Bakı, 12 dekabr (AZƏRTAC). Dekabrın 12-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdı.

Təzə bazar” MMC-nin həyətindəki yarmarkaya Sabirabad, Zərdab, Gədəbəy, Hacıqabul və digər rayonlardan geniş çeşiddə məhsul gətirilmişdi. Səhər tezdən yarmarkaya gələn alıcılar – pensiyaçı Sevil Cəfərova, evdar qadın Günel Cavadova və başqaları məhsulların bazarlara nisbətən ucuz olduğuna görə təşkilatçılara və fermerlərə minnətdarlıq edirdilər.

Gədəbəyli fermer Arzu Tanrıquliyev yarmarkaya gətirdiyi 3 ton bal, pendir, meyvə, çuğundur, kartof və kələmİ alıcılara münasib qiymətə təklif edirdi. O, yaradılan şəraitdən razılığını bildirdi.

Kənd Təsərrüfatı Nazirliyinin nümayəndəsi Fərhad Qəmbərovun verdiyi məlumata görə, bu gün satışa 12 tondan çox məhsul çıxarılmışdır və qiymətlər bazardakından 20-25 faiz aşağıdır.

Bakı Rabitə və Nəqliyyat Kollecinin həyətindəki yarmarkada kənd təsərrüfatı məhsullarının bolluğu və meyvə-tərəvəzin çeşidinin müxtəlifliyi, qiymətlərin münasibliyi alıcıları buraya cəlb edirdi.

Kənd Təsərrüfatı Nazirliyinin nümayəndəsi Saleh Zərbəliyevin sözlərinə görə, yarmarkaya Salyan, Qusar, Astara, Dəvəçi, Quba rayonlarından 86,6 ton məhsul gətirilmişdir. Həmişə olduğu kimi, bu dəfə də Salyan, Quba, Qusar, Astara, Dəvəçi rayonlarının fermerləri sakinlərə bol alma, kələm, kartof, soğan, yerkökü, mandarin, limon, feyxoa, heyva, nar, balqabaq və digər mövsümi məhsullar təklif edirlər. Bolluq və çeşid müxtəlifliyi qiymətlərin xeyli aşağı düşməsinə səbəb olmuşdur.

Badamdar qəsəbəsinin mərkəzində, 239 nömrəli məktəbin yaxınlığındakı yarmarkaya Ağdaş, Salyan, Sabirabad, Quba, Şəmkir, Saatlı, Qazax və digər rayonlardan 14 tondan çox kənd təsərrüfatı məhsulu gətirilmişdi. Giləzi və Hacıqabul quşçuluq fabriklərinin nümayəndələri isə satışa 12 min 300 ədəd yumurta çıxarmışdılar.

Kənd Təsərrüfatı Nazirliyinin nümayəndələri qayda-qanuna ciddi nəzarət edir, alıcıların təkliflərini öyrənərək buraya məhsul göndərən rayonların nümayəndələrinə çatdırırlar.

Metronun “Əhmədli” stansiyasının yaxınlığında, “Azər” ticarət mərkəzində təşkil edilmiş yarmarkada Ağcabədi, Quba, Biləsuvar, Qax, Kürdəmir və digər rayonların fermerləri ucuz qiymətlərə təzə meyvə-tərəvəz, bostan və süd məhsullarını satırdılar.

İşçi qrupundan verilən məlumata görə, yarmarkaya 256 ton kənd təsərrüfatı məhsulları gətirilmişdir.

Biləcəri qəsəbəsi, Məlik Aslanov küçəsi, 284 nömrəli orta məktəbin yaxınlığındakı yarmarkada Qazax və Ağsu fermerləri alıcılara 16 tondan çox kələm, kök, alma, nar, kartof, pomidor və digər məhsullar təklif edirdilər.

Sakinlər qiymətləri bazardakından 20-30 faiz ucuz olan həmin məhsulları həvəslə alırdılar.

Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada isə Ağstafa, Goranboy və Bərdə fermerləri satışa müxtəlif çeşiddə kənd təsərrüfatı məhsulları çıxarmışdılar.

Kənd Təsərrüfatı Nazirliyinin nümayəndəsi Savalan Seyfəddinovun verdiyi məlumata görə, Nərimanov rayonu Ə.Əliyev küçəsindəki yarmarkada şənbə günü Xaçmaz, Tərtər, Salyan, İmişli, Neftçala, Tovuz, Oğuz, Beyləqan, Daşkəsən rayonlarından gətirilmiş 31,4 ton məhsul satılırdı.

Tovuz rayonunun Xatınlı kənd sakini Mənzər Rəhimova öz həyətyanı təsərrüfatından 2 tona yaxın meyvə-tərəvəz gətirmişdi.

Alıcılar məhsulun keyfiyyətindən və qiymətindən razılıq edirdilər.

Nərimanov Rayon İcra başçısının və Kənd Təsərrüfatı Nazirliyinin nümayəndələri yarmarkada qayda-qanuna nəzarət edirdilər.