SİYASƏT
Argentinanın “La Voz” qəzeti: Azərbaycan münaqişənin həllində ən maraqlı tərəfdir
Bakı, 9 aprel, AZƏRTAC
Argentinanın ən böyük əyalətlərindən biri olan Kordoba əyalətinin aparıcı “La Voz” qəzetinin 8 aprel tarixli nömrəsində Azərbaycanın bu ölkədəki müvəqqəti işlər vəkili Rəşad Aslanovun “Azərbaycan münaqişənin həllində ən maraqlı tərəfdir” adlı məqaləsi dərc olunub. Bu barədə AZƏRTAC-a Azərbaycanın Argentinadakı səfirliyindən məlumat verilib.
Məqalədə bildirilir ki, 20 ildən artıqdır Ermənistan gücdən istifadə edərək Azərbaycan ərazisinin 20 faizini işğal edib, həmin ərazilərdə bir milyon azərbaycanlını etnik təmizləməyə məruz qoyub, müharibə cinayətləri və insanlıq əleyhinə cinayətlər törədib.
Ermənistan Azərbaycanın ərazi bütövlüyünü təsdiqləyən və işğalçı qüvvələrin zəbt olunmuş bütün Azərbaycan ərazilərindən dərhal, tamamilə və qeyd-şərtsiz çıxarılmasını tələb edən BMT Təhlükəsizlik Şurasının 822, 853, 874 və 884 saylı qətnamələrinə açıq şəkildə məhəl qoymur.
Məqalədə oxucuların diqqətinə çatdırılır ki, aprelin 2-nə keçən gecə Ermənistan münaqişə zonasında hərbi fəaliyyətini intensivləşdirərək, silahlı qüvvələrin təmas xətti boyunca sıx məskunlaşmış ərazilərdə yaşayan, aralarında qadınlar, uşaqlar və ahılların da olduğu mülki əhaliyə qarşı qəsdən, sistematik və hədəflənən hücumlar edib. Nəticədə mülki şəxslər həlak olub və yaralanıb. Hücumlar nəticəsində, həmçinin çoxsaylı ictimai və şəxsi mülkiyyətə ciddi ziyan dəyib. Məktəblər, xəstəxanalar və ibadət yerləri də daxil olmaqla, sosial müəssisələrə raket zərbələri endirilib.
Bildirilir ki, Ermənistanın bu əməlləri beynəlxalq humanitar hüququn, xüsusən də 1949-cu il Cenevrə Konvensiyaları və onlara əlavə protokolların, eləcə də Silahlı münaqişələr zamanı mədəni obyektlərin mühafizəsinə dair 1954-cü il Haaqa Konvensiyasının müddəalarının kobud şəkildə pozulmasıdır. Mülki əhaliyə qarşı törədilmiş bu qəsdli hücumlar nəticəsində çoxlu sayda mülki şəxs özünün yaşamaq, sağlamlıq, təhsil və dini etiqadların yerinə yetirilməsi kimi fundamental hüquqlarından məhrum edilib.
Ermənistan tərəfindən Azərbaycanın ərazi bütövlüyünə, suverenliyinə qarşı güc tətbiq edilməsinin qarşısının alınması, ölkənin beynəlxalq səviyyədə tanınmış sərhədləri daxilində mülki əhalinin və əmlakın təhlükəsizliyinin təmin edilməsi üçün Azərbaycan tərəfi müvafiq cavab tədbirləri görüb.
Azərbaycan dəfələrlə beynəlxalq ictimaiyyətin diqqətinə çatdırıb ki, regionda hökm sürən gərginliyin başlıca səbəbi Ermənistan silahlı qüvvələrinin Azərbaycan ərazilərində qeyri-qanuni mövcudluğudur. Ermənistanın son əməlləri beynəlxalq sülh və təhlükəsizlik, eləcə də sivil dünyanın önəm verdiyi dəyərlər üçün ciddi təhlükə təşkil edir.