REGİONLAR
Azərbaycanda hər 10 uşaqdan biri vaxtından əvvəl doğulur VİDEO
Quba, 27 noyabr , Elxan Yusifli, AZƏRTAC
Dünya Səhiyyə Təşkilatının hesabatına görə, hər il dünyada 15 milyon vaxtından əvvəl doğuş qeydə alınır. Bu körpələrin təxminən bir milyona yaxını (7 faiz) tələf olur. 184 ölkədə vaxtından əvvəl doğuşların sayı 5-18 faiz arasında dəyişir. Azərbaycanda isə bu göstərici 10 faiz təşkil edir. Vaxtından əvvəl doğuşların 60 faizindən çoxu yoxsul Afrika və Asiya ölkələrində baş verir və həmin uşaqların da yarısı tələf olur.
AZƏRTAC-ın bölgə müxbiri xəbər verir ki, bu barədə noyabrın 27-də Quba Regional Perinatal Mərkəzində (RPM) Beynəlxalq Vaxtından Əvvəl Doğulmuşlar Günü ilə əlaqədar təşkil olunan konfransda bildirilib.
Səhiyyə Nazirliyinin, Quba Rayon İcra Hakimiyyəti nümayəndələrinin, regionun tibb müəssisələrində çalışan mama-ginekoloq və neonatoloqların iştirak etdiyi tədbirin əsas məqsədi ictimaiyyətin diqqətini vaxtından əvvəl doğulmuş körpələrin problemlərinə cəlb etməkdir.
Nazirliyin Doğuşayardım Komissiyasının sədri, respublikanın baş mama-ginekoloqu Sevinc Məmmədova həyata keçirilən tədbirlər nəticəsində respublikamızda ana və uşaqların sağlamlığını xarakterizə edən göstəricilərdə müsbət dinamika əldə olunduğunu deyib. Bildirilib ki, ana və uşaqların sağlamlığının qorunması üzrə Dövlət Proqramı çərçivəsində bir çox layihələr reallaşdırılır. Bu layihələrin tətbiqi nəticəsində ana və uşaqlara xidmət göstərən tibb müəssisələrinin maddi-texniki bazası möhkəmləndirilir, dərman preparatları və tibbi texnika ilə təminat yaxşılaşdırılır. Hazırda bölgələrdə 6 Regional Perinatal Mərkəz fəaliyyət göstərir.
Quba Perinatal Mərkəzinin direktoru Şəhla Həsənova diqqətə çatdırıb ki, hamiləliyin 22-37-ci həftəsində baş verən doğuşlar vaxtından əvvəl doğuş hesab olunur. Vaxtından əvvəl doğuşlar əsasən çoxdöllü hamiləliklər, bətndaxili infeksiyalar, hamilələrin ekstraqenital patologiyaları (diabet, yüksək arterial təzyiq, ürək və böyrək xəstəlikləri) və irsi faktorlar səbəbindən baş verir.
Şəhla Həsənova şimal bölgəsində vaxtından əvvəl doğuşların Quba RPM-də aparıldığını vurğulayıb. Bildirib ki, mərkəzdə vaxtından əvvəl doğuşlar 8,5 faiz təşkil edir. Tibb müəssisəsində bu il vaxtından əvvəl doğulmuş 206 uşaqdan yalnız 13-ü (6,5 faiz) tələf olub.
Quba RPM-də Hamiləliyin Patologiyası şöbəsi fəaliyyət göstərir. Son 10 ay ərzində mərkəzdə qəbul edilən 330 hamilə qadından 70 faizi hamiləliyi saxlamaqla evə yazılıb. Müasir avadanlıqlarla təmin olunan mərkəzdə yeni müalicə metodlarının tətbiqi sayəsində erkən neonatal ölümün 3 dəfəyədək azalmasına nail olunub. Bununla yanaşı, son illər mərkəzdən K.Fərəcova adına Elmi-Tədqiqat Pediatriya İnstitutuna köçürülən uşaqların sayı da minimuma enib. İxtisaslaşdırılmış tibb müəssisəsinə əsasən anadangəlmə qüsurla doğulan uşaqlar köçürülür.
Tədbirdə qeyd olunub ki, ölkəmizdə hamilə qadınların qeydiyyatının aparılması onların ciddi nəzarətdə saxlanılmasına imkan verir. Səhiyyə Nazirliyi tərəfindən antenatal qulluq üzrə milli klinik protokola ciddi riayət edilməsi tələb olunur.
Quba Rayon İcra Hakimiyyətinin başçısı Ziyəddin Əliyev ölkəmizdə bütün sahələrdə olduğu kimi, səhiyyədə də aparılan islahatlardan, davamlı inkişafdan söz açıb. Bildirilib ki, respublikamızın bütün regionlarında yeni səhiyyə müəssisələri tikilir. 230 çarpayılıq Quba Rayon Mərkəzi Xəstəxanasının binası da bu il istifadəyə verilib.
Konfransın sonunda iştirakçıların sualları cavablandırılıb.