MƏDƏNİYYƏT


Azərbaycanlı fotoqraflar beynəlxalq fəxri adlara layiq görülüblər

Bakı, 2 dekabr, AZƏRTAC

“Gilavar” Azərbaycan Foto Klubunun dəstəyi ilə azərbaycanlı fotoqraflar Beynəlxalq Foto Sənəti Federasiyasının (FIAP) fəxri adlarına layiq görülüblər. Beynəlxalq Foto Sənəti Federasiyası dünyada UNESCO tərəfindən tanınan yeganə fotoqrafiya təşkilatıdır. Bu qurumun fəxri adlarını əldə etmək üçün fotoqraflar xüsusi qaydalara əməl etməklə FIAP himayədarlığı altında dünyanın müxtəlif ölkələrində keçirilən fotomüsabiqələrdə iştirak etməli, onların təqdim etdiyi fotolar bədii və texniki ustalıq baxımından bəyənilməli, mükafatlar qazanmalıdır. Daha sonra qurumun Direktorlar Şurasının və Bədii Komissiyasının üzvlərinin böyük əksəriyyətinin səs çoxluğu və qərarı tələb olunur.

AZƏRTAC xəbər verir ki, ildə bir dəfə təqdim olunan fəxri adlara bu il Azərbaycandan 5 fotoqraf layiq görülüb. Belə ki, Nurlan Tahirli, Valeriy Xlızov, Aleksandr Firstov Beynəlxalq Foto Sənəti Federasiyasının “Rəssam”ı, Rəşad Mehdiyev “Mükəmməllik”, İlqar Cəfərov isə “Mükəmməlik/bürünc” dərəcələrini əldə ediblər. Bununla da 2016-cı ildən başlayaraq beynəlxalq fəxri ad alan azərbaycanlı fotoqrafların sayı 7-yə yüksəlib.

Qeyd edək ki, İlqar Cəfərov və Rəşad Mehdiyev bir əsrlik tarixi olan Azərbaycan Dövlət İnformasiya Agentliyinin (AZƏRTAC) fotomüxbirləridir. Hər iki fotoqraf Azərbaycanın ərazi bütövlüyünün bərpası uğrunda başlamış Vətən müharibəsi zamanı cəbhəyanı bölgələrdə və işğaldan azad olunmuş ərazilərdə çəkilişlər aparıblar.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.