Bakı, 25 fevral, AZƏRTAC

Fevralın 25-də Bakı Slavyan Universitetində (BSU) bu ali təhsil müəssisəsi rəhbərliyinin dəstəyi və Ölkəşünaslıq Klubu İdarə Heyəti üzvlərinin fəal iştirakı ilə Xocalı soyqırımının 29-cu ildönümünə həsr olunmuş onlayn tədbir keçirilib. “Microsoft Teams” platforması üzərindən keçirilən tədbirdə BSU-nun rəhbərliyi, bu ali məktəbdə fəaliyyət göstərən tələbə ictimai təşkilatlarının nümayəndələri və fəal tələbələr iştirak ediblər. Tədbirin əvvəlində Xocalı soyqırımı qurbanlarının, eləcə də Azərbaycanın ərazi bütövlüyü və dövlət müstəqilliyi uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.

Bu barədə AZƏRTAC-a BSU-nun Mətbuat və informasiya şöbəsindən məlumat verilib. Tədbiri açan BSU-nun rektoru, professor Nurlana Əliyeva bildirib ki, xalqımızın və bəşəriyyətin tarixinə qanlı faciə kimi daxil olmuş Xocalı soyqırımından 29 il keçir. 1992-ci il fevralın 26-da ermənilər xalqımıza qarşı xüsusi qəddarlıqla və böyük amansızlıqla Xocalı qətliamını törətdilər. Xain, məkrli və namərd qonşularımız olan ermənilər iki əsrdən çoxdur ki, xalqımıza qarşı soyqırımı və deportasiya siyasəti aparır. Xocalı soyqırımı bu mənfur və məkrli siyasətin ən qanlı, ən faciəli səhifələrindən biridir. Xocalıda dinc mülki əhali, o cümlədən körpələr, qadınlar, qocalar xüsusi vəhşiliklə qətlə yetirildi. Xocalı soyqırımı xalqımıza qarşı törədilmiş böyük hərbi cinayətdir.

Rektor Nurlana Əliyeva vurğulayıb ki, Xocalı soyqırımına siyasi–hüquqi qiymət yalnız ümummilli lider Heydər Əliyev respublika rəhbərliyinə qayıtdıqdan sonra verildi. Azərbaycan Prezidenti İlham Əliyev Xocalı soyqırımının bütün dünyada tanıdılmasını dövlətimizin xarici siyasətinin əsas istiqamətlərindən biri kimi müəyyənləşdirib. Azərbaycan Respublikasının Birinci vitse-prezidenti Mehriban Əliyevanın Xocalı soyqırımı barədə həqiqətlərin dünya ictimaiyyətinə çatdırılmasında misilsiz xidmətləri var. Heydər Əliyev Fondunun vitse-prezidenti Leyla Əliyevanın təşəbbüsü ilə 2008-ci ildən başlanan “Xocalıya ədalət!” beynəlxalq təbliğat-təşviqat kampaniyası dünyanın 80-dən çox ölkəsində uğurla həyata keçirilir.

Rektor Nurlana Əliyeva qeyd edib ki, bu gün Azərbaycan xalqı böyük sevinc və qürur hissi ilə yaşayır. Ötən il sentyabrın 27-də başlanan və 44 gün davam edən Vətən müharibəsi noyabr ayının 8-də Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin uzaqgörən, müdrik, qətiyyətli siyasəti, yenilməz iradəsi, sərkərdəlik məharəti və rəşadətli Azərbaycan Ordusunun qəhrəmanlığı nəticəsində xalqımızın böyük tarixi Qələbəsi ilə başa çatdı. Azərbaycanın ərazi bütövlüyü bərpa olundu və xalqımızın 30 illik torpaq, yurd həsrətinə son qoyuldu. Biz bütün dünyada yenilməz, qalib xalq, güclü, qüdrətli dövlət kimi tanınırıq və hər birimiz bundan qürur duyuruq. Biz bu böyük Qələbənin qazanılmasına görə Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevə minnətdarıq.

Professor Nurlana Əliyeva bildirib ki, Azərbaycan xalqı Xocalı soyqırımı qurbanlarının xatirəsini həmişə əziz tutur, bu qətliamın ideoloqlarını, təşkilatçılarını və icraçılarını nifrətlə lənətləyir.

BSU-nun tərbiyə işləri üzrə prorektoru, dosent Xanım Sultanova qeyd edib ki, xalqımız Silahlı Qüvvələrin Ali Baş Komandanı İlham Əliyevin rəhbərliyi və rəşadətli Azərbaycan Ordusunun igid əsgər və zabitlərinin qəhrəmanlığı nəticəsində Vətən müharibəsində parlaq Qələbə qazanmaqla Xocalı soyqırımının intiqamını aldı. BSU-nun rəhbərliyi və kollektivi Xocalı soyqırımının dünya ictimaiyyətinə çatdırılması istiqamətində aparılan işlərdə həmişə fəal iştirak edib və bu vacib, müqəddəs vəzifəni uğurla davam etdirir. BSU tərəfindən dünyanın 12 dilində Xocalı soyqırımını konkret faktlarla əks etdirən kitablar çap edilərək dünya ictimaiyyətinə çatdırılıb. Eyni zamanda, universitetin müəllim və tələbələri Xocalı soyqırımı ilə bağlı keçirilən müxtəlif layihələrdə, petisiyalarda yaxından iştirak edirlər. Vətən müharibəsində BSU-nun 3 məzunu şəhid olub. Hərbi əməliyyatların aparıldığı 44 gün ərzində universitetin kollektivi ölkə rəhbərliyinə, Azərbaycan Ordusuna hərtərəfli dəstək göstərib. Xalqımızın Qarabağ uğrunda apardığı və Qələbə ilə başa çatan ədalətli, müqəddəs və şərəfli Vətən müharibəsi müasir dünyanın hərb tarixinə yazıldı. Dünyanın tanınmış və nüfuzlu hərbi ekspertləri, siyasi xadimləri, jurnalistləri bu müharibənin təcrübəsinin öyrənilməsi və dərsliklərə salınması fikrini irəli sürüblər.

BSU-nun tələbələri - şəhid ailəsinin üzvü Nizami Xəlilov, Günel Məmmədova, Samirə Fərəcova, Zəhra Haqverdiyeva, Gülər Həmidova Xocalı soyqırımı haqqında, eləcə də Vətən müharibəsində qazanılmış möhtəşəm Qələbə ilə bağlı fikirlərini bölüşüblər. Ayşən Heydərova isə “Can, Xocalı!” şeirini səsləndirib.

Sonda BSU-nun Gənc Yaradıcılar Klubunun hazırladığı “Biz qayıtdıq, Xocalı!” adlı videoçarx təqdim edilib.