CƏMİYYƏT
Azərbaycan Tibb Universitetində “Praktik ümumi tibbi mikrobiologiya” kursu keçirilib
Bakı, 16 fevral, AZƏRTAC
Azərbaycan Tibb Universitetinin Tədris Terapevtik Klinikasının Mərkəzi Laboratoriyasında “Praktik ümumi tibbi mikrobiologiya” kursu keçirilib.
Universitetin mətbuat xidmətindən AZƏRTAC-a bildiriblər ki, kurs laboratoriyanın müdiri İsgəndər Karaltı və keyfiyyət üzrə menecer Sevinc Qəmbərovanın birgə təşəbbüsü ilə təşkil edilib.
Kursda ümumi vasitələr, alətlər və avadanlıqlarla tanışlıq, qidalı mühitlərin hazırlanması, inokulyasiya, pasajetmə metodları, mikroorqanizmlərin təsnifatı, boyama və stok metodları, identifikasiyada istifadə edilən sürətli testlər, biokimyəvi identifikasiya testləri, nümunəalma və nümunədən imtina kriteriyaları mövzuları ətrafında mühazirələr dinlənilib və praktik iş aparılıb.