Lənkəran, 21 oktyabr, Bağır Əliyev, AZƏRTAC

Dünyada baş verən iqlim dəyişikliyini, qlobal istiləşməni və gələcəkdə yarana biləcək su qıtlığını nəzərə alan Yuxarı Xanbulançay Hidroqovşağı İstismarı İdarəsinin kollektivi 2020-ci ilin suvarma mövsümünə tam hazırlıqla başladı.

Bu sözləri Yuxarı Xanbulançay Hidroqovşağı İstismarı İdarəsinin rəisi Allahyar Salayev AZƏRTAC-ın bölgə müxbirinə verdiyi müsahibədə söyləyib.

Mövsümün əvvəlində Xanbulan su anbarının tam doldurularaq buraya 52 milyon kubmetr həcmində suyun yığıldığını, su itkilərinin qarşısını almaq məqsədilə təmir işlərinin vaxtında görüldüyünü, nasos və mexaniki avadanlıqların saz vəziyyətə gətirildiyini, təsərrüfatlara verilən su rejiminə ciddi nəzarət olunduğunu vurğulayan idarə rəisi, bütün bunların nəticəsi olaraq Lənkəran və Astara rayonunda suvarma suyu ilə təmin edilən ərazilərində heç bir problemin olmadığını diqqətə çatdırıb.

Qeyd olunub ki, suvarma suyunun ərazilərə maneəsiz verilməsi və izafi suları kənarlaşdırmaq məqsədilə Lənkəran rayonu ərazisində olan kanallarda, kollektorlarda vaxtaşırı təmir-bərpa və lildən təmizləmə işləri aparılır.

Rayonda çəltikçiliyin inkişafı ilə əlaqədar Siyavar, Mamusta, Ürgə, Viravul və Türkəkəran kəndlərində yeni çəltik sahələrində 25 kilometr ərazidə 60 min kubmetr həcmində lildən təmizləmə və 45 min kubmetr həcmində torpaq hamarlama işləri görülüb.

Çayçılığın və sitrus bitkilərinin artırılması məqsədi rayonun İstisu, Girdəni, Sinovli, Xarxatan, Türkəkəran, Vilvan kəndlərində kanal və kollektorlarda 20 km uzunluqda hissədə 52 min kubmetr həcmində təmir-bərpa işləri və 50 min kubmetr ərazidə torpaq hamarlama, Viravul, Cil, Şağlaser, Mamusta, Gərmətük kəndlərində sahələrin suvarılması məqsədi ilə 21 kilometr uzunluqda ərazidə 53 min kubmetr həcmində lildən təmizləmə, 45 min kubmetr torpaq hamarlama, Ürgə, Viyən, Boladi, Göyşaban və Sinovli kəndlərindəki kanal və kollektorlarda 18 kilometr uzunluqda ərazidə 45 min kubmetr həcmində lildən təmizləmə və 36 min kubmetr həcmində torpaq hamarlama işləri görülüb.

Payız-qış mövsümünün başlanması ilə əlaqədar sahələrdən izafi suları kənarlaşdırmaq məqsədilə Vel, Daşdalığjor, Boladi, Xarxatan, Seydəkəran, Yuxarı Nüvədi, Şürük və İstisu kəndlərində kanal və kollektorlarda 26 kilometr uzunluqda ərazidə 75 min kubmetr həcmində lildən təmizləmə və 60 min kubmetr həcmində torpaq hamarlama işləri görülüb.

Hazırda başçılıq etdiyi kollektivin 2021-ci ilin suvarma mövsümünə hazırlaşdığını deyən A.Salayev, bu məqsədlə Xanbulan su anbarına 27,5 milyon kubmetr həcmində suyun yığıldığını, sahələrdə izafi suları kənarlaşdırmaqdan ötrü suvarma üçün vurulmuş bəndlərin açıldığını, kanal və kollektorlarda təmir-bərpa işləri davam etdiriliyini bildirib.

Rayonda daşqın və selə qarşı mübarizə tədbirləri çərçivəsində Gərmətük-Viyən sərhəd kanalında 2180 paqonametr uzunluqda ərazidə 11000 kubmetr həcmində lildən təmizləmə və 7500 kubmetr həcmində torpaq hamarlama işləri görüldüyünü söyləyən idarə rəisi, Dızdəruçayın Mamusta və Daşdalığjor kəndlərindən keçən hissəsində 2730 paqonametr ərazidə 14960 kubmetr həcmində lildən təmizləmə və 11000 kubmetr həcmində torpaq hamarlama işləri görüldüyünü bildirib: “Cil kollektorunun Şağlaser və Cil kəndlərindən keçən hissələrində 2,5 kilometr ərazidə 26500 kubmetr həcmində lildən təmizləmə və 13000 kubmetr həcmində torpaq hamarlama işləri, Boladi çayın Liman şəhəri ərazisindən keçən 1,4 kilometr ərazidə 13500 kubmetr həcmində lildən təmizləmə və 8000 kubmetr həcmində torpaq hamarlama işləri görülüb.

Əsaslı kapital qoyuluşu xətti ilə Meliorasiya və Su Təsərrüfatı ASC-nin sifarişi ilə Ulumçayın Separadi kəndindən keçən hissəsində daşqın və sel suları zamanı həyətyanı və pay-bəlli torpaqların yuyulmasının qarşısını almaq məqsədi ilə çayın bir neçə hissəsində 517 paqonametr ərazidə betondan sahilbərkitmə işləri görülüb. Bu istiqamətdə işlər davam etdiriləcək”.