İQTİSADİYYAT
“Alfa Sığorta”nın kreditorlarının ikinci növbə tələbləri üzrə ödənişlərə başlanılıb
Bakı, 2 may, AZƏRTAC
“Alfa Sığorta” ASC-nin kreditorlarının ikinci növbə tələbləri üzrə ödənişlərə başlanılıb.
Maliyyə Bazarlarına Nəzarət Palatasının Direktorlar Şurasının 26 avqust 2016-cı il tarixli qərarı ilə lisenziyası ləğv edilmiş “Alfa Sığorta” ASC-nin kreditorlarının ikinci növbə tələbləri üzrə ödənişlərə cari ilin aprelin 30-dan etibarən başlanılıb.
Palatanın mətbuat xidmətindən AZƏRTAC-a bildiriblər ki, ikinci növbə ödənişlər şəxsi sığorta növləri üzrə sığorta hadisələri nəticəsində dəymiş zərərlərə aiddir.
Kreditorların tələblərinin birinci növbə üzrə sığorta ödənişləri “İcbari Sığortalar haqqında” Qanuna əsasən İcbari Sığorta Bürosu tərəfindən qarşılanıb.
Qeyd edək ki, 1 saylı Bakı İnzibati-İqtisadi Məhkəməsinin 29 avqust 2016-cı il tarixli qərarı ilə “Alfa Sığorta” ASC müflis elan edilmiş və onun iflası proseduruna başlanılıb. Bu müddət ərzində ləğv prosesində olan “Alfa Sığorta” ASC-nin kreditorlarının tələblərinin reyestri tərtib edilib və məhkəmə tərəfindən təsdiq edilib. Məsələyə yekun olaraq Azərbaycan Respublikasının Ali Məhkəməsində baxılıb.
Hazırda sığorta şirkətinin ləğvetmə prosesi davam edir.