SİYASƏT


Azərbaycan Prezidentinin təşəbbüs və təkliflərinin BMT tərəfindən dəstəklənməsi ölkəmizə olan böyük hörmət və etimadın nümunəsidir

Bakı, 5 dekabr, AZƏRTAC

Azərbaycanın beynəlxalq münasibətlər sistemində yeri və rolu daim artmaqdadır. Bu, hər şeydən əvvəl Prezident İlham Əliyevin həyata keçirdiyi strateji xarici siyasət kursu və milli maraqlar ilə öz tərəfdaşlarının maraqlarını uzlaşdırma bacarığı ilə bağlıdır. Azərbaycanın fəal və təşəbbüskar xarici siyasəti onun beynəlxalq münasibətlərdə nüfuzunu müəyyənləşdirməklə yanaşı, həm də iştirakçılığını təmin edir. Nəticədə hazırda Azərbaycan bir sıra beynəlxalq və regional təşkilatlara sədrlik edir. Bunların sırasında Türkdilli Dövlətlərin Əməkdaşlıq Şurası və Qoşulmama Hərəkatı da var. Biz hər iki təşkilatın 44 günlük İkinci Qarabağ müharibəsində Azərbaycanı dəstəklədiyinin şahidi olduq. Hətta Qoşulmama Hərəkatına bəzi üzv ölkələrin dəstəyi BMT Təhlükəsizlik Şurasının daimi üzvlərinin bizim əleyhimizə qərar qəbul etməsinin qarşısını aldı. Türk Şurasının göstərdiyi dəstək isə müəyyən mənada Kollektiv Təhlükəsizlik Müqaviləsi Təşkilatının Ermənistana mümkün dəstək verə bilmə ehtimalını əngəllədi. Çünki Türk Şurasına üzv olan iki ölkə, həm də KTMT-nin üzvüdür. Hazırda isə dünyada paralel və yaxud səssiz müharibə də getməkdədir. Bu, COVID-19 pandemiyasına qarşı müharibədir.

Bu fikirləri AZƏRTAC-a açıqlamasında Milli Məclisin deputatı, “Yeni Azərbaycan” qəzetinin baş redaktoru Hikmət Babaoğlu bildirib.

H.Babaoğlu qeyd edib ki, Azərbaycan Qoşulmama Hərəkatının Sədri kimi ümumbəşəri təhdid yaradan bu pandemiyaya qarşı mübarizədə səfərbərliyi təmin etmək üçün təşəbbüslə çıxış edərək məsələni BMT-nin gündəminə gətirdi və bu təşəbbüs yüksək dəyərləndirildi. Məğlub edilmiş Ermənistandan başqa, BMT-yə üzv olan dövlətlərin əksəriyyəti bu təşəbbüsü dəstəklədi və dünyanın ən böyük beynəlxalq təşkilatında bunla bağlı xüsusi sessiya çağırıldı. “Dekabrın 3-4-də BMT Baş Assambleyasının Prezidenti Volkan Bozkırın sədrliyi ilə keçirilən 31-ci xüsusi sessiyada dünya liderləri, BMT rəsmiləri və ekspertlər COVID-19 pandemiyasının əsas aspektlərini, peyvəndlərin paylanması və sosial-iqtisadi məsələləri müzakirə etdilər. Bu, əvvəlki sessiyada müzakirə olunan COVID-ə qarşı mübarizə və hazırlanacaq peyvəndlərin hamı üçün əlçatanlığının təmin olunması məsələsindən sonra indiki real vəziyyətin müzakirə olunmasıdır. Bu, Azərbaycan Prezidentinin təşəbbüs və təkliflərinin BMT tərəfindən dəstəklənməsi və onun nüfuzunun qəbul edilməsi deməkdir”, - deyə H.Babaoğlu bildirib.

Deputat diqqətə çatdırıb ki, Azərbaycan Prezidenti İlham Əliyev Qoşulmama Hərəkatının Sədri qismində xüsusi sessiyanın açılış mərasimində ali heyətin tərkibində çıxış etdi və 120 ölkənin pandemiya ilə bağlı əsas baxışlarını dünya ictimaiyyətinə çatdırdı. Bu, özü bir göstəricidir və Azərbaycan Prezidentinə olan münasibətdir. Bundan başqa, 155 iştirakçı ölkə arasında Prezident İlham Əliyevin dövlət başçısı kimi 7-ci sırada çıxış etməsi, heç şübhəsiz, Azərbaycana dünyada olan böyük hörmət və etimadın nümunəsidir. Eyni zamanda, bu, Prezident İlham Əliyevin şəxsi nüfuzunun beynəlxalq aləmdə göstəricisidir.

Onun sözlərinə görə, bütün bunlarla yanaşı, istənilən beynəlxalq tribunadan Azərbaycan Prezidentinin ölkəmizin maraqlarını və artıq məğlub edilmiş işğalçı Ermənistanda hökm sürən despotizmi, diktaturanı, faşizmi dilə gətirməsi və onu ifşa etməsi də artıq ənənə halını alıb ki, bu da həqiqətlərin dünyaya çatdırılmasında özünəməxsus rol oynayır. Ən mühüm məsələlərdən bir də odur ki, BMT Baş Assambleyasının 31-ci Xüsusi Sessiyasında Azərbaycan Prezidenti qalib dövlətin Müzəffər Ali Baş Komandanı kimi çıxış etdi. Dövlətimizin başçısı BMT Təhlükəsizlik Şurasının 1993-cü ildə qəbul etdiyi 4 qətnaməni icra etmiş dövlət və beynəlxalq hüquqda presedent yaratmış lider kimi öz sözlərini dedi. Bu isə yeni dünya nizamında Azərbaycanın yerini və rolunu təyin edən ən əsas amillərdən biridir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.