CƏMİYYƏT
Antonio Quterreş: İnsan alverinə məruz qalanların yarıdan çoxu miqrantlardır
Bakı, 30 iyul, AZƏRTAC
Qlobal pandemiyanın artan bərabərsizlik və iqtisadi dağıntılarla müşayiət olunduğu bir vaxtda insan alverindən xilas olan və onun qurbanı olmuş insanların səsləri eşidilməmək təhlükəsi ilə üzləşib.
AZƏRTAC xəbər verir ki, bu sözlər 30 İyul - İnsan Alverinə Qarşı Beynəlxalq Mübarizə Günü ilə bağlı BMT-nin Baş katibi Antonio Quterreşin yayılmış müraciətində yer alıb.
COVID-19 böhranının hələ də həssaslıq və çarəsizlikləri artırmaqda olduğu, 124 milyondan çox insan pandemiya nəticəsində kəskin yoxsulluq səviyyəsinə düşdüyü bir zamanda milyonların insan alveri qurbanına çevrilmə təhlükəsi ilə üzbəüz qaldığını xatırladan müraciətdə həmin alverin potensial predmeti olaraq qalmaqda davam edən problemlər bir daha xatırladılır: “Uşaqlar böyük və artan risk altındadır: onlar qlobal səviyyədə insan alveri qurbanlarının üçdə birini təşkil edir – bu isə son 15 il ərzində bu rəqəmin üç dəfə artması deməkdir. Azgəlirli ölkələrdə qurbanların yarısı məhz uşaqlardır. Onların əksəriyyəti icbari əməyə cəlb olunur. Cinayətkarlar hər yerdə həssas əhali qruplarını müəyyənləşdirmək, onları nəzarət altında saxlamaq və istismar etmək üçün müxtəlif texnologiyalardan istifadə edirlər. Uşaqların onlayn platformalar vasitəsilə cinsi istismar, məcburi evlilik və digər məqsədlər üçün hədəfə çevrilməsi halları artmaqdadır”.
Hələ də qadın və qızların cinsi istismar məqsədilə alveri ümumilikdə insan alverinin ən geniş yayılmış və mənfur formalarından biri olaraq qaldığına diqqəti yönəldən müraciətdə əksər bölgələrdə insan alverinə məruz qalanların yarıdan çoxunu miqrantların təşkil etdiyi deyilir.
Hökumətləri qabaqlayıcı tədbirləri gücləndirməyə, zərərçəkmişləri dəstəkləməyə, günahkarları ədalət mühakiməsinə cəlb etməyə çağıran müraciətdə bunun üçün təcili addımlar atmasının vacibliyi vurğulanır, BMT-nin transmilli mütəşəkkil cinayətkarlığa qarşı konvensiyası və onun insan alverinin qarşısının alınması, dayandırılması və cəzalandırılması protokolunun icrasının təxirəsalınmazlığı qeyd edilir.
İnsan alverinə qarşı beynəlxalq mübarizə tədbirlərinin təxirəsalınmazlığını xatırladan müraciət əməli tədbirlərin qaçılmaz olduğunu bəşəriyyətin yadına salır: “Səylərimiz zamanı insan alverindən zərər çəkmiş insanların təcrübəsindən yararlanmalıyıq. Onların töhfəsi risk faktorları və formalarını aradan qaldırmaq, qurbanları müəyyən etmək və qorumaq, habelə onlara ədalət mühakiməsinə çıxışı və normal həyata qayıtmaq imkanlarını təmin etməklə yanaşı, istismarçıları məsuliyyətə cəlb etmək üçün olduqca vacibdir.
BMT insan alveri qurbanlarını dinləyib səslərinə səs verməklə, hüquq və ləyaqətlərini təmin etməklə, hekayələrini yayaraq insan alverinə qarşı mübarizədə onlardan öyrənməklə bu dəhşətli cinayətin qarşısını almaq və ona son qoymaq məqsədinə sadiqdir”.