Bakı, 7 may (AZƏRTAC). Xəbər verdiyimiz kimi, mayın 6-da Vyana şəhərində Avropa Şurası Nazirlər Komitəsinin 124-cü sessiyası keçirilmişdir. Sessiyada Avropa Şurası Nazirlər Komitəsinə sədrlik Azərbaycana keçmişdir.

Xarici İşlər Nazirliyinin mətbuat xidmətindən AZƏRTAC-a bildirmişlər ki, sədrliyi qəbul edən Azərbaycanın xarici işlər naziri Elmar Məmmədyarov sessiyada çıxış edərək ölkəmizin sədrlik dövrü üçün prioritet istiqamətlərini açıqlamışdır.

Nazir bildirmişdir ki, növbəti altı ay müddətində Azərbaycan Avropa Şurasının üç əsas sütunu - insan hüquqları, qanunun aliliyi və demokratiyaya güclü dəstək verəcək və bu istiqamətdə səylərini əsirgəməyəcəkdir. Bu müddət ərzində Avropa Şurasının əsas dəyərlərinin dəstəklənməsi və təşviqi bizim bütün fəaliyyət və öhdəliklərimizin mərkəzində duracaqdır.

Elmar Məmmədyarov demişdir: “Üzv dövlətlərdən təcili və qəti cavab əldə etməyi təmin etmək üçün Avropada demokratiya, təhlükəsizlik və sabitlik sahəsindəki mövcud problemlərə ciddi diqqət ayıracağıq. Bu məqsədlə Azərbaycan sədrlik müddətində gücləndirilmiş dialoq, qarşılıqlı hörmət və anlaşma yolu ilə kompromis ruhunda razılaşdırılmış qərarlar əldə etməyə çalışacaqdır”.

Bildirilmişdir ki, korrupsiya ilə mübarizədə güclü əməkdaşlıq Azərbaycanın sədrliyinin əsas prioritetlərindən biri olacaqdır. “Biz Beynəlxalq Antikorrupsiya Akademiyası ilə birgə Bakıda yüksək səviyyəli konfrans keçirməklə korrupsiya ilə mübarizəni özünün əsas məqsədi elan etmiş Avropa Şurasının səylərinə töhfəmizi verəcəyik. Bu konfrans antikorrupsiya qanunlarının tətbiqinə böyük əhəmiyyət verərək və ehtiyat tədbirlərini təmin edərək ən yaxşı təcrübələr üzrə fikir mübadilələrinə imkan yaradacaqdır”.

Elmar Məmmədyarov bildirmişdir ki, Azərbaycanın sədrliyi dövründə idman yarışlarının idarə edilməsi üzrə Avropa Şurası Konvensiyasının mümkün qəbuluna yaxından nəzarət olunacaq və biz tezliklə imzalanması üçün bu Konvensiyanın hazır olmasına   dəstəyimizi gücləndirəcəyik. Bildiyiniz kimi, Bakı 2015-ci ildə ilk dəfə olaraq Avropa Oyunlarına ev sahibliyi edəcək və bu da sədrlik müddətində bu Konvensiyanın qəbuluna yardım etməyimizin digər əsas səbəbidir.  

Vurğulanmışdır ki, mütəmadi qaydada inkişaf edən cəmiyyətlərdə mədəni fərqliliklərin idarə edilməsi bu gün Avropada əsas məsələlərdən birinə çevrilmişdir. Azərbaycan tarixən müxtəlif dinlərin nümayəndələrinin sülh şəraitində birgə yaşadığı məkan olmuşdur. Mədəni fərqliliklərə yardım məsələsi hər zaman gündəlikdəki əsas məsələlərdən olmuşdur. Sədrlik zamanı Azərbaycan mədəniyyətlərarası dialoqa böyük əhəmiyyət verərək Avropada diskriminasiya və dözümsüzlüklə mübarizəyə yardım edəcəkdir. Mədəniyyətlərarası dialoqun dini ölçüləri haqqında Avropa Şurasının 2014-cü il illik iclasını təşkil etmək şərəfinə nail olacağıq. Bu iclasın mədəni fərqliliklərə malik cəmiyyətlərin qarşılıqlı hörmət və anlaşma əsasında həmrəyliyin vaciblik və qiymətini yenidən qeyd edəcəyinə ümidvarıq.

 Nazir bildirmişdir ki, Azərbaycan sosial həmrəylik və sosial davamlılığı istənilən sarsılmaz və çiçəklənən cəmiyyətin vacib elementi hesab edir. Bizim bu istiqamətdə səylərimiz Avropa Şurasının zəif müdafiə olunan qruplara xüsusi diqqət ayıraraq heç bir ayrı-seçkilik olmadan hamının sosial hüquqlardan istifadə etmək imkanının təmininə yardım etməyə yönəlmişdir. Ermənistanın işğalçılıq siyasəti səbəbindən genişmiqyaslı köçkünlük təcrübəsi olan Azərbaycan heç şübhəsiz sədrliyin müvafiq fəaliyyətləri çərçivəsində cəmiyyətin müdafiəsiz üzvləri olan köçkünlərin hüquqlarının müdafiəsinə güclü diqqət ayıracaqdır. Əminik ki, XXI əsrin Avropasında milyonlarla insanın hələ də bu hadisədən əziyyət çəkməsi ilə əlaqədar olaraq bu məsələyə gələcəkdə Avropa Şurası çərçivəsində daim diqqət ayrılmalıdır.

E.Məmmədyarov demişdir: “Bizim işimiz, eyni zamanda, çiçəklənən və sarsılmaz cəmiyyətlərin iki əsas ayrılmaz elementi olan gənclik və təhsil üzərində də cəmləşib. Biz təhsilli və məsuliyyətli gənclər nəslinin tərbiyəsinə xüsusi əhəmiyyət verəcəyik ki, bu da gənclərin öz hüquqlarından geniş istifadə imkanının təmin edilməsindən keçir. Bakı bu prioritet fəaliyyət xətti çərçivəsində Avropa ali təhsil sahəsinin həyata keçirilməsi üzrə 4-cü regional nazirlər iclası və Gənclər Siyasəti üzrə BMT-nin Qlobal Forumu kimi iki əhəmiyyətli tədbirə ev sahibliyi edəcəkdir. BMT-nin Forumu Avropa Şurasının güclü institusional dəstəyindən faydalanacaqdır”.

Azərbaycanın xarici siyasət idarəsinin rəhbəri bildirmişdir ki, konvensiya sisteminin səmərəliliyinin artırılması Avropa Şurasının əsas prioritetlərindən biri olaraq qalır. Azərbaycan İnterlaken, İzmir və Braytonda imzalanmış bəyannamələrin yerinə yetirilməsinə dəstək göstərərək Avropa Şurasının bu istiqamətdə olan səylərinə öz töhfəsini verəcəkdir. Konvensiyanın milli səviyyədə həyata keçirilməsinə böyük diqqət göstəriləcəkdir. Bununla bağlı Bakıda konvensiyanın ölkədə həyata keçirilməsində yerli hakimlərin rolu barədə yüksək səviyyəli konfrans təşkil olunacaqdır.

Qeyd olunmuşdur ki, Avropa Şurası baş katibin təşəbbüsü ilə ciddi siyasi islahatların həyata keçirilməsi hədəfi qarşıya qoyulmuş və bu, sədrliyimiz müddətində bizim tərəfimizdən yekdilliklə və güclü şəkildə dəstəklənəcəkdir. Azərbaycan, həmçinin Avropa İttifaqı, ATƏT və BMT kimi digər beynəlxalq təşkilatlarla əməkdaşlığın daha da möhkəmləndirilməsinə dəstək göstərəcəkdir.

 Nazir diqqətə çatdırmışdır ki, Azərbaycan Avropa Şurasının qonşu regionlarla bağlı siyasətinin gedişatını yaxından izləməkdədir. 2011-ci ildə İstanbulda başlanılan bu siyasət nəticəsində siyasi dialoqun gücləndirilməsi və əməkdaşlıq prioritetləri ilə bağlı razılıqlar vasitəsilə qonşu regionlardakı bir çox ölkələr ilə münasibətlərin dərinləşməsi istiqamətində ciddi uğurlar əldə edilmişdir. Qitələrin kəsişməsində yerləşən bir ölkə olan Azərbaycan bu ölkələrlə tarixi köklərə dayanan güclü ikitərəfli əlaqələrə malikdir və bu səbəbdən bu siyasətin təkmilləşməsinə böyük diqqət göstərməkdə davam edəcəkdir.

Azərbaycan sədrliyi zamanı 2014-cü ilin sentyabrında Bakıda Avropa Şurasının qonşuluq siyasətinə həsr olunmuş yüksək səviyyəli nazirlər konfransı keçirərək Avropa Şurasının səylərini dəstəkləmək niyyətindədir. Bu konfrans Nazirlər Komitəsində son zamanlarda müzakirə mövzusu olmuş qonşuluqdakı bəzi ölkələrlə daha institusional münasibətlərin yaradılması imkanlarını nəzərə alaraq Avropa Şurasının mümkün uzunmüddətli fəaliyyətinin istiqamətlərinin müzakirəsi üçün dəyərli forum rolunu oynaya bilər. Həmçinin bu tədbir mədəniyyətlərarası dialoqla bağlı fəaliyyətlərin qonşuluq siyasətinin ümumi məqsədlərinə əlavə dəyər gətirib-gətirmədiyini müəyyənləşdirməyə imkan yaradacaqdır.

 E.Məmmədyarov demişdir ki, sədrliyimiz zamanı fəaliyyətimizin davamlılığını və əlaqəliliyini təmin etmək məqsədi ilə prioritetlərimizi əlaqələndirilmiş şəkildə inkişaf etdirərək bizdən sonra sədrliyi davam etdirəcək Belçika və Bosniya və Hersoqovina ilə daimi, yaxın əlaqələr yaradılacaqdır.

Azərbaycan bu olduqca əhəmiyyətli müddət ərzində sədrliyin rahat və səmərəli davamı üçün baş katiblik, Parlament Assambleyası, Yerli və Regional Hakimiyyət Orqanları Konqresi və digər qurumlarla yaxından əməkdaşlıq edəcəkdir.

Nazir demişdir: “Ortaq hədəf və məqsədlərimizə çatmaqda maksimum açıqlıq və istək göstərməyə çalışacaq və bu həyati əhəmiyyətli tapşırığın öhdəsindən gəlmək üçün güclü dəstəyinizə arxalanacağıq. Qarşıdakı 6 aylıq müddətdə ölkəmizdə 18 tədbir keçiriləcəkdir. Sizi və dəyərli həmkarlarınızı bu müddət ərzində ölkəmizə səfərə dəvət edirik”.