CƏMİYYƏT
Azərbaycanın vərəmlə mübarizə sahəsində müsbət təcrübəsi Belarusun penitensiar sistemində tətbiq edilir
Bakı, 25 sentyabr, AZƏRTAC
Belarus Respublikası Daxili İşlər Nazirliyinin Cəzaların İcrası Departamentinin rəisi, milis general-mayoru Sergey Doroşkonun rəhbərlik etdiyi nümayəndə heyəti Azərbaycanda səfərdə olub.
Səfərin birinci günündə qonaqlar Azərbaycan Respublikası ədliyyə nazirinin müavini, Penitensiar Xidmətin rəisi, ədliyyə general-mayoru Ceyhun Həsənov ilə görüşüblər.
Ədliyyə Nazirliyinin Penitensiar Xidmətindən AZƏRTAC-a bildiriblər ki, C.Həsənov görüşdə Azərbaycan və Belarus xalqları arasında təməli ulu öndər Heydər Əliyev tərəfindən qoyulmuş tarixi dostluq əlaqələrinin müvafiq sahədə də əməkdaşlığın inkişafına əlverişli şərait yaratdığını vurğulayıb. Nazir müavini son illər Penitensiar Xidmətdə kadr, məhkumların hüquq və azadlıqlarının təminatı, vərəmlə mübarizə, qanunvericilik bazasının təkmilləşdirilməsi, infrastrukturun müasirləşdirilməsi istiqamətində həyata keçirilmiş işlər barədə qonaqlara ətraflı məlumat verib. Cəzaçəkmə müəssisələrində istehsalatın təşkilində, məhkumların fərdi əməyə və təsərrüfat işlərinə cəlb edilməsində Belarusun böyük təcrübəyə sahib olduğu diqqətə çatdırılıb. Bildirilib ki, bu təcrübə ilə yaxından tanış olmaq və Azərbaycanın cəzaçəkmə müəssisələrində nümunə kimi tətbiq etmək məqsədilə Penitensiar Xidmət əməkdaşları bu yaxınlarda Belarusun üç müxtəlif rejimli cəzaçəkmə müəssisəsinə baş çəkiblər.
S.Doroşko Belarusun son illər cəza-icra siyasəti sahəsində əldə etdiyi uğurlar, əməkdaşlığın perspektivləri barədə məlumat verib. O, xüsusilə vərəmlə mübarizə sahəsində qazanılan nailiyyətlərlə yaxından tanış olmaq məqsədilə Belarus nümayəndə heyətinin ölkəmizə səfərinin əhəmiyyətini qeyd edib.
Azərbaycanın vərəmlə mübarizədə nailiyyətlərini yüksək qiymətləndirən qonaq bu müsbət təcrübənin Belarusun penitensiar sistemində tətbiq edildiyini və nəticədə vərəmli məhkumlar arasında ölüm hallarının 35 dəfə azaldığını diqqətə çatdırıb. O, səfərin təcrübə mübadiləsi baxımından uğurlu olacağına və əməkdaşlığın davam etdirilməsinin müsbət nəticələr verəcəyinə əminliyini ifadə edib.
Görüş çərçivəsində Azərbaycan Respublikası Ədliyyə Nazirliyinin Penitensiar Xidməti ilə Belarus Respublikasının Daxili İşlər Nazirliyi Cəzaların İcrası Departamenti arasında əməkdaşlıq barədə memorandum imzalanıb.
Memorandumda hər iki ölkənin cəzaçəkmə müəssisələrinin fəaliyyətinin yaxşılaşdırılması, azadlıqdan məhrum edilmiş şəxslərə göstərilən tibbi xidmətin və psixoloji yardımın yüksəldilməsi, cəzaçəkmə yerlərində mühafizə və təhlükəsizlik sisteminin müasirləşdirilməsi, məhkumların təhsilə cəlb edilməsi, beynəlxalq normalara uyğun olaraq, Penitensiar Xidmətdə çalışan kadrların peşəkarlıqlarının artırılması və sair istiqamətlər üzrə qarşılıqlı əməkdaşlıq çərçivəsində gələcəkdə ikitərəfli səfər, görüş, konfrans və seminarların təşkili məsələləri nəzərdə tutulub.
Görüşdən sonra qonaqlar Penitensiar Xidmətin tarix muzeyində qurumun fəaliyyəti, Heydər Əliyev guşəsində isə Ümummilli Liderin müasir Azərbaycanın inkişafı istiqamətində qazandığı nailiyyətləri əks etdirən fotoşəkil və eksponatlarla tanış olublar.
Belarus nümayəndə heyəti səfər çərçivəsində Fəxri xiyabanda ümummilli lider Heydər Əliyevin və görkəmli oftalmoloq-alim, akademik Zərifə xanım Əliyevanın xatirəsini dərin ehtiramla yad edərək məzarları önünə gül dəstələri qoyub. Şəhidlər xiyabanına gələn qonaqlar Azərbaycanın müstəqilliyi və ərazi bütövlüyü uğrunda canlarından keçən qəhrəman Vətən övladlarının da xatirəsini yad ediblər.
Belaruslu qonaqlar, həmçinin Heydər Əliyev Mərkəzi və şəhərimizin görməli yerləri ilə də tanış olublar. Onlara ötən əsrlərin yadigarı olan abidələrin qorunması və bərpasına göstərilən dövlət qayğısı barədə məlumat verilib.
Səfərin növbəti günündə qonaqlar Bakı İstintaq Təcridxanasının fəaliyyəti ilə tanış olublar.
Nümayəndə heyətinin Belarusun Azərbaycandakı səfiri Gennadi Axramoviç ilə görüşündə diplomat iki ölkə arasında dostluq və əməkdaşlıq münasibətlərinin yüksək səviyyədə olduğunu bildirib. O, Azərbaycanda cəza çəkən Belarus vətəndaşı olan məhkumlarla bağlı səfirliyin Penitensiar Xidmətə ünvanladığı bütün müraciətlərə daim diqqətlə yanaşıldığı vurğulayıb və buna görə minnətdarlığını bildirilib.
Səfər çərçivəsində Belarus nümayəndə heyəti 1918-ci ildə bolşevik-daşnak silahlı dəstələrinin Azərbaycan torpaqlarında həyata keçirdikləri kütləvi qırğınlar nəticəsində həlak olmuş on minlərlə azərbaycanlının xatirəsinə ucaldılmış Quba Soyqırımı Memorial Kompleksini ziyarət ediblər.
Nümayəndə heyəti Quba tarix muzeyi və mədəniyyət sarayına baş çəkib, Azərbaycanda multikulturalizmin bariz nümunələrindən olan yəhudilərin yığcam yaşadıqları Qırmızı qəsəbədə yerli sakinlərlə görüşüblər.
Qəsəbə sakinləri xalqımızın digər millətlərə qarşı yüksək tolerantlığını, Azərbaycanda tolerant mühitin qorunması sahəsində dövlət siyasətinin həyata keçirilməsində ulu öndər Heydər Əliyevin və onun layiqli davamçısı Prezidenti İlham Əliyevin misilsiz xidmətlərini qeyd ediblər.