İQTİSADİYYAT
Azərbaycanda dənizçilik sahəsində qanunvericiliyin təkmilləşdirilməsi üçün layihələr hazırlanıb
Bakı, 13 sentyabr, AZƏRTAC
Azərbaycanda dənizçilik sahəsində qanunvericiliyin təkmilləşdirilməsi üçün layihələr hazırlanıb.
Azərbaycan Dövlət Dəniz Administrasiyasının mətbuat xidmətindən AZƏRTAC-a bildirilib ki, bu barədə Böyük Britaniyada səfərdə olan Azərbaycan Respublikasının nümayəndə heyəti BMT–nin nüfuzlu orqanı olan Beynəlxalq Dəniz Təşkilatının (IMO) paytaxt Londonda yerləşən baş qərargahında təşkilatın baş katibinin köməkçisi və üzv dövlətlərin Auditi və implementasiya üzrə dəstək şöbəsinin direktoru Laurens Barşyu ilə görüşdə deyib.
Laurens Barşyu Beynəlxalq Dəniz Təşkilatının Audit Ekspert Qrupunun bu ilin 28 may – 6 iyun tarixlərində Azərbaycan Dövlət Dəniz Administrasiyasında keçirdikləri yoxlamanın nəticələrinə görə Azərbaycan Respublikasının 172 dünya dəniz dövləti sırasında ən qabaqcıl dövlətləri geridə qoyaraq statistika üzrə ön sırada yer tutmasını mühüm və vacib bir məqam kimi vurğulayıb. Qlobal problemlərin tüğyan etdiyi, iqtisadi böhranın yaşandığı dünya ölkələrindən fərqli olaraq bu gün Azərbaycanın stabil, təhlükəsiz, inkişaf edən dövlət olduğunu deyən Laurens Barşyu audit yoxlaması nəticəsində əldə edilən uğurlu nəticənin nümunə olacaq vacib amil kimi dəyərləndirib.
Azərbaycan Respublikasının Prezidenti İlham Əliyevin bütün sahələrə olduğu kimi dənizçilik sahəsinə və dənizçilərə göstərdiyi diqqət və qayğının nəticəsində əldə edilən uğurlardan danışan nümayəndə heyəti dövlət başçısı tərəfindən həyata keçirilən uğurlu siyasətin nəticəsi olaraq Azərbaycanın nüfuzunun beynəlxalq aləmdə ildən-ilə artdığını vurğulayıb.
Görüşdə qeyd olunub ki, dənizçilik sahəsində bundan sonra da qanunvericiliyin təkmilləşdirilməsi, dəniz üzgüçülüyünün təhlükəsizliyi sisteminin effektivliyinin artırılması, dəniz nəqliyyatı sahəsində Beynəlxalq Dəniz Təşkilatının konvensiyalarının tələblərinə riayət olunması istiqamətində daha vacib işlər görüləcək. Artıq bu istiqamətdə müəyyən layihələrin hazırlandığını deyən nümayəndə heyəti bildirib ki, layihələrin reallaşması dənizçilik sahəsinin inkişafına öz töhfəsini verəcək.
Görüşdə qarşılıqlı əməkdaşlığa dair həyata keçiriləcək tədbirlər və bir sıra mühüm məsələlər müzakirə olunub.