqla yanaşı, həm də bizim əməkdaşımızdır. Bu tendensiya davam etdiriləcək və növbəti mərhələdə innovativ dissertasiya mövzularını dəstəkləmək üçün “tələbə qrantı”nın da elan edilməsi nəzərdə tutulur”.

AMEA-nın prezidenti cari ilin qəbul nəticələri haqqında da məlumat verib: “AMEA-ya tələbə qəbulu keçən illərlə müqayisədə bu il iki dəfə çoxdur. İlk dəfə olaraq AMEA ödənişli magistr hazırlığına bu ildən start verdi. AMEA-nın magistraturasına bu il 22 ixtisas, 75 ixtisaslaşma üzrə 120 tələbə qəbul oldu. Bu da plan yerlərinin 90,2 faizinin dolması deməkdir, hansı ki, bir çox universitetlər bakalavr pilləsinin olmasına baxmayaraq bu göstəriciyə malik deyil”.

Sonda akademik Akif Əlizadə tədrisə cəlb olunmuş elmi rəhbərlərə və müəllimlərə müraciət edərək akademiyaya layiqli kadrlar yetişdirilməsi üçün əllərindən gələni əsirgəməməyi tövsiyə edib.

Sonra AMEA-nın akademik-katibi və müxbir üzvü Əminağa Sadıqov 2019/2020-ci tədris ili üçün akademiyada magistraturaya qəbulun nəticələrini nəzərə çatdırıb: “AMEA-ya tələbə qəbulu keçən illərlə müqayisədə bu il iki dəfə çoxdur. İlk dəfə olaraq AMEA ödənişli magistr hazırlığına bu ildən start verdi. AMEA-nın magistraturasına bu il 22 ixtisas, 75 ixtisaslaşma üzrə 120 tələbə qəbul olunub”.

Əminağa Sadıqov AMEA-nın qəbul planı hazırlanarkən ölkənin əsas prioritet inkişaf istiqamətlərinin nəzərə alındığını, əmək bazarında, həmçinin elmi-tədqiqat işlərində ən çox ehtiyac duyulan ixtisaslaşmalara önəm verildiyini diqqətə çatdırıb. O, ötən illər ərzində akademiyada magistratura fəaliyyəti, AMEA-nın magistratura pilləsi üzrə təhsil siyasətində tətbiq edilən yeniliklər və əldə olunan nailiyyətlərdən danışıb.

Daha sonra AMEA Riyaziyyat və Mexanika İnstitutunun I kurs ən yüksək bal toplamış magistrantı Xalidə Əliyeva, Nəsimi adına Dilçilik İnstitutunun I kurs magistrantı Xəyal Əsgərli, Molekulyar Biologiya və Biotexnologiyalar İnstitutunun II kurs magistrantı Firuzə Rzayeva, Geologiya və Geofizika İnstitutunun məzun magistri Yusif Əliyev çıxış ediblər.

Tədbirdə AMEA-nın magistrantlarına tələbə biletləri təqdim olunub. Daha sonra AMEA-nın magistraturasında nümunəvi və məhsuldar pedaqoji fəaliyyətinə görə fizika-riyaziyyat elmləri doktoru, professor Şakir Nağıyev, fizika-riyaziyyat elmləri doktoru, professor Həmidulla Aslanov, kimya elmləri doktoru, professor Nizami Zeynalov, biologiya üzrə elmlər doktoru, professor Ramiz Əliyev və Aynur Məhərrəmova AMEA prezidentinin mükafatı ilə təltif olunublar.

Sonda Təhsil naziri Ceyhun Bayramovun müvafiq əmrinə əsasən “Azərbaycan Respublikasının qabaqcıl təhsil işçisi” döş nişanı ilə təltif olunmuş AMEA Rəyasət Heyəti aparatının Elm və Təhsil Baş İdarəsinin Doktorantura şöbəsinin müdiri, kimya üzrə fəlsəfə doktoru Ömər Gülalov, AMEA Neft-Kimya Prosesləri İnstitutunun laboratoriya müdirləri - Almaz Tağıyeva, Nizami Mürsəlov və həmin institutun böyük elmi işçisi Məhyəddin İskəndərov, AMEA İdarəetmə Sistemləri İnstitutunun Təhsil şöbəsinin müdiri, riyaziyyat üzrə fəlsəfə doktoru Sevinc Quliyeva, AMEA İnformasiya Texnologiyaları İnstitutunun Tədris-İnnovasiya Mərkəzinin müdiri, texnika üzrə fəlsəfə doktoru Rəsmiyyə Mahmudova, Nəsimi adına Dilçilik İnstitutunun Təhsil şöbəsinin müdiri, filologiya üzrə fəlsəfə doktoru Qətibə Quliyeva və Molekulyar Biologiya və Biotexnologiyalar İnstitutunun Təhsil şöbəsinin müdiri, biologiya üzrə fəlsəfə doktoru, dosent Samirə Rüstəmovaya döş nişanları təqdim edilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.