Moskva, 3 aprel, AZƏRTAC

Rusiyada koronavirusa yoluxanların sayı iki dəfə arta bilər.

AZƏRTAC xəbər verir ki, “Sberİndeks” analitik portalının ekspertləri belə proqnozla çıxış ediblər.

Ekspertlər aprelin 4-dən başlayaraq aprelin 15-dək Rusiyada COVID-19 xəstələrinin sayının iki dəfə artacağını gözləyirlər.

Eyni zamanda, onların fikrincə, pandemiyanın üçüncü dalğasından danışmaq hələ tezdir. Ekspertlər yoluxmanın artmasını mövsümlə əlaqələndirirlər.

Qeyd edək ki, aprelin 2-də Rusiyada 8792 yeni yoluxma faktı qeydə alınıb. Ümumilikdə ölkədə indiyədək 4 563 056 koronavirus xəstəsi aşkar edilib, 99 633 nəfər həyatını itirib, 4 186 251 nəfər sağalıb.

Fəridə Abdullayeva

AZƏRTAC-ın xüsusi müxbiri

Moskva