İsmayıllı, 18 oktyabr, AZƏRTAC 

İsmayıllıda “Heydər Əliyev idarəetmə məktəbi”nin oktyabrın 18-də keçirilən növbəti məşğələsi müstəqilliyimizin 28-ci ildönümünə həsr edilib və məşğələdə “Azərbaycanın dövlət müstəqilliyi, milli azadlığı əbədidir və əbədi olacaq” mövzusu tədris olunub.

AZƏRTAC-ın bölgə müxbiri xəbər verir ki, iştirakçılar əvvəlcə müstəqil Azərbaycanın qurucusu və memarı ümummilli lider Heydər Əliyevin mərkəzi meydandakı abidəsini ziyarət edib, önünə çiçəklər düzüblər. “Heydər Əliyev idarəetmə məktəbi”nin növbəti məşğələsini rayon Ağsaqqallar şurasının sədri, dövlət qulluğu veteranı Valeh Salehov açıb, müstəqil Azərbaycanın keçdiyi şərəfli yol barədə məlumat verib.

Rayon məhkəməsinin hakimi Rəfael Şirinov Azərbaycanın dövlət müstəqilliyi barədə məruzə edib. Məruzədə, eləcə də çıxışlarda qeyd olunub ki, 1918-ci il mayın 28-də müsəlman Şərqində ilk olaraq Azərbaycan dövlət müstəqilliyi əldə edib, demokratik cümhuriyyət qurub. Təəssüf ki, bu cümhuriyyət cəmi 23 ay yaşayıb. Lakin uzun illər xalqın azadlıq, müstəqillik arzuları sarsılmayıb. Nəhayət, 70 il sonra, 1991-ci il oktyabrın 18-də Azərbaycan yenidən müstəqillik qazanıb. İlk vaxtlar ciddi problemlər yaşayan Azərbaycanda xalq ulu öndər Heydər Əliyevi təkidlə yenidən hakimiyyətə gətirib, dövlətimiz dahi rəhbərin düşünülmüş və uzaqgörən siyasəti nəticəsində yenidən müstəqillik yoluna qədəm qoyub.

Məşğələyə yekun vuran rayon icra hakimiyyətinin başçısı Mirdaməd Sadıqov Azərbaycanın dövlət müstəqilliyinin əbədi və dönməz xarakter aldığını, Prezident İlham Əliyevin Ulu Öndərin yaratdığı əsaslar üzərində ölkəmizi regionda aparıcı dövlətə çevirdiyini, beynəlxalq miqyasda söz sahibi etdiyini diqqətə çatdırıb.

Məşğələdən sonra Heydər Əliyev Mərkəzin foyesində balacaların ifasında Azərbaycana, müstəqilliyimizə həsr olunan şeir və mahnılar səsləndirilib.

X   X   X

Oktyabrın 18-də Kürdəmirdəki Heydər Əliyev Mərkəzində Azərbaycanın Dövlət Müstəqilliyi Gününə həsr edilən “Müstəqilliyimiz əbədidir, dönməzdir ” mövzusunda dəyirmi masa keçirilib.

AZƏRTAC-ın bölgə müxbiri xəbər verir ki, tədbir iştirakçıları əvvəlcə ümummilli lider Heydər Əliyevin abidəsi önünə tər gül dəstələri düzərək, dahi rəhbərin xatirəsini ehtiramla yad ediblər. Sonra Heydər Əliyev Mərkəzinin foyesində şəhər 3 saylı tam orta məktəbin şagirdlərinin təqdimatında “Müstəqilliyimiz əbədidir” adlı kompozisiya nümayiş olunub.

Dəyirmi masada Qarabucaq kənd tam orta məktəbin müəllimi Nizam İsmayılov “18 oktyabr Dövlət Müstəqilliyi Günüdür”, N saylı hərbi hissədə siyasi işlər üzrə komandir müavini Qorxmaz Mehdiyev “Müstəqillik dövründə Azərbaycan Respublikasının hərbi quruculuq fəaliyyəti”, YAP rayon təşkilatı Qadınlar şurasının sədri Sevda Hacıyeva “Heydər Əliyev ideyaları milli müstəqilliyimizin mənəvi güc mənbəyidir”, Atakişili kənd tam orta məktəbin tarix müəllimi Səidə Dadaşova “Heydər Əliyev və müstəqil Azərbaycan gəncliyi” mövzularında çıxış ediblər. Çıxışlarda ulu öndər Heydər Əliyevin dövlətimiz və dövlətçiliyimiz, habelə xalqımız üçün qurub yaratdığı müasir Azərbaycanın parlaq uğurlarından danışılıb.

Tədbirdə çıxış edən Kürdəmir Rayon İcra Hakimiyyətinin başçısı Ceyhun Cəfərov Dövlət Müstəqilliyi Günü münasibətilə dəyirmi masa iştirakçılarını təbrik edib, ümummilli lider Heydər Əliyevin qurub yaratdığı müasir Azərbaycanın parlaq uğurlarından söz açıb. Ulu Öndərin əsasını qoyduğu siyasi və iqtisadi kursun, cəmiyyət həyatının bütün sahələrini əhatə edən islahatların Prezident İlham Əliyev tərəfindən uğurla davam etdirildiyini diqqətə çatdıran icra hakimiyyətinin başçısı son illər Azərbaycanın dünyada qabaqcıl ölkələr sırasına çıxdığını, iqtisadi inkişaf tempinə görə lider ölkələrdən birinə çevrildiyini bildirib.

X   X   X

Oktyabrın 18-də Göyçayda Azərbaycanın dövlət müstəqilliyinin bərpasının 28-ci ildönümü şəhərin Heydər Əliyev prospekti istiqamətində “Qarabağ Azərbaycandır!” şüarı altında Ulu Öndərin abidəsinədək keçirilən yürüşlə başlayıb. İştirakçılar ulu öndər Heydər Əliyevin abidəsini ziyarət edərək, önünə gül-çiçək dəstələri düzüblər.

AZƏRTAC-ın bölgə müxbiri xəbər verir ki, Azərbaycan Respublikasının Dövlət Himni ilə başlayan tədbirdə rayon icra hakimiyyəti başçısının müavini Zivər Zeynalova çıxış edib. Bildirib ki,

müstəqil bir dövlətə sahib olmaq, öz müqəddəratını və taleyini müstəqil şəkildə təyin etmək bir xalqın əldə edə biləcəyi ən böyük xoşbəxtlikdir. Natiq sözünə davam edərək vurğulayıb ki, 1991-ci ildə müstəqilliyini yenidən bərpa edən Azərbaycan ulu öndər Heydər Əliyevin siyasi iradəsi, dövlətçilik təcrübəsi nəticəsində bu müstəqilliyi dönməz və əbədi etdi.

Rayon icra hakimiyyətinin başçısı Mehdi Səlimzadə ümummilli lider Heydər Əliyevin qurub yaratdığı müstəqil Azərbaycanın bu gün Prezident İlham Əliyevin rəhbərliyi ilə qazandığı uğurlardan danışıb.

Sonra tədbir mədəniyyət mərkəzinin hazırladığı konsert proqramı ilə davam edib. Tədbirdə güləş idman növü üzrə beynəlxalq idman yarışlarındakı nailiyyətlərinə görə Qismət Eyyubova və Vasif Məmmədova rayon icra hakimiyyəti başçısının təşəkkürnaməsi verilib.