Azərbaycan nümayəndə heyəti İHİF-nin Baş Assambleyasında iştirak edib

Bakı, 13 mart, AZƏRTAC

Azərbaycan Milli Olimpiya Komitəsinin (MOK) və İslam Həmrəyliyi İdman Federasiyalarının (İHİF) vitse-prezidenti Çingiz Hüseynzadə, MOK-un baş katibi Azər Əliyev və Xarici əlaqələr şöbəsinin direktoru Anar Bağırov İHİF-nin Səudiyyə Ərəbistanının Ciddə şəhərində keçirilən növbədənkənar Baş Assambleyasında iştirak ediblər.

MOK-dan AZƏRTAC-a bildiriblər ki, tədbirdə İHİF-nin prezidenti Şahzadə Abdulaziz Bin Turki Al-Faisal Al Saud və İHİF-nin rəsmi nümayəndələri çıxış ediblər.

İHİF-nin martın 13-də keçirilən Baş Assambleyasında 2023-cü ilin oktyabr ayında Səudiyyə Ərəbistanında təşkil olunacaq Dünya Döyüş Oyunları ilə bağlı müzakirələr aparılıb.

Qeyd edək ki, İHİF-nin vitse-prezidenti Ç.Hüseynzadə, həmçinin İcraiyyə Komitəsinin iclasında iştirak edib, eləcə də toplantı çərçivəsində İHİF-nin prezidenti Şahzadə Abdulaziz Bin Turki Al-Faisal Al Saud ilə görüşüb.