REGİONLAR
Azad edilmiş ərazilərdə iri infrastruktur layihələrinin həyata keçirilməsi ölkəmizin iqtisadi gücünün göstəricisidir
Füzuli, 8 iyun, Aydın Yavərzadə, AZƏRTAC
Müstəqil Azərbaycan dövləti bütün istiqamətlərdə olduğu kimi, iqtisadiyyat sahəsində də uğurlara imza atmaqdadır. Əldə etdiyimiz uğurlara Prezident İlham Əliyevin həyata keçirdiyi uğurlu siyasət nəticəsində nail olmuşuq. Bəllidir ki, iqtisadiyyatın inkişafında üç mühüm sahənin inkişafı əsasdır: enerji, nəqliyyat və ərzaq təhlükəsizliyi. Bugünkü iqtisadi inkişafın təməlində ulu öndər Heydər Əliyevin müəllifi olduğu neft strategiyası və hazırda bu siyasətin uğurla həyata keçirilməsi dayanır.
Bu sözləri Füzulidən olan gənc iqtisadçı Muxtar Misirxanlı AZƏRTAC-ın bölgə müxbirinə açıqlamasında bildirib.
“Prezident İlham Əliyevin rəhbərliyi ilə regionların sosial-iqtisadi inkişafı Dövlət proqramlarının uğurla icrası paytaxtla yanaşı, bölgələrin də inkişafına şərait yaratdı. Dövlət proqramları çərçivəsində Füzuli rayonunda da iri infrastruktur layihələri gerçəkləşdi. Yolların asfaltlanması, əhalinin enerji təminatı üçün Füzuli SES-in istifadəyə verilməsi, rayonda qazlaşmanın 100 faizə çatdırılması, yeni məktəb, bağça, xəstəxana və digər müxtəlif təyinatlı binalarının tikilməsi rayonumuzun ümumi infrastruktur mənzərəsini zənginləşdirməklə yanaşı, əhalinin işlə təminatında və rifahının yüksəlməsində əsas rol oynayır”, - deyə o qeyd edib.
Muxtar Misirxanlı bildirib ki, dövlətimizin iqtisadi gücünün artması sosial problemləri həll etməklə yanaşı, 44 günlük müharibədə Qələbəmizin də təminatçısı oldu. Bu gün ölkəmizin malik olduğu müstəqillik, iqtisadi cəhətdən heç bir dövlətdən asılı olmamağımız ordumuzun maddi-texniki bazasını gücləndirməyə, arsenalımızı müasir tipli hərbi texnikalarla təchiz etməyə imkan yaratdı. Prezident İlham Əliyevin sözləri ilə desək, əgər iqtisadi gücümüz olmasaydı, bu Qələbəni əldə etmək mümkün olmazdı. Hazırda işğaldan azad edilmiş ərazilərdə dövlət tərəfindən geniş tikinti- quruculuq işləri aparılır, yerli və beynəlxalq əhəmiyyətli layihələr həyata keçirilir. Təbiidir ki, bu işlər böyük maliyyə tələb edir. Müharibənin yeni bitməsinə baxmayaraq, azad edilmiş ərazilərdə iri infrastruktur layihələrinin sürətlə həyata keçirilməsi ölkəmizin iqtisadi gücünün göstəricisidir.
“Sevindirici haldır ki, bu gün rayonumuzun işğaldan azad edilmiş ərazilərində də regional və beynəlxalq əhəmiyyətli infrastruktur layihələri həyata keçirilir”, - deyə gənc iqtisadçı diqqətə çatdırıb ki, hazırda Füzuli Beynəlxalq Hava Limanının tikintisi sürətlə davam edir. Füzuli-Şuşa və Füzuli-Hadrut, Füzuli-Cəbrayıl-Zəngilan avtomobil yollarının, Horadiz-Ağbənd dəmir yolu xəttinin çəkilişi uğurla aparılır. Torpaqlarımızın azad edilməsindən qısa bir müddət keçməsinə baxmayaraq, Prezident İlham Əliyevin bu bölgələrə səfərlər etməsi, aparılacaq tikinti-quruculuq işlərinə nüfuzlu şirkətlərin cəlb olunması, regional xarakterli layihələrin icrasına başlanması azad edilmiş bölgələrimizin gələcək inkişafından, əhalinin rifahının daha da yüksələcəyindən xəbər verir.
O qeyd edib ki, işğaldan azad edilmiş ərazilərdə aparılan işlərə cəlb olunan şirkətlər əsasən qardaş Türkiyə dövlətinə məxsusdur. Çünki Türkiyə və Azərbaycan arasındakı münasibətlər tarixi köklərə bağlı dostluq, qardaşlıq ənənələrinə əsaslanır. Eyni zamanda, Azərbaycan və Türkiyə arasında iqtisadi münasibətlər tükənməz potensiala malikdir. Regionda yeni reallıqların yaranması nəticəsində qardaş Türkiyə ilə əməkdaşlığın iqtisadiyyatın bütün sahələri üzrə, o cümlədən nəqliyyat və infrastruktur sahəsində də yeni perspektivləri meydana çıxır. Hazırda tikintisi sürətlə davam edən Füzuli Beynəlxalq Hava limanının inşasında və rayonumuzun ərazisindən keçən avtomobil yollarının çəkilişində türk şirkətləri yaxından iştirak edirlər. Həmçinin Türkiyənin Sakarya Böyük Şəhər Bələdiyyəsi işğaldan azad olunmuş Füzuli şəhəri ilə qardaşlaşma memorandumu təşəbbüsü ilə çıxış etmişdir.
“Ümumiyyətlə, ölkəmizdə iqtisadi şəffaflığı, müştəri məmnuniyyətini təmin etmək, yaranmış texniki problemləri həll etmək məqsədilə dövlət tərəfindən daim çevik addımlar atılır, sosial paketlər təqdim olunur, əhalinin rifah halının yüksəldilməsi istiqamətində mühüm addımlar atılır. Bu da insanlar tərəfindən yüksək qiymətləndirilir”, - deyə Muxtar Misirxanlı əlavə edib.