Bakı, 28 yanvar, AZƏRTAC 

Azərbaycan Tibb Universitetinin hərbi tibb fakültəsinə hərbi feldşer işi ixtisası üzrə 2020/2021-ci tədris ili üçün qəbul qaydaları açıqlanıb.

Müdafiə Nazirliyinin mətbuat xidmətindən AZƏRTAC-a bildiriblər ki, hərbi feldşer işi ixtisası üzrə tədris Azərbaycan dilində iki il olmaqla əyani aparılır.

Fakültəyə cari ildə ümumtəhsil müəssisələrinin tam orta təhsil səviyyəsini bitirmiş, sentyabrın 15-dək 17 yaşı tamam olan və 19 yaşı tamam olmayan, habelə 23 yaşınadək hərbi vəzifəli Azərbaycan Respublikasının kişi cinsli vətəndaşları qəbul edilirlər.

Hərbi feldşer işi ixtisası üzrə fakültəyə qəbul olmaq istəyən namizədlər 2020-ci il aprelin 1-dən 30-dək ərizə ilə fakültə rəisinə müraciət etməlidirlər. Müraciət üçün tələb olunan sənədlərin siyahısı Müdafiə Nazirliyinin saytında yerləşdirilib.

Namizədlər Silahlı Qüvvələrin Baş Klinik Hospitalında hərbi həkim komissiyasından keçməlidirlər. Hərbi həkim komissiyasından keçmənin tarixi sənəd qəbulu zamanı qəbul komissiyası tərəfindən bildirilir.

Naxçıvan Muxtar Respublikasında yaşayanlar hərbi həkim komissiyasından Heydər Əliyev adına Hərbi Liseydə (Naxçıvan şəhəri) keçməlidirlər.

Müraciət edən şəxslərin məhkumluğu barədə arayışın alınması fakültə rəisinin sorğusuna əsasən Müdafiə Nazirliyinin müvafiq idarəsi tərəfindən həyata keçirilir.

Müvafiq yoxlamalardan müvəffəqiyyətlə keçən namizədlərin siyahısı qəbul imtahanında iştirak etmək üçün Dövlət İmtahan Mərkəzinə göndərilir.

Hərbi feldşer işi ixtisası üzrə hərbi tibb fakültəsinə qəbul üçün keçiriləcək test imtahanına hərbi həkim komissiyasından müvəffəqiyyətlə keçmiş namizədlər buraxılır.

Dövlət İmtahan Mərkəzi tərəfindən mərkəzləşdirilmiş qaydada test üsulu ilə Azərbaycan dilində keçirilən qəbul imtahanları Azərbaycan dili və kimya fənləri üzrə aparılır.

Bu ixtisas üzrə hərbi tibb fakültəsinə qəbul olan şəxslər təhsil müddətində bütün təminat növləri ilə təmin olunur və ayda 245 manat məbləğində müavinət alırlar.

Sənədlər Azərbaycan Tibb Universitetinin hərbi tibb fakültəsində qəbul olunur (ünvan: Bakı şəhəri, Ceyhun Səlimov küçəsi, 3. Silahlı Qüvvələrin Baş Klinik Hospitalının ərazisi. Əlaqə telefonu: 431-39-73).

Naxçıvan Muxtar Respublikasında yaşayanlar sənədlərini Heydər Əliyev adına Hərbi Liseyə (Naxçıvan şəhəri) təqdim edirlər (əlaqə telefonu: 544-00-15, 544-00-16).

Qəbul imtahanının tarixi Dövlət İmtahan Mərkəzi tərəfindən elan edildikdən sonra əlavə məlumat veriləcək.