Bakı, 11 iyun (AZƏRTAC). Malayziyanın paytaxtı Kuala Lumpurda 14-cü Malayziya Beynəlxalq Qida və İçki Məhsulları Sərgisi (MIFB) keçirilmişdir. 

Malayziya Kənd Təsərrüfatı Nazirliyinin təşkilat etdiyi tədbirdə 20-dən çox ölkənin 350-yə yaxın qida məhsulları istehsal edən şirkəti iştirak etmişdir.

ABŞ, Çin, Yaponiya, Koreya Respublikası, Fransa, Polşa, Belçika, Avstraliya və digər ölkələrin təmsil olunduqları bu beynəlxalq sərgidə Azərbaycanın Malayziyadakı səfirliyi ölkəmizin mədəniyyətini və iqtisadi potensialını təbliğ edən pavilyon hazırlamışdır.

Pavilyonda Azərbaycanın mədəniyyətini, turizm potensialını, iqtisadi imkanlarını təbliğ edən materiallar, şəkillər, kitablar, milli geyim nümunələri, habelə nar şirələri, qoz, qızıl gül, tut və zoğal mürəbbələri, müxtəlif növ içki məhsulları nümayiş olunmuşdur. Bundan əlavə, səfirlik əməkdaşlarının ailə üzvləri tərəfindən hazırlanmış milli mətbəximizin əvəzedilməz şirniyyat növləri - şəkərbura, paxlava, Bakı qurabiyəsi, Ordubad bükməsi, kətə, şəkər çörək, umac halvası, sucuq, miyanpur, qozlu kökə, nabat və şirnilər, eləcə də meyvə quruları, kəklikotu və solmaz çiçəyi çayları sərgidə böyük marağa səbəb olmuşdur.

Üç gün ərzində Azərbaycan pavilyonunu ziyarət edənlərə ölkəmizin iqtisadi inkişafı, ixrac imkanları, turizm potensialı, mədəniyyəti haqqında ətraflı məlumat verilmiş və təbliğat materialları təqdim edilmişdir. Milli təamları və içkiləri dadan bir sıra sərgi iştirakları qida və içki məhsullarımızın təmsil etdikləri şirkətlər tərəfindən satışının təşkil olunması ilə bağlı işgüzar təkliflər etmişlər.

On dördüncü Malayziya Beynəlxalq Qida və İçki Məhsulları Sərgisini 23 min nəfər ziyarət etmiş, 50 milyon ABŞ dolları dəyərində satış müqavilələri bağlanmışdır.