MƏDƏNİYYƏT


Ankarada türk dünyasının görkəmli şairi Kojogeldi Kuluyevin yubileyi qeyd olunub

Ankara, 19 fevral, AZƏRTAC

Qırğız Respublikasının Xalq şairi, Qırğızıstanın Beynəlxalq Türk Mədəniyyəti Təşkilatındakı (TÜRKSOY) təmsilçisi Kojogeldi Kuluyevin 60 illik yubileyi Ankarada qeyd olunub.

AZƏRTAC xəbər verir ki, əvvəlcə Qırğızıstan Prezidenti Sooronbay Jeenbekovun böyük şairə ünvanladığı təbrik məktubu bu ölkənin Türkiyədəki səfiri Kubanychbek Omuralıev tərəfindən oxunub.

Tədbir çərçivəsində görkəmli şairin “Avuçtakı dünya” və “Yürək-məkan” şeirlər toplularının təqdimatı keçirilib.

TÜRKSOY-a üzv ölkələrin Ankaradakı təmsilçiləri, Türkiyə paytaxtında yaşayan və çalışan elm və mədəniyyət xadimləri, Qırğızıstandan gələn geniş tərkibli heyət, o cümlədən şairin qələm yoldaşları və dostları yubiley mərasiminə qatılıblar.

Əvvəlcə TÜRKSOY-un baş katibi Düsen Kaseinov, Qırğızıstanın Mədəniyyət, Elm və Turizm nazirinin müavini Kayrat İmanaliyev, Avrasiya Yazıçılar Birliyinin sədri Yaqub Öməroğlu, Ankaranın Etimesgut rayon bələdiyyəsinin sədri Envər Dəmirəl və başqaları görkəmli şair Kojogeldi Kuluyevin zəngin mənalı həyat və yaradıcılığından, onun şeirlərinin türk dünyasının poeziya aləminə gətirdiyi yeniliklərdən, yüksək insani keyfiyyətlərindən danışıblar.

Daha sonra Azərbaycan Respublikasının Mədəniyyət naziri Əbülfəs Qarayevin imzaladığı fəxri fərman ölkəmizin TÜRKSOY-dakı nümayəndəsi Elçin Qafarlı tərəfindən Kojogeldi Kuluyevə təqdim olunub.

TÜRKSOY-un kollektivi adından baş katibin müavini Bilal Çakıcı, təşkilatın məsul əməkdaşı Arman Nurmakhamatuly və başqaları Kojogeldi Kuluyevin yüksək insani keyfiyyətlərindən, türk dünyasının poeziyasının zənginləşməsi naminə qələmə aldığı şeirlərin fəlsəfəsindən danışıblar. Çıxışlarda diqqətə çatdırılıb ki, yubilyar mənsub olduğu qırğız mədəniyyəti ilə yanaşı, digər türkdilli xalqların mədəniyyətinin, eləcə də poeziyasının inkişafına eyni məhəbbətlə yanaşır.

Şairin qələm dostları onun şeirlərini oxuyub, poeziya yaradıcılığının nadir üslubundan bəhs ediblər.

Baş katib Düsen Kaseinov rəhbərlik etdiyi təşkilatın adından “Şərəf” medalını yubilyara təqdim edib.

Kojogeldi Kuluyev yüksək təşkilatçılıqla keçirilən yubiley tədbirinə, xoş sözlərə və səmimi təbriklərə görə təşəkkür edib. Mərasim zəngin bədii proqramla davam edib.

Qeyd edək ki, “Nəsimi ili-2019” çərçivəsində TÜRKSOY tərəfindən nəşr olunan “İmadəddin Nəsimi dünya dillərində” kitabında yer alan qırğız dilindəki şeirlər Kojogeldi Kuluyev tərəfindən şairin ana dilinə tərcümə edilib.

Sabir Şahtaxtı

AZƏRTAC-ın xüsusi müxbiri

Ankara

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.