REGİONLAR


Azərbaycan gənclərinin yüksək intellektli aparıcı qüvvə kimi formalaşmasında dövlət gənclər siyasətinin mühüm rolu var

Naxçıvan, 1 dekabr, AZƏRTAC

Naxçıvan şəhərinin 2018-ci ildə ölkəmizin Gənclər Paytaxtı seçilməsi ilə əlaqədar Azərbaycan Respublikasının və Naxçıvan Muxtar Respublikasının Gənclər fondlarının, Naxçıvan Muxtar Respublikası Gənclər və İdman Nazirliyinin birgə təşkilatçılığı ilə Azərbaycanın regionlarındakı fəal gənclərdən və gənclər təşkilatlarının üzvlərindən ibarət 100 nəfər gəncin Naxçıvan Muxtar Respublikasına ekskursiyası təşkil olunub.

AZƏRTAC-ın Naxçıvan bürosu xəbər verir ki, səfərin ilk günündə qonaqlar ümummilli lider Heydər Əliyevin Naxçıvan şəhərinin baş meydanında əzəmətlə ucalan abidəsini ziyarət edib, Heydər Əliyev Muzeyi ilə tanış olublar. Daha sonra onlar “Xan Sarayı” Tarix-Memarlıq, Möminə Xatun və Açıq Səma Altında Muzey Kompleksinə ekskursiya ediblər. “Əshabi-Kəhf” Dini Mədəni Abidə Kompleksi ilə tanışlıqdan sonra isə “Naxçıvan” Universitetində “Naxçıvan şəhəri Gənclər Paytaxtıdır” mövzusunda tədbir keçirilib.

Tədbirdə Naxçıvan Muxtar Respublikasının Gənclər Fondunun icraçı direktoru Cəbi Quliyev çıxış edərək bildirib ki, ümummilli lider Heydər Əliyevin əsasını qoyduğu dövlət gənclər siyasəti ölkəmizdə olduğu kimi, muxtar respublikamızda da uğurla həyata keçirilir. Son illər gənclərimizin muxtar respublikamızın ictimai-siyasi, iqtisadi və mədəni həyatında fəal iştirakı, sosial problemlərinin həlli, gənclər siyasətinin bütün istiqamətləri üzrə müvafiq dövlət proqramlarının uğurla həyata keçirilməsi, gənc istedadlara dövlət qayğısının artırılması, elm, təhsil, iqtisadiyyat, mədəniyyət, dövlət idarəçiliyi və digər sahələrdə gənc kadrların irəli çəkilməsi və xidmətlərinin qiymətləndirilməsi bütövlükdə gənclər siyasətinin həyata keçirilməsi istiqamətində görülən tədbirlərdəndir.

Muxtar respublikada gənclər siyasəti ilə bağlı elm, təhsil, mədəniyyət və digər sosial sahələrə yönəlmiş çoxsaylı əhəmiyyətli tədbirlərdən danışan Cəbi Quliyev qeyd edib ki, gənclərin xüsusi layihələr vasitəsilə vahid bir məkanda toplanması, intellektual inkişafı, asudə vaxtlarının səmərəli təşkili Gənclər Fondunun əsas prioritet istiqamətlərindəndir.

Tədbirdə çıxış edən Naxçıvan Muxtar Respublikasının gənclər və idman naziri Azad Cabbarov bildirib ki, Azərbaycan gənclərinin günümüzün müasir, inkişaf etmiş, yüksək intellektli aparıcı qüvvə kimi formalaşmasında dövlətimizin apardığı gənclər siyasətinin mühüm rolu vardır. Prezidentin həyata keçirdiyi dövlət gənclər siyasəti nəticəsində gənclərimiz cəmiyyətimizin inkişafında fəal sosial təbəqəyə çevriliblər. Son illər bu sahədə görülən işlərin, həyata keçirilən tədbirlərin nəticəsidir ki, bu gün Azərbaycan gəncləri öz intellektual səviyyələri, bilik və bacarıqları ilə nəinki regionda, ümumiyyətlə, dünyada tanınır və qəbul olunurlar. Muxtar respublikada gənclər siyasətinin bütün istiqamətləri üzrə müvafiq dövlət proqramlarının səmərəli həyata keçirilməsi, gənc istedadlara dövlət qayğısının artırılması, bütövlükdə dövlət gənclər siyasətinin həyata keçirilməsi istiqamətində atılan mühüm addımlardır.

Azad Cabbarov qeyd edib ki, Naxçıvan şəhərinin 2018-ci ildə ölkəmizin Gənclər Paytaxtı seçilməsi, eyni zamanda, İslam Mədəniyyətinin Paytaxtı elan olunması ilə əlaqədar Naxçıvan şəhərində keçirilən bir sıra ölkə və beynəlxalq səviyyəli tədbirlərdə də gənclərin vətənpərvərlik tərbiyəsinin təbliği, onların yaradıcılıq potensialının üzə çıxarılması və intellektual səviyyəsinin yüksəldilməsi diqqət mərkəzində saxlanılıb.

Azərbaycan Respublikasının Gənclər Fondunun icraçı direktoru Fərid Cəfərov isə çıxışında qeyd edib ki, ölkəmizdə həyata keçirilən inkişaf siyasəti bütün sahələrdə çoxsaylı uğurların əldə edilməsinə səbəb olub. Bu uğurlardan ölkəmizin gənclərinə də pay düşüb. Vətənpərvər, sağlam düşüncəli yeni nəslin formalaşmasına, gənclərin ictimai fəallığının artırılmasına və onların ideyalarının, təşəbbüslərinin dəstəklənməsinə xidmət edən Gənclər Fondu daim gənclərə dəstək olur, onlar tərəfindən hazırlanmış layihələri uğurla həyata keçirir.

Tədbirdə Naxçıvan Dövlət Universitetinin tələbəsi Hüseyn İmanovun və “ASAN könüllülər” İctimai Birliyinin sədri Səbinə Cabbarovanın da çıxışları olub.

Gənclər Naxçıvan televiziyası tərəfindən hazırlanan “Naxçıvan şəhəri Gənclər Paytaxtı” filminə baxıblar.

Tədbirdən sonra qonaqlar Duzdağ Fizioterapiya Mərkəzi ilə tanış olublar.

Ölkəmizin regionlarından olan gənclərin muxtar respublikamıza ekskursiyası davam edir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.