Salyan, 25 may, İsmayıl Cəfərli, AZƏRTAC

Vətən müharibəsində qazandığımız şanlı qələbə Azərbaycan tarixinə qızıl hərflərlə həkk olundu. Bu tarixi qələbənin qazanılmasından ötrü canını fəda etmiş cəsur zabitlərimizdən biri də Azərbaycan Silahlı Qüvvələrinin mayoru Hüseynağa Balıyevdir.

AZƏRTAC xəbər verir ki, Hüseynağa Balıyev Vətən fədaisi idi. O, Vətənini canından çox sevir, bayrağımızı həmişə ucalarda görmək istəyirdi. 1987-ci il dekabrın 22-də Salyan şəhərində dəmiryolçu ailəsində dünyaya gələn Hüseynağa Salman oğlu Balıyev uşaqlıqdan hərbçi olmağı arzulayırdı. O, orta məktəbi bitirdikdən sonra hərbçi peşəsinə yiyələnmək üçün Heydər Əliyev adına Ali Hərbi Məktəbə daxil olur. Naxçıvandakı N saylı hərbi hissədə, sonra cəbhə xəttində yerləşən hərbi hissələrdən birində əvvəlcə qərargah rəisi, bir müddət sonra isə tabor komandiri kimi xidmətini davam etdirir.

Vətən müharibəsi başlayanda öz əsgərləri ilə savaş meydanına atılan Hüseynağa Balıyev Cəbrayıl, Füzuli və Xocavənd istiqamətlərində gedən şiddətli döyüşlərdə misilsiz qəhrəmanlıqlar göstərir. Onun rəhbərliyi ilə taborunda olan əsgərlər düşmənə sarsıdıcı zərbələr endirir. Xocavəndin Hadrut qəsəbəsinin azadlığı uğrunda döyüşdə qəhrəmancasına şəhid olur.

Şəhidin anası Rəna Balıyeva deyir ki, oğlu mayor rütbəsini elə döyüş meydanında aldı. “Vətənpərvər idi, əsgərlərini çox sevirdi, onları öz uşaqları kimi qoruyurdu. Sağ olsunlar, əsgərləri də onun haqqını itirməyiblər. Hamısı deyirdi ki, o, bizə ata qayğısı göstərib. Həmişə başımızı uca etdi. Mən onunla fəxr edirəm”, - deyə o bildirib.

Oğlu ilə fəxr etdiyini söyləyən şəhidin atası Salman Balıyev isə Hüseynağanın çox mehriban, istiqanlı, qeyrətli və ailə qədri bilən zabit olduğunu vurğulayıb.

Əsgərləri onu “Hadrut döyüşlərinin qəhrəman mayoru” adlandırırdı. Dəfələrlə sinəsini önə çəkib əsgərlərini qorumuşdu. Onları övladı kimi əzizləyirdi. Elə Hadrut qəsəbəsinin azad edilməsi uğrunda döyüşlərdə əsgərlərini qoruyarkən şəhid olur.

Ölümündən iki gün əvvəl Hüseynağaya mayor rütbəsi verilmişdi. Çox sevinirdi. Lakin həmin rütbəni alıb, çiyinlərində daşımaq ona qismət olmadı. Sağlığında cəsur komandirə verilmiş mayor rütbəsi dəfn zamanı məzarı başında atasına təqdim edilib.

Şəhidin qardaşı İsa Balıyev deyib: “Qardaşım Xocavənd istiqamətinə kimi bütün şiddətli döyüşlərdə iştirak edib, elə həmin döyüşlərin birində də şəhid olub. O, “Qarabağ” ordeni və “Vətən uğrunda“ medalı ilə təltif edilib. Kapitan rütbəsi daşıyırdı. Onu mayor rütbəsi ilə təltif etdilər. Müharibə vaxtı olduğuna görə təqdim edilməmişdi. Ondan 3 gün sonra şəhid oldu. Mayor rütbəsi atama dəfn zamanı təqdim edildi”.

Nərmin xanımla ailəli olan qəhrəman zabitimizin iki övladı yadigar qalıb: Rəna və Harun. Müəllim kimi çalışan bacısı deyir ki, bundan sonra təkcə onun övladlarına yox, həm də şagirdlərinə Hüseynağanın qəhrəmanlığından çox danışacaq. Çünki dərs dediyi sinfə şəhid mayor Hüseynağa Balıyevin adı verilib.

“Yavər Qafarov Birinci Qarabağ müharibəsinin şəhidi olub. Məktəbimiz onun adını daşıyır. Bu yaxınlarda da mənim öz sinfimə qardaşım, şəhid mayor Balıyev Hüseynağanın adı verildi. Çox sevindim, qürurlandım və fəxr etdim ki, gələcək nəsillərə qardaşım haqqında danışa biləcəyəm. Xatirələri haqqında geniş söhbətlər açacağam. Sinfimdə oğlanlar da var, onlarda Vətən sevgisi yarada biləcəyəm”, - deyə şəhidin bacısı Ağabəyim Məmmədova söyləyib.