İQTİSADİYYAT
Avrasiya regionu və OECD ölkələri arasında əlaqələrin möhkəmləndirilməsi müzakirə olunub YENİLƏNİB VİDEO
Bakı, 29 mart, AZƏRTAC
Bakıda Avrasiya regionu və OECD ölkələri arasında əlaqələrin möhkəmləndirilməsi müzakirə edilib.
AZƏRTAC xəbər verir ki, İqtisadi İslahatların Təhlili və Kommunikasiya Mərkəzi (İİTKM) və İqtisadi Əməkdaşlıq və İnkişaf Təşkilatı (OECD) martın 29-da "İqtisadi islahatlar: Sahibkarlığın inkişafı və şaxələndirmə" adlı beynəlxalq konfrans keçirib. Konfransda Avrasiya regionu və OECD ölkələri arasında əlaqələrin daha da möhkəmləndirilməsi, regionun iqtisadi və sosial inkişafı ilə bağlı əməkdaşlığın genişləndirilməsi, həmçinin bu sahədə mövcud problemlərin həll yolları müzakirə olunub.
OECD Avrasiya Rəqabətlilik Proqramı çərçivəsində "Azərbaycanda kiçik və orta sahibkarlığın rəqabətqabiliyyətliliyinin artırılması sahəsində islahatların və iqtisadi şaxələndirmənin dəstəklənməsi" mövzusunda təhlil icmalı hazırlayıb. İcmal "Azərbaycan Respublikasında kiçik və orta sahibkarlıq səviyyəsində istehlak mallarının istehsalına dair Strateji Yol Xəritəsi"nin icrası üçün müəyyən edilən bəndlər üzrə beynəlxalq təcrübənin öyrənilməsini və uğurlu tətbiqinə dəstək vermək, eləcə də Azərbaycanın əldə etdiyi müsbət nəticələr haqqında OECD-nin üzv ölkələrini məlumatlandırmaq məqsədi daşıyır.
İİTKM-in icraçı direktoru Vüsal Qasımlı bildirib ki, beynəlxalq və nüfuzlu qurumların ölkəmiz haqqında müsbət hesabat təqdim etməsi ölkədə aparılan iqtisadi islahatların açıq hökumət, şəffaflıq və hesabatlılıq prinsiplərinə tam uyğun olduğunu göstərir: "İqtisadi Əməkdaşlıq və İnkişaf Təşkilatı dövlətlərin iqtisadi, sosial və ətraf mühit dəyişikliklərinin təməlində dayanan faktorları öyrənərək qlobal ticarət və investisiya axınını və məhsuldarlığı ölçür, iqtisadi məsələlərlə bağlı beynəlxalq standartları müəyyən edir. Azərbaycan iqtisadiyyatın şaxələndirilməsi və sahibkarlığın rəqabətqabiliyyətliliyinin artırılması istiqamətində OECD ilə sıx əməkdaşlığını davam etdirir. Prezident İlham Əliyev iqtisadiyyatın şaxələndirilməsi, sosial sferanın inkişafı, kiçik və orta sahibkarlığın inkişaf istiqamətində çoxsaylı hüquqi normativ aktlar imzalayıb. Qeyd olunan müxtəlif sektorlu islahatlar OECD tərəfindən müəyyən edilən müasir və beynəlxalq standartlarla eynilik təşkil edir. Buna görədir ki, Azərbaycanda sahibkarlıq sahəsində aparılan islahatları Dünya Bankının "Doing Business" hesabatında yüksək qiymətləndirib".
Dövlət Gömrük Komitəsinin sədri Səfər Mehdiyev qeyd edib ki, ölkədə sahibkarlara münbit şəraitin yaradılması son illərdə aparılan islahatların nəticəsidir, eyni zamanda, iqtisadiyyatın gələcək inkişafı və şəffaflığın təmin olunması istiqamətində atılmış addımlardan biridir: “Gömrük orqanlarında da islahatların aparılması istiqamətində dövlət başçısının tapşırıqlarından irəli gələn müəyyən işlər görülüb. Hazırda idxal-ixrac əməliyyatlarının, gömrük prosedurlarının sadələşdirilməsi məqsədilə işlər davam etdirilir”.
Sahibkarlığın inkişafında gömrük xidmətinin də mühüm rol oynadığını deyən komitə sədri bununla əlaqədar iş adamları və gömrük əməkdaşları arasında görüşlərin keçirildiyini, sahibkarların rəy və təkliflərinin öyrənildiyini bildirib.
Azərbaycanda sahibkarlığın inkişafı üçün əlverişli mühit formalaşdırıldığını deyən iqtisadiyyat nazirinin müavini Sahib Məmmədov bildirib ki, ölkədə əlverişli biznes mühitinin yaradılması, kiçik və orta biznesin fəaliyyəti üçün cəlbedici investisiya şəraitinin qurulması istiqamətində genişmiqyaslı işlər aparılır. Həyata keçirilən sosial-iqtisadi siyasət nəticəsində iqtisadiyyatın inkişafı uğurla davam edir, makroiqtisadi sabitlik qorunub saxlanılır, sahibkarlığın inkişafı üçün daha əlverişli mühit formalaşdırılıb.
Əmək və əhalinin sosial müdafiəsi nazirinin müavini Anar Əliyev isə yaxın günlərdə Bakının Yasamal rayonunda nazirliyin ilk DOST mərkəzinin fəaliyyətə başlayacağını deyib. "Bu ilin sonunadək Bakıda 3 DOST mərkəzinin açılması planlaşdırılır. 2021-ci ilin sonunadək isə ölkədə DOST mərkəzlərinin sayının 31-ə çatdırılması nəzərdə tutulur", - deyə o diqqətə çatdırıb.
Kənd təsərrüfatı nazirinin müavini İlhamə Qədimova gələn ildən Azərbaycanda fermerlər və kənd təsərrüfatı sahəsində fəaliyyət göstərən sahibkarların "Non stop shop" modeli olaraq subsidiyalarla bağlı müraciətlərini elektron qaydada həyata keçirə biləcəklərini deyib. Bildirib ki, bu, onların həmin resurslara çıxışını asanlaşdıracaq: “Sahibkarlığın inkişafında kənd təsərrüfatı sahəsində tətbiq edilən güzəştlərin, subsidiyaların əhəmiyyəti böyükdür. "Non stop shop" modelinə keçidlə bağlı elektron kənd təsərrüfatı informasiya sistemi vasitəsilə artıq fermerlərin qeydiyyatına başlanılıb. Ümid edirik, gələn ildən etibarən "Non stop shop" modeli ilə subsidiyalarla bağlı müraciət etmək mümkün olacaq”.
İqtisadi Əməkdaşlıq və İnkişaf Təşkilatının Qlobal Əlaqələr Katibliyinin Avrasiya bölməsinin rəhbəri Vilyam Tomson "Azərbaycanda iqtisadi islahatlar: Sahibkarlığın inkişafı və iqtisadi şaxələndirmə" mövzusunda çıxış edib. O, "Azərbaycanda sahibkarlığın gücləndirilməsi yolu ilə şaxələndirmənin sürətləndirilməsi" və "Xarici investisiyaların yerli təchizatçılarla əlaqələndirilməsi" mövzusunda hazırlanan aralıq hesabatlarının Fransada keçirilən "Avrasiya Həftəsi 2018" tədbirində də təqdim edildiyini xatırladıb.
Onun sözlərinə görə, OECD-nin mütəmadi bu formatda hesabatlar təqdim etməsində məqsəd üzv dövlətlər arasında məlumat mübadiləsini təmin etmək və şəffaflıq üzrə beynəlxalq standartlara riayət edib-etməməsini dəyərləndirməkdir: "Azərbaycan son üç ildə KOB-lar üçün institusional, tənzimləyici və əməliyyat mühitinin gücləndirilməsi məqsədilə bir sıra iqtisadi islahatlar həyata keçirib. Bu islahatlar iqtisadi istehsal və ixracın vacib şaxələndirməni stimullaşdırmaq potensialına malikdir. Məsələn, KOBİA-nın yaradılması və www.enterpriseazerbaijan.com portalının işə salınması düzgün istiqamətdə addımlardır. İqtisadi Əməkdaşlıq və İnkişaf Təşkilatı (İƏİT) ölkələrinin bu cür tədbirlərlə təcrübəsi real dəyişikliyin mümkünlüyünü göstərir, lakin nəticələr bir günə əldə olunmayacaq: onlar adekvat resurslarla dəstəklənən davamlı və ardıcıl iş tələb edəcəklər. Çox şadam ki, Avropa İttifaqının EU4Business təşəbbüsünün dəstəyi ilə OECD Azərbaycanda sahibkarlıq və iqtisadi şaxələndirməni təşviq etmək məqsədilə KOB yol xəritəsinin həyata keçirilməsini dəstəkləmək üçün hökumətlə işləyir. Bu konfransda təqdim etdiyim iki hesabat son bir neçə ildə keçirilən islahatlar nəticəsində əldə edilən nailiyyətləri əks etdirir və agentliyin fəaliyyətinin gələcəkdə daha da inkişafı üçün bəzi yollar göstərir".
Konfransda İqtisadi islahatların Təhlili və Kommunikasiya Mərkəzinin www.enterpriseazerbaijan.com portalı menecer Aytən Məmmədova tərəfindən təqdim olunub.
“Kapital Bank”ın dəstəyi ilə keçirilən müzakirəyə beynəlxalq qurumların, diplomatik korpusun yüksək vəzifəli nümayəndələri də qatılıb.