Bakı, 27 mart, AZƏRTAC

Mədəniyyətlərin qovuşduğu məkanda yerləşən Azərbaycan əsrlər boyu dinlər və sivilizasiyalararası anlaşmada aparıcı rol oynayıb. Çağdaş dövrdə dünya üçün multikultural dəyərlər əhəmiyyətli dərəcədə vacib və aktual olduğundan Azərbaycan da bu dəyərlər sisteminə, eyni bir ölkədə yaşayan müxtəlif xalqların hüquqlarını tanıyan humanist dünyagörüşü və ona uyğun siyasət ilə nümunədir. Azərbaycanın dünya ölkələrinə təqdim etdiyi multikulturalizm təcrübəsi xalqların dostluq və mehriban şəraitdə birgə yaşamasını təmin edən modeldir. Tarixən və bu gün də Azərbaycanda müxtəlif xalqların və dinlərin nümayəndələri sülh və qarşılıqlı anlaşma şəraitində yaşayırlar.

Bu gün Azərbaycan dünyanın nadir ölkələrindəndir ki, burada ayrı-ayrı millətlərin, xalqların, dinlərin nümayəndələri bir ailə kimi yaşayırlar. Multikulturalizm Azərbaycanda əsrlərdən bəri formalaşan, eyni zamanda, bədii, psixoloji-mənəvi müstəvidən kənara çıxmayan dəyərlər toplusu kimi mövcuddur.

Multikulturalizm ideyaları ölkəmizdə əsrlər boyu formalaşsa da, onun siyasi banisi dahi rəhbər, Ümummilli Lider Heydər Əliyev olub.

Bu fikirləri AZƏRTAC-a müsahibəsində Azərbaycan Dövlət Neft və Sənaye Universitetinin Humanitar fənlər kafedrasının müəllimi Nərminə Qasımova söyləyib. N.Qasımova bildirib ki, Ümummilli Lider Heydər Əliyevin hakimiyyətə qayıdışından sonra Azərbaycan Respublikasının həm daxili, həm də xarici siyasətində köklü dəyişikliklər dərhal özünü göstərdi. Multikultural, tolerant və humanist dəyərlərin ana xətt təşkil etdiyi, insan hüquqlarının ali dəyər hesab olunduğu Heydər Əliyev siyasəti Azərbaycanı vətəndaş müharibəsindən xilas etdi, hətta Azərbaycanın multikultural dəyərlərini bir model kimi formalaşdırdı. Bu siyasət Azərbaycanın dövlət siyasətidir və müstəqillik dövründən bu günə kimi multikulturalizm sahəsində həyata keçirilmiş islahatlar və atılmış addımlar bu istiqamətin möhkəmlənməsinə və prioritetlərinin ortaya çıxmasına xidmət edib. Multikulturalizm milli ideologiyamızın - azərbaycançılığın tərkib hissəsidir. Ulu Öndər Heydər Əliyev Azərbaycan xalqının və cəmiyyətinin, eyni zamanda, Azərbaycan dövlətçiliyinin yüksəlişini şərtləndirən azərbaycançılıq ideyasına tamamilə yeni bir məzmun verərək, onu milli-etnik xüsusiyyətlərə, dövrün tələblərinə və dünyanın müasir şəraitinə uyğunlaşdırdı.

Ümummilli Lider milli birliyimizin əsrlərin sınağından çıxmış təməl daşı olan azərbaycançılığı multikulturalizmlə vəhdət halında siyasi gündəliyə çıxardı və hakimiyyətin əsas ideoloji prinsipinə çevirdi. Azərbaycançılıq ideologiyası yalnız ölkə ərazisində yaşayan müxtəlif etnik və dini mənsubiyyətli insanların göstəricisi yox, həm də geosiyasi sərhəd və məkanların ayırdığı, dünyanın müxtəlif ölkələrində yaşayan soydaşlarımızı da bir ideya-fəlsəfi, mədəni məkanda birləşdirən gücdür.

“Ümummilli Lider Heydər Əliyevin siyasi iradəsi nəticəsində Azərbaycan tarixən sahib olduğu tolerantlıq və multikulturalizm ənənələrini hüquqi və siyasi müstəvidə yenidən bərpa etdi. Ulu Öndər öz uzaqgörən, müdrik siyasəti ilə əsrlər boyu formalaşan çoxmədəniyyətlilik ənənəsini inkişaf etdirərək, onu keyfiyyətcə yeni mərhələyə yüksəltdi. Görkəmli şəxsiyyət Heydər Əliyevin təşəbbüsü və göstərişi ilə milli azlıqların ədəbiyyat, mədəniyyət, dil, tarix və adət-ənənələrinin qorunub saxlanmasına, inkişaf etdirilməsinə qanuni zəmin yaradıldı. Azərbaycan Respublikası Konstitusiyasının 18, 21, 25, 44, 48, 127-ci maddələri ilə mənşəyindən, irqindən, dinindən və dilindən asılı olmayaraq, hər kəsin hüquq və azadlıqlarına hörmət təmin olundu. Bu gün müstəqil Azərbaycanda Heydər Əliyevin siyasi kursunu uğurla davam etdirən Azərbaycan Respublikasının Prezidenti İlham Əliyev multikulturalizmi dövlət siyasətinin prioriteti elan edərək, bu prosesi ardıcıl olaraq uğurla davam etdirir. Beləliklə, azlıqların mədəni kimliyinə təminat verildi və onlar Azərbaycan bayrağı altında birləşdilər”- deyə Nərminə Qasımova bildirib. O, qeyd edib ki, ölkəmizin dünya dövlətlər birliyində mövqeyi daha da möhkəmlənir və bu gün Azərbaycan beynəlxalq arenada nikbin multikulturalizmin əsas mərkəzlərindən biri kimi tanınır.