CƏMİYYƏT
Əmək və əhalinin sosial müdafiəsi naziri Səlim Müslümov Kürdəmir rayonunda 7 rayonun sakinlərini qəbul edib
Bakı, 8 dekabr, AZƏRTAC
Əmək və əhalinin sosial müdafiəsi naziri Səlim Müslümov Kürdəmir, Ucar, Zərdab, İmişli, Beyləqan, Füzuli və Xocavənd rayonlarının sakinlərini qəbul edib.
Nazirliyin ictimaiyyətlə əlaqələr şöbəsindən AZƏRTAC-a verilən məlumata görə, Kürdəmir rayonunda keçirilən qəbul zamanı vətəndaşların nazirliyin səlahiyyət dairəsinə aid məsələlərə dair müraciətləri dinlənilib. Sosial təminat növlərinə hüququn müəyyən olunması, pensiya, sosial sığorta münasibətlərinə dair müraciətlər əsasən sorğu xarakteri daşıyıb və həmin məsələlərlə bağlı qanunvericiliyin müvafiq maddələri vətəndaşlara aydın şəkildə izah olunub. Məşğulluqla bağlı müraciət edənlərə qəbul zamanı ixtisas və əmək vərdişlərinə uyğun vakant iş yerləri təklif olunub və seçdikləri vakant yerlərə göndərişlər verilib. İşsiz və işaxtaran şəxslərdən bir qismi yeni peşələrə yiyələnmək istədiklərini bildiriblər və onlar peşə hazırlığına cəlb olunmaları üçün qeydiyyata götürülüblər.
Qəbul zamanı nazir qeyd edib ki, ölkə Prezidenti İlham Əliyevin sosial-iqtisadi inkişaf strategiyası regionların həyatında uğurlu nəticələr verir. Xüsusən aqrar sahənin inkişafı, torpaqlardan səmərəli istifadənin təmin edilməsi bölgələrdə, o cümlədən Kürdəmir, Ucar, Zərdab, İmişli, Beyləqan, Füzuli və Xocavənd rayonlarında sosial-iqtisadi canlanmaya, pambıqçılıq, baramaçılıq, heyvandarlıq və digər sahələrdə əhalinin məşğulluq imkanlarının xeyli artmasına şərait yaradıb: “Əgər nəzər salsaq görərik ki, cari ilin 11 ayında həmin 7 rayon üzrə məşğulluq orqanlarına iş üçün müraciət edənlərin sayı 43 faiz azalıb. Həmçinin aktiv məşğulluq tədbirlərinin davamı olaraq, bu ilin yanvar-noyabr aylarında nazirliyin məşğulluq orqanlarının xətti ilə həmin rayonlar üzrə 2210 nəfər münasib iş yerləri ilə təmin olunub, 183 nəfər ödənişli ictimai işlərə, 68 nəfər əmək bazarının tələblərinə uyğun peşə hazırlığı və əlavə təhsil kurslarına cəlb edilib. Digər tərəfdən, cari ildə Kürdəmir, Ucar, Zərdab, İmişli, Beyləqan, Füzuli və Xocavənd rayonlarında da 94 aztəminatlı ailənin özünüməşğulluq proqramı çərçivəsində aktivlərlə (mal və materiallarla) təminatı həyata keçirilib. Həmin aktivlər hesabına onlar ailə əməyinə əsaslanan təsərrüfatlarını yaradıblar”.
İmtiyazlı kateqoriyalardan olanların dövlət büdcəsi hesabına mənzillə təmin olunması ilə bağlı müraciətləri cavablandıran nazir bildirib ki, dövlət başçısının 2014-cü il 20 iyun tarixli Sərəncamının icrası olaraq, ötən dövrdə Əmək və Əhalinin Sosial Müdafiəsi Nazirliyinin sifarişi ilə Kürdəmir, Ucar, Zərdab, İmişli, Beyləqan və Füzuli rayonları üzrə 52 nəfər Qarabağ müharibəsi əlili və şəhid ailəsi üçün fərdi yaşayış evləri tikilərək onların istifadəsinə verilib, daha 4 fərdi ev də inşa olunur. Həmçinin ötən ilin mayında Beyləqan rayonunda yeni inşa olunmuş 6 mərtəbəli 54 mənzilli yaşayış binası respublikamızın ərazi bütövlüyünün, müstəqilliyinin və konstitusiya quruluşunun qorunması zamanı əlil olanlara və şəhid ailələrinə təqdim olunub. Hazırda İmişli rayonunda Qarabağ müharibəsi əlilləri və şəhid ailələri üçün 6 mərtəbəli 54 mənzilli yaşayış binası inşa olunur və yaxın vaxtlarda onun tikintisi başa çatdırılacaq”.
Qəbul zamanı əmək hüquqlarının müdafiəsi, reabilitasiya xidmətləri ilə təmin edilmə və s. məsələlərlə bağlı müraciətlər də nazirliyin aidiyyəti struktur bölmələrinin rəhbər vəzifəli şəxslərinin iştirakı ilə araşdırılaraq cavablandırılıb. Ayrı-ayrı şəxslərin bərpa müalicəsi üçün nazirliyin reabilitasiya müəssisələrində qəbul edilmələri, reabilitasiya vasitələri ilə təmin olunmaları, özünüməşğulluq proqramına cəlb edilmələri üçün tapşırıqlar verilib. Qəbul zamanı müraciət edən vətəndaşın ehtiyacı nəzərə alınaraq, onun sağlamlıq imkanları məhdud uşağına əlil arabası təqdim olunub.
Qəbul zamanı nazirliyin səlahiyyət dairəsinə aid olmayan məsələlərə dair müraciətlər aidiyyəti qurumlara çatdırılmaq üçün qeydiyyata alınıb.