CƏMİYYƏT


Əməyin mühafizəsi Azərbaycanda dövlətin sosial siyasətinin əsas məqsədlərindən biridir

Bakı, 27 aprel, AZƏRTAC

Beynəlxalq Əmək Təşkilatı (BƏT) 2003-cü ildən aprelin 28-ni Ümumdünya Əməyin Mühafizəsi Günü elan edib.

Məqsəd işçilərin həyat və sağlamlığının qorunması üçün təhlükəsiz əmək şəraitinin yaradılması, istehsalat qəzalarının qarşısının alınması üçün profilaktik tədbirlərin görülməsi məsələsinə ictimaiyyətin diqqətinin artırılmasıdır. Hər il Ümumdünya Əməyin Mühafizəsi Günü ölkəmizdə də qeyd edilir.

Əmək və Əhalinin Sosial Müdafiəsi Nazirliyinin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, əməyin mühafizəsi Azərbaycanda dövlətin sosial siyasətinin əsas məqsədlərindən biridir. BƏT-in əməyin mühafizəsi ilə bağlı Konvensiyaları ölkəmiz tərəfindən qəbul edilib, əməyin mühafizəsi sahəsində dolğun milli qanunvericilik yaradılaraq daim təkmilləşdirilir.

BƏT tərəfindən hər il Ümumdünya Əməyin Mühafizəsi Günü müasir çağırışlardan irəli gələn mövzularda elan olunur. Bu il həmin gün “Böhranı qabaqlamaq və ona hazır olmaq – dayanıqlı əməyin mühafizəsi sistemlərinə investisiya qoymaq” mövzusuna həsr olunub.

Həmin mövzu yeni növ koronavirus (COVID-19) pandemiyasının əmək sferasına mənfi təsirləri fonunda əməyin mühafizəsinin, müvafiq qabaqlayıcı tədbirlərin görülməsinin vacibliyi baxımından xüsusi aktuallıq kəsb edir. Azərbaycanda da bu sahədə ciddi və ardıcıl işlər aparılır. Ölkəmizdə pandemiya dövründə geniş sosial dəstək paketinin əsas istiqamətlərindən biri pandemiyanın əmək sferasına mənfi təsirlərinin azaldılması və işçilərin təhlükəsizliyini təmin etməkdən ibarət olub.

Eyni zamanda, əmək sferasında işçilərin əməyinin təhlükəsizliyi və iş rejimləri ilə bağlı bir çox məsələlər müvafiq hüquqi aktlarla tənzimlənib. İş yerlərində infeksiyaya yoluxmanın qarşısının alınması məqsədilə qaydalar müəyyən edilib, işəgötürənlər üçün tövsiyələr verilib, habelə COVID-19 infeksiyasına qarşı işçilərin vaksinasiyasının aparılması işləri davam edir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.