ELM VƏ TƏHSİL
Avropa Komissiyası Barselonaya ən sürətli superkompüterin alınması üçün qrant verib
Madrid, 7 iyun, AZƏRTAC
Barselona Superkompüter Mərkəzi (BSC) hazırkı superkompüterdən 17 dəfə güclü olan yeni superkompüterin alınması üçün 100 milyon avro məbləğində qrant udub. Barselonadakı superkompüter saniyədə 200 000 trilyon əməliyyat aparmağa imkan verəcək.
Avropa İttifaqının yardımı təqribən 100 milyon avro təşkil edəcək ki, bu da Aİ-nin İspaniyanın innovativ tədqiqatlarına yatırdığı ən böyük sərmayədir. Bu sərmayə 2020-ci il dekabrın 31-nə qədər işə salınacaq maşının qiymətinin yarısına bərabərdir. Barselona Superkompüter Mərkəzi kompüteri Portuqaliya, Türkiyə və Xorvatiya tərəfindən yaradılmış konsorsiumda idarə edəcək. Yeni infrastruktur Barselonanı Avropanın tədqiqatlar mərkəzinə çevirməyi vəd edir. Son illər BSC tədqiqat və layihələrə vəsait toplanması məsələsində bütün universitetləri geridə qoyub.
Nigar Cəfərli
AZƏRTAC-ın xüsusi müxbiri
Madrid