CƏMİYYƏT


Azərbaycanda yanğınsöndürmə xidmətinin yaradılmasının 100 illik yubileyi qeyd olunub VİDEO

Bakı, 10 oktyabr, AZƏRTAC

Fövqəladə Hallar Nazirliyinin (FHN) həmkarlar ittifaqı oktyabrın 10-da FHN-in Binəqədi Rayon Dövlət Yanğından Mühafizə İdarəsində Azərbaycanda yanğınsöndürmə xidmətinin yaradılmasının 100 illiyi münasibətilə tədbir keçirib.

Nazirlikdən AZƏRTAC-a bildiriblər ki, əvvəlcə tədbir iştirakçıları Fəxri xiyabana gələrək, ulu öndər Heydər Əliyevin xatirəsini dərin ehtiramla yad edib, məzarı önünə gül dəstələri qoyublar.

Görkəmli oftalmoloq-alim, akademik Zərifə xanım Əliyevanın da xatirəsi anılıb, məzarı üzərinə tər çiçəklər düzülüb.

Sonra Şəhidlər xiyabanına gələn tədbir iştirakçıları Azərbaycanın müstəqilliyi və ərazi bütövlüyü uğrunda mübarizədə canlarından keçmiş Vətən övladlarının xatirəsini yad edib, məzarları üzərinə gül dəstələri qoyublar.

Toplantı iştirakçıları Dövlət Yanğından Mühafizə Xidmətinin Bakı Şəhər Binəqədi Rayon Dövlət Yanğından Mühafizə İdarəsinin həyətində təşkil edilən yanğından mühafizə qüvvələrinə məxsus xüsusi texnika və avadanlıqdan ibarət sərgi ilə tanış olublar.

Dövlət himninin səsləndirilməsi ilə başlayan tədbirdə FHN işçilərinin həmkarlar ittifaqının sədri Mehman İsmayılov çıxış edərək yanğınsöndürənləri peşə bayramı münasibətilə təbrik edib, onlara uğurlar arzulayıb. İttifaqın sədri Azərbaycanda yanğınsöndürmə dəstələrinin yaradılması tarixinə qısa ekskurs edərək bildirib ki, Azərbaycan Xalq Cümhuriyyətində 1918-ci il oktyabrın 10-da Bakı şəhər idarəsinin tərkibində Bakı Yanğın Komandası təsis edilib. Ümummilli lider Heydər Əliyev 2002-ci il oktyabrın 5-də məhz bu tarixin Azərbaycan Respublikası yanğınsöndürənlərinin peşə bayramı günü kimi qeyd edilməsi barədə Sərəncam imzalayıb. Yanğından mühafizə sahəsinin daim Ulu Öndərin diqqət və qayğısı ilə əhatə olunduğunu deyən M.İsmayılov Prezident İlham Əliyev tərəfindən bu siyasətin uğurla davam etdirildiyini vurğulayıb.

FHN-in Dövlət Yanğından Mühafizə Xidmətinin rəisi, daxili xidmət general-mayoru Füzuli Əsədov respublika ərazisində baş vermiş yanğınların söndürülməsinin və bununla bağlı təxirəsalınmaz xilasetmə tədbirlərinin həyata keçirilməsi məqsədilə görülmüş işlərdən ətraflı bəhs edib və qarşıda duran vəzifələrdən söz açıb. O, yanğından mühafizə xidmətinin ən müasir yanğınsöndürmə texnika və vasitələri ilə təmin olunduğunu bildirərək göstərilən qayğıya və diqqətə görə ölkə rəhbərliyinə minnətdarlığını bildirib.

Yanğınsöndürmənin çətin və şərəfli peşə olduğunu söyləyən Azərbaycan Həmkarlar İttifaqları Konfederasiyası sədrinin müavini Cavanşir Alxasov yanğınsöndürənləri peşə bayramı münasibətilə təbrik edib. O, xidmətdə fərqlənən yanğınsöndürənlərin təmsil etdiyi qurumun döş nişanı ilə təltif olunduqlarını bildirib.

Yanğınsöndürən veteranlar adından çıxış edən Azad Səmədov yanğın nəzarətinin həyata keçirilməsi və yanğından mühafizə sahəsində ciddi uğurlar qazanıldığını vurğulayaraq, bu işdə əməyi olan insanlara minnətdarlığını bildirib, yanğınsöndürənlərə uğurlar arzulayıb.

Toplantıda yekun nitqi ilə çıxış edən fövqəladə hallar nazirinin müavini, general-leytenant Etibar Mirzəyev ümummilli lider Heydər Əliyevin “Yanğın söndürmək cəsarət və mərdlik məktəbidir” fikrini xatırladaraq bildirib ki, yanğınsöndürənlərimizin fədakarlığı nəticəsində ölkə əhalisinin təhlükəsizliyinin təmin edilməsi, şəxsi, dövlət və ictimai əmlakın yanğından mühafizəsi istiqamətində ciddi irəliləyişlər əldə olunub. 2006-cı ildən etibarən respublikamızda 114 minə yaxın yanğın hadisəsinin qarşısının alındığını deyən nazir müavini yanğınsöndürənlərimizin dövlətimizin başçısının göstərişinə əsasən, başqa ölkələrdə də yanğın-xilasetmə əməliyyatlarında müvəffəqiyyətlə iştirak etdiklərini bildirib. E.Mirzəyev qeyd edib ki, yüzlərlə yanğınsöndürənimiz vətənimizin azadlığı və torpaqlarımızın müdafiəsi uğrunda gedən döyüşlərdə iştirak edib, şəhidlər veriblər. Onlardan ikisi Azərbaycan Respublikasının Milli Qəhrəmanıdır.

Natiq bildirib ki, dövlətimizin başçısının xüsusi diqqəti və qayğısı nəticəsində ölkəmizdə yanğınsöndürmə sahəsində müasir standartlara uyğun maddi-texniki baza formalaşıb. Bu siyasətin nəticəsində həm Dövlət Yanğından Mühafizə Xidməti, həm də Dövlət Yanğın Nəzarəti Xidməti qarşıya qoyulmuş vəzifələrin öhdəsindən layiqincə gəlib. Nazir müavini yanğınsöndürənləri peşə bayramı münasibətilə təbrik edib, onlara uğurlar arzulayıb.

Sonra fövqəladə hallar naziri, general-polkovnik Kəmaləddin Heydərovun əmrinə əsasən xidmətdə xüsusilə fərqlənmiş əməkdaşlara medallar təqdim edilib. Həmçinin Dövlət Yanğından Mühafizə və Dövlət Yanğın Nəzarəti xidmətlərinin iş prosesində fərqlənən və yubiley yaşı tamam olmuş bir qrup əməkdaşına, eyni zamanda, veteran yanğınsöndürənlərə Fövqəladə Hallar Nazirliyi işçilərinin həmkarlar ittifaqının fəxri fərmanları, qiymətli hədiyyələri, FHN-in iki əməkdaşına isə Azərbaycan Həmkarlar İttifaqları Konfederasiyasının döş nişanları təqdim olunub.

Tədbir bədii hissə ilə davam etdirilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.