Bakı, 11 may, AZƏRTAC

Peşə təhsili rəqabətqabiliyyətli iqtisadiyyatın və inkişaf etmiş cəmiyyətin təşəkkül tapmasında böyük əhəmiyyətə malikdir. Əmək bazarının tələblərinə uyğun kadr hazırlayan peşə təhsili sisteminin yaradılması böyük əhəmiyyət kəsb edir. Peşə təhsili və təliminin ümumi iqtisadi inkişafdakı əhəmiyyətini nəzərə alaraq, bir çox ölkələr bu sahənin inkişafı üzrə proqramlar hazırlayır və həyata keçirir. Son illərdə ölkə iqtisadiyyatının diversifikasiyası, qeyri-neft sektorunun davamlı inkişafının təmin olunması istiqamətində aparılan məqsədyönlü islahatlar ölkədə əlavə dəyər yaradan sektorların inkişafını təmin etməklə yanaşı, əmək bazarında rəqabətqabiliyyətli ixtisaslı kadr potensialına tələbatı artırmaqla, bu tələbatın ödənilməsinə imkan verən çevik və bazaryönümlü peşə təhsili sisteminin qurulmasını zəruri edir.

Bu fikirləri AZƏRTAC-a açıqlamasında Mədəniyyət və Sənətkarlıq üzrə Bakı Dövlət Peşə Təhsil Mərkəzinin direktoru Pərviz Həmzəyev deyib.

O bildirib ki, son illərdə Azərbaycanda peşə təhsilinin inkişafının təmin edilməsi istiqamətində mühüm addımlar atılıb. Prezident İlham Əliyevin 2016-cı il 20 aprel tarixli Fərmanına əsasən, Təhsil Nazirliyi yanında Peşə Təhsili üzrə Dövlət Agentliyinin yaradılıb və Əsasnaməsi təsdiq edilib. Agentlik Azərbaycan Respublikasında ilk peşə-ixtisas təhsili sahəsində dövlət siyasətinin həyata keçirilməsi və əlaqələndirilməsini, o cümlədən Təhsil Nazirliyinin tabeliyində olan ilk peşə-ixtisas təhsili müəssisələrinin fəaliyyətinin təşkil edilməsini həyata keçirir. Agentliyin təsis edilməsi peşə təhsilinin inkişaf etdirilməsi və müasir dövrün standartlarına uyğunlaşdırılması baxımından mühüm əhəmiyyət kəsb edir.

Pərviz Həmzəyev vurğulayıb ki, peşə təhsili müəssisələrinin infrastrukturunun müasirləşdirilməsi və maddi-texniki bazasının gücləndirilməsi daim diqqət mərkəzindədir. Bu diqqət ilbəil artırılır. Peşə təhsilinin dünya standartları səviyyəsinə çatdırılması məqsədilə beynəlxalq təşkilatlarla əməkdaşlıq qurulub: “BMT-nin İnkişaf Proqramının icra etdiyi “Gələcək üçün peşə təhsili və təlimi: Azərbaycanda qabaqcıl peşə təhsili mərkəzlərinin yaradılmasına dəstək” layihəsi çərçivəsində Mədəniyyət və Sənətkarlıq üzrə Bakı Dövlət Peşə Təhsil Mərkəzində praktik təlimlər və interaktiv tədrisin təşkili üçün TV studiya korpusu inşa olunub. Mərkəzdə 4 ixtisas üzrə 6 qrupda dual sistem tətbiq olunur. Karyera mərkəzi açılıb. Ən əsası odur ki, inklüziv təhsil var. Sağlamlıq imkanları məhdud uşaqlar üçün lift quraşdırılıb, sanitar qovşaqlar onlar üçün uyğunlaşdırılıb. Bütün bunlar yüksəkixtisaslı kadrların hazırlanmasına xidmət edir. Peşə təhsili müəssisələrində peşəyönümü və karyera məsləhəti xidmətinin göstərilməsi istiqamətində karyera mərkəzləri yaradılıb. Peşə təhsilinə göstərilən bu diqqət, qayğı bu sahəyə olan marağı artırır. 2021-ci ildə elektron tələbə qəbulu 66 peşə təhsili müəssisəsində 120 ixtisas üzrə aparılıb. Ötən illə müqayisədə qəbul olanların sayı 12 faiz artıb. 2021-2022-ci tədris ilində ilk dəfə olaraq 4 regionda 6 peşə təhsili müəssisəsində yüksək texniki peşə təhsilinə 15 ixtisas üzrə tələbə qəbulu həyata keçirilib”.

Pərviz Həmzəyev bildirib ki, Ermənistan-Azərbaycan Dağlıq Qarabağ münaqişəsi nəticəsində torpaqlarımızın 20 faizinin işğal olunması, 30 ilə yaxın davam edən işğal o ərazilərimizdə yerləşən peşə məktəblərinin fəaliyyətini də dayandırdı. 44 günlük Vətən müharibəsi Müzəffər Ali Baş Komandan İlham Əliyevin rəhbərliyi, şanlı ordumuzun şücaəti ilə Zəfərlə başa çatdı, torpaqlarımız işğaldan azad edildi. Bu gün işğaldan azad olunan torpaqlarımızda quruculuq işləri aparılır. Bu quruculuq işləri təhsil sahəsini, o cümlədən peşə təhsilini də əhatə edir.

“Prezident İlham Əliyev və birinci xanım Mehriban Əliyevanın Füzuli və Şuşa rayonlarına səfəri çərçivəsində iştirak etdiyi təməlqoyma mərasimləri, o cümlədən Füzuli şəhərində inşa olunacaq Peşə Liseyinin təməlinin qoyulması Azərbaycanın Qarabağın bərpası ilə bağlı qarşıya qoyduğu hədəflərə hansı miqyas və sürətlə yaxınlaşdığını göstərir. XXI əsrin çağırışları və trendlərinə müvafiq olaraq təhsil sahəsində islahatlar çərçivəsində peşə təhsilinin müasirləşdirilməsi istiqamətində məqsədyönlü tədbirlər həyata keçirilir. Azərbaycanda peşə təhsilinin inkişaf etdirilməsi prioritet istiqamət kimi müəyyən olunub. Bu sahədə peşəkar tədris prosesinin qurulması, əmək bazarının, o cümlədən işəgötürənlərin tələbatlarına uyğun ixtisaslar üzrə kadr hazırlığının təmin olunması qarşıda duran əsas vəzifələrdən biridir. Son dövrlər paytaxt Bakı ilə yanaşı, bölgələrdə də yeni peşə təhsili müəssisələri qurulur. Təməli qoyulan Peşə məktəbi də bu istiqamətdə həyata keçirilən layihələrdən biridir. Bu peşə təhsilinə dövlət səviyyəsində göstərilən diqqətin göstəricisidir. İnanıram ki, peşə müəssisələrinin hazırladığı ixtisaslı kadrlar işğaldan azad olunmuş torpaqlarımızın çiçəklənməsinə, orada bərpa-quruculuq işlərinin aparılmasına öz töhfələrini verəcəklər”, - deyə Pərviz Həmzəyev vurğulayıb.