İQTİSADİYYAT


Azərbaycan-İtaliya əlaqələri yüksək səviyyədədir

Roma, 18 fevral, AZƏRTAC

İtaliyadan Azərbaycana birbaşa xətt həmişə açıqdır. Mühüm enerji resurslarına və təbii sərvətlərə malik ölkəmiz regionda lider mövqeyə malik olmaqla yanaşı, həm də əsas logistik xətlərin keçdiyi məkandır.

Azərbaycan bu gün qərbin regiondakı ən yaxşı tərəfdaşıdır və bu istiqamətdə də münasibətləri gündən-günə dərinləşdirmək üçün yeni nailiyyətlərə imza atır. Hazırda respublikamız iqtisadiyyatın şaxələndirilməsi prosesindədir və bu da onu yalnız enerji baxımından yox, bütün sahələr, həmçinin həm də qlobal informasiya texnologiyaları və aqrobiznes üzrə cəlbedici edir.

Azərbaycan-İtaliya tərəfdaşlığı, xüsusilə də enerji sahəsindəki əməkdaşlıq strateji xarakter daşıyır. Bu əməkdaşlıq ən yüksək səviyyədə həyata keçirilən ikitərəfli səfərlərlə daha da möhkəmlənib. 2015-ci ildə Prezident İlham Əliyevin İtaliyaya, 2018-ci ildə İtaliya Prezidenti Sercio Mattarellanın ölkəmizə səfərləri baş tutub. Azərbaycanın Birinci vitse-prezidenti Mehriban Əliyevanın İtaliyaya səfərlərinin mühüm rolu var.

Hazırda ölkəmizdə çoxsaylı italyan şirkətləri fəaliyyət göstərir. Azərbaycanda müxtəlif sahələrdə 113 İtaliya şirkəti qeydiyyata alınıb. Bunların arasında “Saipem”, “MaireTecnimont”, “Technip” kimilərinin adlarını çəkmək olar. Təkcə 2018-2019-cu illərdə italyan şirkətləri ilə ümumi dəyəri 1 milyard avrodan çox olan müqavilələr imzalanıb. 2018-ci ildə ölkələrimiz arasında ticarət dövriyyəsi 9,7 faiz artıb. Bu tendensiya 2019-cu ilin 9 ayında da davam edib və 10,5 faizlik artım müşahidə olunub. İtaliya tərəfindən Azərbaycan iqtisadiyyatına 770 milyon dollar, Azərbaycandan isə İtaliyaya 1,7 milyard dollar investisiya yatırılıb. İtaliya şirkətləri də Azərbaycanın xarici ölkələrdə həyata keçirdiyi layihələrdə, məsələn Cənub Qaz Dəhlizi layihəsində iştirak edir. Bu layihədə İtaliya şirkətlərinin 7 milyard avrodan çox payı var.

Hazırda İtaliya şirkətləri Azərbaycanda əsasən enerji, ətraf mühit, infrastruktur, neft-kimya, İKT kimi sahələr üzrə tərəfdaşlıq sazişlərinə malikdir. Lakin italiyan sərmayədarlar bununla kifayətlənməyib digər - nəqliyyat, bərpaolunan enerji, kənd təsərrüfatı, yüksək texnologiyalar və əczaçılıqda da işbirliyində maraqlıdırlar. Aqrobiznes, neft-kimya və yüksək texnoloji parklarda şirkətlər üçün bir çox təşviq mövcuddur.

Enerji ilə yanaşı, Azərbaycan və İtaliya iqtisadiyyatlarının bir-birini tamamladığını vurğulamaq üçün konkret misallardan birini çəkmək olar. Azərbaycan İtaliya üçün fındığın əsas tədarükçülərindən biridir. Habelə son illərdə Dövlət Neft Fondunun (ARDNF) İtaliyaya yatırdığı investisiyaların əhəmiyyətini də vurğulamaq lazımdır.

İki ölkə arasındakı əlaqələrin son uğurlu göstəricilərindən biri də bu ilin yanvarında Romada keçirilmiş Azərbaycan Respublikası və İtaliya Respublikası arasında iqtisadi əməkdaşlıq üzrə Hökumətlərarası Komissiyanın 5-ci iclasıdır. Bu iclasda hər iki ölkə üçün çox əhəmiyyətli bir sıra görüşlər keçirilib, razılıqlar əldə olunub. İclasın nəticələri barədə yerli kanallara müsahibə verən Azərbaycanın Energetika naziri Pərviz Şahbazov TAP layihəsi ilə bağlı mövzuya da toxunaraq işlərin 2020-ci ilin sonuna doğru yekunlaşacağını deyib. O bildirib ki, Cənub Qaz Dəhlizinin 4 komponentindən biri olan TAP boru kəməri vasitəsilə İtaliyanın cənubundakı ekoloji vəziyyət də yaxşılaşacaq, karbonizasiya problemi azalacaq.

Azərbaycan-İtaliya arasındakı yüksək siyasi dialoq həm indi, həm də gələcək illərdə əlaqələrin daha da şaxələnməsinə, beynəlxalq əhəmiyyətli məsələlərdə səmimi tərəfdaşlığa xidmət edəcək.

 

Aygün Əliyeva

AZƏRTAC-ın xüsusi müxbiri

Roma

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.