ELM VƏ TƏHSİL


Azərbaycanlı alim Valeri Leqasov adına medala layiq görülüb

Bakı, 8 avqust, AZƏRTAC 

Azərbaycan Milli Elmlər Akademiyasının (AMEA) Radiasiya Problemləri İnstitutunun laboratoriya rəhbəri, AMEA-nın müxbir üzvü İslam Mustafayev ekologiya və həyat fəaliyyətinin təhlükəsizliyi üzrə Beynəlxalq Elmlər Akademiyasının Valeri Leqasov adına medalına layiq görülüb.

AMEA-dan AZƏRTAC-a bildiriblər ki, İ.Mustafayev bu medalla kimyəvi və radiasiya təhlükəsizliyi, habelə atom-hidrogen energetikası sahəsində apardığı səmərəli tədqiqatlara görə təltif olunub.

Alim 1988-ci ildən Çernobıl qəzasına həsr edilmiş “Atmosfer” şifrli elmi-tədqiqat işinin Azərbaycan tərəfindən icraçısı, Xəzər regionunun radiasiya təhlükəsizliyinə aid NATO layihəsinin həmrəhbəri olub. O, bu istiqamətdə 15 ixtiranın, yüksək impakt faktorlu jurnallarda dərc olunmuş 100-ə yaxın məqalənin müəllifidir.

Beynəlxalq Elmlər Akademiyası 1993-cü ildə Rusiya Federasiyasında təsis edilib və BMT-nin İctimai İnformasiya Departamenti, eləcə də İqtisadi və Sosial Komitəsi ilə assosiasiya olunub. Akademiya tərəfindən bu medal Çernobıl qəzasının nəticələrinin aradan qaldırılmasında şücaət göstərmiş Rusiya Federasiyasının qəhrəmanı V.Leqasovun xatirəsini əbədiləşdirmək üçün təsis edilib. V.Leqasov adına medal kimyəvi, radiasiya və nüvə təhlükəsizliyinin təmin olunmasına, mürəkkəb texniki sistemlərin təhlükəsizliyinin artırılmasına töhfə verən alimlərə və mütəxəssislərə verilir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.