İQTİSADİYYAT


Azərbaycanda innovativ iqtisadiyyatın inkişafı istiqamətində aparılan islahatlar yüksək qiymətləndirilir

Bakı, 30 may, Ramiz Quliyev, AZƏRTAC

Mayın 30-da Bakıda Standartlaşdırma, Metrologiya və Patent üzrə Dövlət Komitəsi (SMPDK), Patent və Əmtəə Nişanları Mərkəzi (AzPatent) və Ümumdünya Əqli Mülkiyyət Təşkilatının (ÜƏMT) birgə təşkilatçılığı ilə “Əqli mülkiyyət və ənənəvi biliklər” və “Coğrafi göstəricilər və mənşə yerinə əsaslanan fərqlənmə nişanlarının digər qorunma üsulları” mövzusunda ikigünlük beynəlxalq seminar işə başlayıb.

AZƏRTAC xəbər verir ki, seminarın açılışında SMPDK sədrinin müavini Niyazi Rəhimov ölkəmizdə qeyri-neft ixrac potensialının gücləndirilməsi, “Made in Azerbaijan” brendinin xarici ölkələrdə təşviqi və yerli məhsulların rəqabətqabiliyyətliliyinin artırılması istiqamətində əqli mülkiyyət sahəsinin xüsusi rolundan danışıb. Patent sisteminin inkişafına nail olmaqla, innovativ həllərin sənayedə tətbiqi imkanlarının artdığını deyən N.Rəhimov bu məqsədlə Azərbaycan Prezidenti İlham Əliyev tərəfindən ardıcıl islahatların aparıldığını xüsusi vurğulayıb.

Bildirilib ki, qeyri-neft sektorunun inkişafına yönələn iqtisadi-siyasi kurs müasir təcrübələrə və insan kapitalına əsaslanan innovativ iqtisadiyyatın inkişafına xidmət edir. Hüquqi dövlət quruculuğu nəticəsində ölkəmizdə əqli mülkiyyət hüquqlarının qorunması və effektiv idarə olunması üçün hüquqi-normativ baza yaradılıb. Texnologiyalar üzərində müstəsna hüquq sahibləri və sənaye arasında münasibətlərin tənzimlənməsi, bununla da innovasiyaların sənayedə daha da geniş tətbiqi üçün bütün lazımi hüquqi şərait təmin olunub.

N.Rəhimov qeyd edib ki, bugünkü tədbir müasir əqli mülkiyyət hüquqları sistemində aktuallığı ilə seçilən ənənəvi biliklərin, coğrafi göstəricilərin əqli mülkiyyət obyekti olaraq qorunması və idarə edilməsi mövzusuna həsr olunub. Bu sahədə beynəlxalq hüquqi mexanizmlərin işlənib hazırlanması məqsədilə ÜƏMT çərçivəsində ənənəvi biliklər, genetik resurslar və folklor üzrə hökumətlərarası komitə fəaliyyət göstərir. N.Rəhimov yaxın vaxtlarda yaradılacaq hüquqi həllərin ənənəvi biliklərin tətbiqinin geniş təşviqinə, eyni zamanda, erməni saxtakarlığı kimi təhlükələrdən qorunmağa, dünya xalqları arasında daha sıx əməkdaşlıq və biliklər mübadiləsinə xidmət göstərəcəyinə əminliyini ifadə edib.

Müasir dövrdə iqtisadi inkişafın sənayenin və xidmət sahələrinin ixrac və rəqabətqabiliyyətliliyi ilə səciyyələndiyini qeyd edən komitə rəsmisi deyib ki, ənənəvi biliklər və coğrafi göstəricilərin şamil olunduğu məhsulların inkişaf etmiş və perspektivli istehlak bazarlarında uğur qazandığını görmək olar.

“Azərbaycanın bu sahədə geniş potensiala malikdir. Ölkəmizin ərazisində müxtəlif klimatik zonaların var. Bitkiçilik, heyvandarlıq, şərabçılıq məhsulları içməli su və ya səhiyyə təyinatlı təbii şəraitin mənşə yerləri ilə əlaqədar fərqli, təkrarolunmaz xüsusiyyətlərə malikdir. Müxtəlif bölgələrdə yaşayan icmaların ənənəvi biliklərinə uyğun hazırlanan özünəməxsus məhsullara – istər kulinariya, istər xalçaçılıq və sairə baxdıqda, bu sahədə xidmətlərin inkişafı, sənaye həcmli istehsalın və inkişaf etmiş xarici istehlak bazarlarına ixracın perspektivlərini görmək mümkündür. Bu baxımdan qeyd olunan sahələrdə müasir hüquqi mühafizə sisteminin təmin olunması, beynəlxalq əməkdaşlığın möhkəmləndirilməsi və təcrübə mübadiləsinin, ictimai məlumatlılığın əhəmiyyəti artmaqdadır”, deyə N.Rəhimov vurğulayıb.

ÜƏMT-in Qafqaz, Orta Asiya və Şərqi Avropa ölkələri bölməsinin departament direktoru İlya Qribkov bildirib ki, Azərbaycanda innovativ iqtisadiyyatın inkişafı istiqamətində aparılan islahatlar beynəlxalq təşkilatlar tərəfindən yüksək qiymətləndirilir. Əqli mülkiyyət hüquqlarının mühafizəsi, patent sisteminin inkişafı Azərbaycanda texnologiyaların sənayeyə ötürülməsi imkanlarını genişləndirir.

Seminarın aktuallığını qeyd edən qonaq bundan sonra da ÜƏMT tərəfindən Azərbaycana lazımi dəstəyin göstəriləcəyinə əminliyini ifadə edib.

Sonra ÜƏMT-in Qlobal əqli mülkiyyət məsələləri şöbəsinin nümayəndəsi Şahel Batti “Əqli mülkiyyət, ənənəvi bilik və ənənəvi mədəni nümunələr”, Böyük Britaniyanın London Kraliça Mary Universitetinin professoru Qeyl Evans “Əqli mülkiyyət, ənənəvi biliklər və fərqlənmə nişanlarının qorunması” və “Avropa ölkələrində fərqlənmə nişanları vasitəsilə ənənəvi biliklərin praktiki qorunması” mövzularında çıxış ediblər. “Ənənəvi biliklərin və ənənəvi mədəni nümunələrin qorunması sahəsində Azərbaycanın təcrübəsi” də seminar iştirakçılarına çatdırılıb.

Mayın 31-də “Coğrafi göstəricilər və mənşə yerinə əsaslanan fərqlənmə nişanlarının digər qorunma üsulları” mövzusunda keçiriləcək seminarda “Coğrafi göstəricilər və mənşə adları: Mənşə yerlərinin və coğrafi göstəricilərin beynəlxalq qorunmasına dair Lissabon sisteminə baxış”, “Mənşə yerinə əsaslanan fərqlənmə nişanlarının qorunmasının digər üsulları: Əmtəə nişanları sistemi və digər hüquqi qorunma vasitələri” mövzularında məruzələr dinləniləcək. Bu sessiyada “Azərbaycanın mənşə yerinə əsaslanan məhsullarının təqdimatı: mühafizə, kommersiyalaşdırma strategiyaları və cari problemlər” də müzakirə olunacaq.

Seminar çərçivəsində Azərbaycana məxsus ənənəvi biliklər və coğrafi göstəricilərin istifadə olunduğu yerli məhsulların geniş sərgisi də təşkil olunub. Sərgidə 20-dək şirkətin məhsulları nümayiş edilib. Bu məhsullara Azərbaycana məxsus ənənəvi bilikləri və coğrafi adları özündə əks etdirən milli nemətlər daxildir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.