ELM VƏ TƏHSİL
Bakı Slavyan Universitetində Bolqarıstanın Avropa İttifaqı Şurasına sədrliyinə həsr olunan tədbir keçirilib
Bakı, 13 mart, AZƏRTAC
Martın 13-də Bakı Slavyan Universitetində (BSU) Bolqarıstan Respublikasının Avropa İttifaqı (Aİ) Şurasına sədr seçilməsi ilə bağlı beynəlxalq tədbir keçirilib.
AZƏRTAC xəbər verir ki, tədbirdə bir sıra dövlətlərin ölkəmizdəki səfirləri, eləcə də Avropa İttifaqı və Avropa Şurasının rəsmiləri iştirak ediblər.
Əvvəlcə qonaqlar BSU-nun foyesində “Arzu” rəqs ansamblının hazırladığı rəqslərdən, tələbələrin ifasında səsləndirilən şeir və mahnılardan ibarət geniş konsert proqramına tamaşa edib, həmçinin Yel çərşənbəsi və Novruz bayramına həsr olunmuş sərgiyə baxıblar. Sərgidə rəngarəng, milli nemətlərlə bəzədilmiş zəngin bayram xonçaları qonaqlara təqdim olunub. Novruzun personajları olan Kosa və Bahar qızı tədbirə xoş ovqat gətiriblər.
BSU-nun elmi işlər üzrə prorektoru, professor Rafiq Novruzov Azərbaycan-Bolqarıstan əlaqələrinin 25 illik tarixindən danışıb. O, ölkələrimiz arasında əlaqələrin Azərbaycan Prezidenti İlham Əliyev tərəfindən daha da inkişaf etdirildiyini, xalqlarımızın bir-birinə yaxınlaşması istiqamətində ardıcıl, ciddi addımların atıldığını diqqətə çatdırıb. R.Novruzov Azərbaycan Respublikasının Birinci vitse-prezidenti Mehriban Əliyevanın təşəbbüsü ilə Bolqarıstan Respublikasının müxtəlif şəhərlərində həyata keçirilən mədəni quruculuq işləri barədə məlumat verib. Professor BSU-nun ölkələrimiz arasında qurulan humanitar əlaqələrdə mühüm rolunu qeyd edib, universitetin Bolqarıstanın qabaqcıl ali təhsil müəssisələri ilə əməkdaşlığından söz açıb. Bolqarıstanın birinci vitse-prezidentləri İ.Yotova və M.Popovanın BSU-da olmalarından, universitetin nümayəndələrinin Bolqarıstana səfərindən danışan R.Novruzov bu ali təhsil müəssisəsinin bugünkü tədbirə ev sahibliyi etməsindən qürur hissi duyduğunu deyib. Prorektor, həmçinin Yel çərşənbəsi və Novruz bayramı münasibətilə tədbir iştirakçılarını təbrik edib, onlara bol ruzi-bərəkətli süfrə, sağlamlıq arzulayıb.
Bolqarıstanın Azərbaycandakı səfirliyinin müvəqqəti işlər vəkili Yanko Yanakiev ölkəsi ilə BSU arasındakı mövcud əməkdaşlıqdan danışıb. O, həmçinin Bolqarıstanın Aİ Şurasına sədrliyi dövründə qarşısına qoyduğu prioritetlər barədə məlumat verib. Diqqətə çatdırılıb ki, Bolqarıstan Aİ Şurasına sədrliyi dövründə “Biz birlikdə güclüyük” ifadəsini özünə şüar seçib. Avropanın bu gün daha çox sabitliyə ehtiyacı olduğunu vurğulayan Y.Yanakiev bildirib ki, birlik ümumi məqsədlərə çatmağın açarıdır və bu şüar Bolqarıstanın sədrliyi dövründə üzv dövlətlər arasında birliyi qoruyub saxlamağa çalışacağı mesajını verir. O deyib: “Bolqarıstan sədrliyi dövründə gənclərin üzləşdiyi problemlərin həlli, ətraf mühitin təhlükəsizliyi ilə bağlı işlər aparacaq. Sədrliyimiz dövründə diqqətimiz iqtisadi artım, sosial birlik və gənclərin inkişafı məsələsinə köklənəcək”.
Sonra Bolqarıstanın turizm potensialından bəhs edən videoçarx nümayiş olunub.
Aİ-nin ölkəmizdəki nümayəndəliyinin rəhbəri Kestutis Yankauskas vurğulayıb ki, Azərbaycanın Avropanın enerji ilə təmin edilməsində böyük rolu var. Bu, Avropa-Azərbaycan əlaqələrinin inkişafına yardım edir. O, Azərbaycan ilə imzalanacaq sazişlərin əlaqələrin inkişafına imkanlar yaradacağına ümidvar olduğunu bildirib. “Bu il Aİ-nin Azərbaycanda fəaliyyətə başlamasından 10 il ötür. Öz fəaliyyətimizlə xalqlarımız arasında mükəmməl əlaqələr qurmağa çalışırıq”, - deyə K.Yankauskas bildirib.
Diplomat qeyd edib ki, Aİ Şurasının sədri olan Bolqarıstanın müəyyənləşdirdiyi prioritetlər Azərbaycan üçün də böyük əhəmiyyət kəsb edir. Biz gələcəyə inamla addımlayırıq. Düşünürəm ki, Bolqarıstan bu altı ayda böyük işlər görəcək.
Kənd Təsərrüfatı Nazirliyinin elm və təhsil şöbəsinin müdiri Namiq Məmmədov və Milli Məclisin deputatı Rauf Əliyev Azərbaycan-Bolqarıstan əlaqələrindən danışıb, bu münasibətlərin gündən-günə inkişaf etdiyini diqqətə çatdırıblar. Natiqlər Bolqarıstanın Aİ Şurasına sədrliyi dövründə Ermənistan-Azərbaycan münaqişəsinin ədalətli həllini tapacağına ümidvar olduğunu bildiriblər.
Ölkələrimiz arasında kənd təsərrüfatı sahəsində əməkdaşlıqdan söz açan N.Məmmədov deyib ki, bu sahədə ticarət dövriyyəmiz 35 milyon dollar təşkil edir. Hazırda iki ölkə arasında əlaqələrin inkişafı, ticarət dövriyyəsinin artması ilə bağlı danışıqlar aparılır.
Tədbir çərçivəsində Bolqarıstan nümayəndələrinin BSU-da keçirdikləri görüşlərə dair videoçarx nümayiş olunub, Azərbaycan və Bolqarıstan mədəniyyəti ilə bağlı slayd göstərilib.