MƏDƏNİYYƏT
Azərbaycan Bəstəkarlar İttifaqında “Heydər Əliyev Fondunun 15 illiyi – Ümummilli Liderin ideyaları işığında” mövzusunda elmi-praktik konfrans keçiriləcək
Bakı, 6 may, AZƏRTAC
Mayın 8-də Azərbaycan Bəstəkarlar İttifaqında (ABİ) Heydər Əliyevin anadan olmasının 96-cı ildönümünə və Heydər Əliyev Fondunun fəaliyyətinin 15 illiyinə həsr edilmiş “Heydər Əliyev Fondunun 15 illiyi – Ümummilli Liderin ideyaları işığında” mövzusunda elmi-praktik konfrans keçiriləcək.
AZƏRTAC xəbər verir ki, Azərbaycan Bəstəkarlar İttifaqı görkəmli dövlət xadimi, dünyamiqyaslı siyasi xadim, Azərbaycan xalqının ümummilli lideri Heydər Əliyevin xatirəsinə böyük ehtiramla yanaşır. Bəstəkarlar İttifaqının Azərbaycan musiqisinin inkişafına və təbliğinə yönəlmiş yorulmaz fəaliyyəti xalqımızın musiqi mədəniyyəti tarixində ən parlaq səhifələrdən biridir.
Hər il may və dekabr ayılarında Bəstəkarlar İttifaqında Ulu Öndərin adı ilə bağlı musiqi tədbirləri keçirilir. Heydər Əliyevin nurlu obrazı bəstəkarları yeni əsərlər yaratmağa, sənətşünasları Ulu Öndərin şəxsiyyətinin və ideyalarının milli musiqi sənətinin inkişafı üçün əhəmiyyətinin açıqlanmasına həsr edilmiş yeni elmi araşdırmalara ruhlandırır.
Heydər Əliyevin Azərbaycan musiqi mədəniyyətinin inkişafı barədə dəyərli ideyaları onun adını daşıyan fondun fəaliyyətinin əsasını təşkil edir. 2004-cü ildə yaradılmış və ölkəmizin birinci xanımı, Azərbaycan Respublikasının Birinci vitse-prezidenti, UNESCO-nun və ISESCO-nun xoşməramlı səfiri Mehriban Əliyevanın başçılıq etdiyi Heydər Əliyev Fondu milli incəsənətin ən yaxşı nümunələrinin qorunub saxlanması, onun nailiyyətlərinin artırılması və dünya miqyasında təbliği işində əsası Ümummilli Lider tərəfindən qoyulmuş ənənələri ləyaqətlə davam etdirir.
Azərbaycan Bəstəkarlar İttifaqı haqlı olaraq qürur duyur ki, Heydər Əliyev Fondunun bütün musiqi layihələrində onun sədaqətli köməkçisi olub. Bəstəkarlar İttifaqının üzvləri bu layihələrdə bilavasitə və fəal iştirak edirlər.
“Heydər Əliyev Fondunun 15 illiyi – Ümummilli Liderin ideyaları işığında” mövzusunda elmi-praktik konfrans bunu bir daha sübut edəcək. Konfransı giriş sözü ilə yaradıcılıq ittifaqının sədri Firəngiz Əlizadə açacaq. O, Heydər Əliyev Fondunun əhəmiyyəti, habelə Fondun layihələrində şəxsən özünün iştirakı barədə məlumat verəcək. Bəstəkarlar İttifaqının katibi, Əməkdar incəsənət xadimi Sərdar Fərəcov (“Üzeyir dünyası” layihəsi haqqında), Əməkdar incəsənət xadimi, sənətşünaslıq üzrə fəlsəfə doktoru Sürəyya Ağayeva (“Muğam ensiklopediyası” layihəsində iş (rus dilində)), sənətşünaslıq doktoru, professor Cəmilə Həsənova (“Muğam dünyası” beynəlxalq musiqi festivalı layihəsi haqqında), sənətşünaslıq üzrə fəlsəfə doktoru Səadət Təhmirazqızı (“Fikrət zirvəsi” layihəsi haqqında) maraqlı məruzələrlə çıxış edəcəklər. Bu məruzələrdə Bəstəkarlar İttifaqı ilə Fondun fəaliyyəti arasında sıx əlaqə öz əksini tapacaq. Konfransda həmçinin, Heydər Əliyev Fondunun qlobal musiqi layihələrində Azərbaycan Bəstəkarlar İttifaqının iştirakını əks etdirən videoçarx təqdim olunacaq.