CƏMİYYƏT
Bakı Dövlət Universitetində korrupsiyaya qarşı mübarizə sahəsində tədris seminarı keçirilir VİDEO
Bakı, 30 oktyabr, AZƏRTAC
Oktyabrın 30-da BMT-nin Narkotiklər və Cinayətkarlığa Qarşı Mübarizə Baş İdarəsinin korrupsiya və iqtisadi cinayətlər idarəsinin, Bakı Dövlət Universitetinin (BDU), o cümlədən universitetin hüquq fakültəsinin və Rusiya Federasiyası Xarici İşlər Nazirliyinin Moskva Dövlət Beynəlxalq Əlaqələr Universitetinin birgə təşkilatçılığı ilə korrupsiyaya qarşı mübarizə sahəsində tədris seminarı keçirilir.
AZƏRTAC xəbər verir ki, BDU-da keçirilən tədbirdə BMT-nin nüfuzlu ekspertləri, Finlandiya, Belarus, Ukrayna, Türkiyə, Rusiya, Estoniya, Gürcüstan, Latviya, Qırğızıstan, Moldova, Tacikistan, Qazaxıstan, Özbəkistandan xarici ekspertlər iştirak edirlər.
Seminarın məqsədi Şərqi Avropa və Mərkəzi Asiya ölkələrindən olan mütəxəssis və müəllimlərin peşəkar və yüksək səviyyəli antikorrupsiya tədrisini həyata keçirmək imkanlarını gücləndirmək, həmçinin iştirakçılar arasında fikir və təcrübə mübadiləsini təşkil etməkdir.
BDU-nun hüquq fakültəsinin dekanı, hüquq elmləri doktoru, professor Əmir Əliyev çıxış edərək tədbirin əhəmiyyətindən, son vaxtlar respublikamızda bu sahədə həyata keçirilən mühüm qanunvericilik və digər islahatlardan danışıb. Qeyd edilib ki, cinayətkarlığa, o cümlədən korrupsiyaya qarşı mübarizədə həyata keçirilən mühüm addımların əsası ümummilli lider Heydər Əliyev tərəfindən qoyulub və hazırda Prezident İlham Əliyev tərəfindən uğurla davam etdirilir. İstər daxili qanunvericilik sahəsində, istərsə də beynəlxalq müqavilələrin iştirakçısı olmaq baxımından ölkəmiz tərəfindən kifayət qədər mühüm işlər görülüb.
Diqqətə çatdırılıb ki, korrupsiyaya qarşı mübarizənin vacibliyi bu sahədə ciddi müzakirələrin aparılmasına ehtiyac yaradır. Bu sahədə hər bir dövlətin qanunvericilik təcrübəsi mühüm əhəmiyyət daşıyır. Korrupsiyaya qarşı qanunvericilik üzrə mühüm istiqamətlər ali məktəblərdə tədris proqramlarına daxil edilib, bu sahədə ixtisaslaşmış mütəxəssislərin hazırlanmasına başlanılıb. Bu sahədə dünya təcrübəsinə uyğun olaraq, Bakı Dövlət Universitetinin hüquq fakültəsində yaradılan “Transmilli cinayət hüququ” magistratura ixtisası üzrə ixtisaslaşmış kadrların hazırlanması müvəffəqiyyətlə aparılır. Müxtəlif ölkələrin təcrübəsini öyrənməklə bu sahədə daha yekdil əməkdaşlıq qurula bilər.
Azərbaycan Respublikasının Baş Prokuroru yanında Korrupsiyaya Qarşı Mübarizə Baş İdarəsinin böyük prokuroru Elnur Musayev korrupsiya cinayətləri və onlara yol açan hallara qarşı mübarizə sahəsində Azərbaycan Respublikası prokurorluq orqanlarının səmərəli fəaliyyətindən, dünya dövlətləri praktikasının ciddi şəkildə öyrənilməklə ölkəmizdə həyata keçirilən mühüm tədbirlərin əhəmiyyətindən bəhs edib. Azərbaycan dövlətinin bu sahədə həyata keçirdiyi əməli fəaliyyətin müsbət nəticələrindən danışıb. O, Azərbaycan Respublikasının beynəlxalq təşkilatlarda uğurlu fəaliyyətini ön plana çəkib. Dövlətimizin beynəlxalq təşkilatlarla bu sahədəki müsbət əməkdaşlığının digər dövlətlər üçün də praktik və nümunəvi hal ola biləcəyini bildirib.
O, ölkəmizdə korrupsiya hallarına qarşı mübarizənin dövlət siyasətinin prioritet istiqamətlərindən birini təşkil etməsi, qabaqlayıcı və maarifləndirmə tədbirlərinin kompleks tətbiqi ilə xarakterizə olunan genişmiqyaslı islahatların həyata keçirilməsi barədə məlumat verib.
BMT-nin cinayətkarlığa qarşı və cinayət ədalət idarəsinin əməkdaşı Siqall Horovitz, Moskva Dövlət Beynəlxalq Əlaqələr Universitetinin Avropa Araşdırmaları İnstitutunun direktoru Tamara Şaşkina tədbirin əhəmiyyətini qeyd ediblər. Seminarin reallaşdırılmasında göstərdiyi dəstəyə görə Bakı Dövlət Universitetinin rəhbərliyinə, o cümlədən hüquq fakültəsinin professor-müəllim heyətinə minnətdarlıq ifadə olunub.
Türkiyə, Finlandiya, Rusiya, Ukrayna, Gürcüstan, Qırğızıstan, Belarus, Tacikistan, Qazaxıstan və digər ölkələrdən olan xarici ekspertlər çıxışlarında korrupsiyaya qarşı mübarizədə məlumatlandırmanın, maarifləndirmənin və təhsilin əhəmiyyətini qeyd ediblər.
Tədbir işini məruzələr və məlumatlandırma-tədris bölmələrində davam etdirib. Məruzələr bölməsində 15-dək aktual mövzuda tanınmış ekspertlərin məruzələri dinlənilib və geniş fikir mübadiləsi aparılıb. Məlumatlandırma-tədris bölməsində isə BMT-nin iki nüfuzlu ekspertinin məruzəsi dinlənilib, BMT təcrübəsi, müxtəlif dövlətlərin qanunvericilik praktikası geniş fikir mübadiləsi şəraitində müzakirə edilib.
Aparıcı dövlətlərin qanunvericilik və praktik fəaliyyətlərinin geniş təhlili, eləcə də məlumat mübadiləsi nöqteyi-nəzərdən mühüm əhəmiyyət kəsb edən seminarda Bakı Dövlət Universitetinin hüquq fakültəsinin professor-müəllim heyəti, tələbələr, müstəqil ekspertlər fəal iştirak ediblər.