Bakı, 13 aprel, AZƏRTAC 

Bakıda keçirilmiş Ümumrusiya Dövlət Kinematoqrafiya İnstitutu Günləri maraqlı tədbirlərlə yadda qalıb. “Dünyanın ilk kino məktəbinin 100 illiyi” layihəsi çərçivəsində S.A.Qerasimov adına Ümumrusiya Dövlət Kinematoqrafiya İnstitutunun (ÜDKİ) rektoru, Mədəniyyət və İncəsənət Tədris Müəssisələri Assosiasiyasının prezidenti, Rusiyanın Əməkdar mədəniyyət işçisi, Rusiya Təhsil Akademiyasının akademiki Vladimir Malışevin rəhbərlik etdiyi professor, müəllim və tələbələrdən ibarət 40 nəfərlik nümayəndə heyəti ölkəmizdə səfərdə olub.

Azərbaycan Dövlət Mədəniyyət və İncəsənət Universitetindən AZƏRTAC-a bildirilib ki, əvvəlcə bu ali təhsil müəssisəsinə gələn qonaqları ali məktəbin kollektivi Azərbaycanın adət-ənənələrinə uyğun olaraq milli musiqinin sədaları altında xonçalarla qarşılayıb. Sonra tədbirin açılış mərasimi və mətbuat konfransı keçirilib. Mərasimdə çıxış edən rektor, professor Ceyran Mahmudova dünyanın ilk kino məktəbinin nümayəndə heyətini ADMİU-da qarşılamaqdan məmnunluğunu bildirib, onlara universitetin tarixi, fəaliyyəti və tədris prosesi barədə məlumat verib. Tədbirdə iki ali təhsil müəssisəsi arasında təcrübə mübadiləsini, müxtəlif sahələrdə əlaqələri nəzərdə tutan əməkdaşlıq müqaviləsi imzalanıb. Müqaviləyə əsasən, yaxın gələcəkdə ali məktəblər arasında tələbə və müəllim mübadiləsi, yay məktəblərinin, ustad dərslərinin, seminar və treninqlərin keçirilməsi nəzərdə tutulub.

Səfər çərçivəsində iki ustad dərsi keçirilib. Universitetin Vernisaj zalında ÜDKİ-nin rəssamlıq fakültəsinin müəllimlərinin və tələbələrinin işlərindən ibarət sərgi açılıb. Rusiyanın Əməkdar rəssamı Valeri Arxipovun rəhbərliyi ilə “Kino istehsalatında rəssam işinin spesifikası” mövzusunda təşkil olunan ustad dərsində ADMİU-nun rəssamlıq fakültəsinin tələbələri iştirak ediblər. ÜDKİ-nin animasiya və multimedia fakültəsinin dekanı, “Multimedia rejissurası” emalatxanasının rəhbəri, dosent Yelena Yaremenko tərəfindən keçirilən “Animasiya texnologiyaları və multimedianın yeni imkanları” ustad dərsində isə ADMİU-nun kino və televiziya fakültəsinin tələbələri iştirak ediblər.

Sonra hər iki ali məktəbin tələbələri ilə birgə “Səhnə hərəkətinin əsasları” adlı məşğələ keçirilib. Aktyor sənəti kafedrasının professoru Aydar Zakirov və Xalq artisti Pərviz Məmmədrzayevin rəhbərliyi ilə keçirilən məşğələdə rus və azərbaycanlı tələbələr birlikdə səhnə hərəkətinə dair təmrinlər, çalışmalar yerinə yetirib, təcrübələrini bölüşüblər.

Daha sonra ADMİU-nun kiçik zalında ÜDKİ-nin ADMİU-dakı kinoklubunun açılışı olub. ÜDKİ-nin yaradıcılıq emalatxanasının rəhbəri, professor Kirill Razloqovun rəhbərliyi ilə keçirilən tədbirdə Azərbaycanın Əməkdar incəsənət xadimi, kinorejissor Ayaz Salayev moskvalı həmkarını müşayiət edib. Sonra universitetin böyük səhnəsində ÜDKİ-nin və ADMİU-nun aktyor sənəti fakültələrinin tələbələrinin birgə hazırladığı “İlham” adlı klass-konsert təşkil olunub.

Günün sonuncu tədbiri Rusiyanın Xalq artisti, SSRİ Dövlət Mükafatı və “Oskar” mükafatı laureatı Vladimir Menşovun yaradıcılıq gecəsi keçirilib. V.Menşov pərəstişkarları ilə görüşdə filmlərindən, yeni yaradıcılıq planlarından danışıb, doğulub boya-başa çatdığı Bakı haqqında xatirələrini bölüşüb.

Növbəti gün metodik məsələlər və təcrübə mübadiləsinə həsr olunan dəyirmi masa ilə başlayıb. ADMİU-nun tədris işləri üzrə prorektoru Validə Məmmədovanın moderatorluğu ilə keçirilən dəyirmi masada ÜDKİ-dən V.Arxipov, A.Zakirov, İ.Klebanov, K.Kuznetsova, V.Menşov, K.Razloqov, Y.Rusinova, V.Xotinenko, T.Yakovleva və Y.Yaremenko, ADMİU-dan isə R.Quliyev, O.Mir-Qasım, A.Mir-Qasım, C.Quliyev, A.Salayev, H.Ömərova, S.Mikayılova, S.Kərimova, A.Əziz, İ.Ağayev və M.Məmmədli iştirak ediblər.

Sonra hər iki ali məktəbin tələbələrinin “Aktyor rejissorun əsas ifadə vasitəsi kimi. Kastinq problemləri” mövzusunda birgə məşğələsi keçirilib. Məşğələni ÜDKİ-nin aktyor sənəti kafedrasının müdiri, səhnə danışığı kafedrasının dosenti, rejissor Kseniya Kuznetsova aparıb.

ADMİU-nun kiçik zalında “Kinooperator sənətində işıq” ustad dərsi keçirilib. ÜDKİ-də yaradıcılıq emalatxanasının rəhbəri, Rusiyanın Xalq artisti İqor Klebanovun keçdiyi ustad dərsini kino və televiziya fakültəsinin tələbələri dinləyiblər.

Nizami Kino Mərkəzində “Müasir texnologiyaların kino prosesinə təsiri” mövzusunda ustad dərsini isə ÜDKİ-nin bədii film rejissurası kafedrasının müdiri, Rusiyanın Xalq artisti Vladimir Xotinenko və yaradıcılıq emalatxanasının rəhbəri, Rusiya Kinematoqraflar İttifaqının üzvü Tatyana Yakovleva keçib.

Günün sonuncu tədbiri isə Azərbaycan Dövlət Gənc Tamaşaçılar Teatrında nümayiş olunan ÜDKİ-nin “Beş axşam” tamaşası olub. Rusiyanın Xalq artisti Vladimir Fokinin A.M.Volodinin əsəri əsasında quruluş verdiyi tamaşada moskvalı tələbələr Marina Lebedova (Tamara), Kirill Novışev (İlyin), Yevgeni Nevar (Slava), İrina Rura (Katya), Anastasiya Şukeviç (Zoya), Adam Nexay (Timofeev) çıxış ediblər.

Növbəti gündə qonaqlar ADMİU-nun Mədəniyyət Nazirliyi ilə birgə təşkil etdiyi mədəni proqram çərçivəsində “Atəşgah məbədi” Dövlət Tarix-Memarlıq Qoruğunda, Xalça Muzeyində və şəhərin digər tarixi məkanlarında olublar. ÜDKİ-nin nümayəndələri, həmçinin S.Vurğun adına Azərbaycan Dövlət Akademik Rus Dram Teatrında nümayiş olunan “Səmavi” tamaşasına baxıblar. Müasir Rusiya dramaturqları A.Şipanov və A.Abrosimovun “Səmavi və ya onun həyatından dörd saat” pyesi əsasında hazırlanan monotamaşanın quruluşçu rejissoru ADMİU-nun tələbəsi Raulya Türkkandır. Tamaşada yeganə rolu ADMİU-nun tələbəsi Milana Sokolenko ifa edib.

Beləliklə, maraqlı görüşlərlə, yeni tanışlıqlarla zəngin olan Azərbaycanda Ümumrusiya Dövlət Kinematoqrafiya İnstitutu Günləri başa çatıb. Qonaqlar Azərbaycandan gözəl təəssürat və xoş xatirələrlə ayrılıblar.