Bakı, 15 oktyabr, Elvin Camalov, Nihat Budaqov, AZƏRTAC

Oktyabrın 15-də Bakıda birinci Azərbaycan Dayanıqlı İnkişaf və Korporativ Sosial Məsuliyyət (Baku CSR Conference-2015) üzrə konfrans keçirilib.

AZƏRTAC xəbər verir ki, “Davamlı inkişaf. Konsepsiya, qlobal trendlər, standartlar” adlı plenar sessiyada çıxış edən Azərbaycan Respublikası Dövlət Neft Şirkətinin (SOCAR) iqtisadi məsələlər üzrə vitse-prezidenti Süleyman Qasımov bildirib ki, qloballaşan müasir cəmiyyətin qarşısında duran əsas hədəflərdən biri sosial-iqtisadi inkişafın yaxşılaşdırılması, ekoloji problemlərin həll olunması və gözlənilən böhranlarda qorunması məqsədilə davamlı inkişafın təmin edilməsidir.

S.Qasımov qeyd edib ki, bu konfrans Azərbaycanda iqtisadiyyatın səmərəliliyinin yüksəldilməsi, ətraf mühitin qorunması və sosial məsuliyyətin artırılması məsələlərinin əsas vəzifə olduğunu bir daha ifadə edir. Azərbaycan hökumətinin yoxsulluqla mübarizə, resursların əhali arasında bərabər və ədalətli bölüşdürülməsi, təbii resursların səmərəli istifadəsi, ümumilikdə davamlı sosial-iqtisadi inkişafın təmin edilməsi məqsədilə qarşıya qoyduğu və müvəffəqiyyətlə həyata keçirdiyi mühüm işlər ölkə iqtisadiyyatının hərtərəfli şaxələndirilmiş inkişafını nəzərdə tutur. Bu gün neft sektorundan əldə olunan gəlirlərin qeyri-neft sektorunun inkişafına yönəldilməsi hesabına ölkə iqtisadiyyatının bütün sahələrinin davamlı inkişafı başlıca hədəf kimi götürülür.

Plenar sessiyada “Kaleidoscope Futures|CSR International”ın qurucusu və direktoru Veyn Visserin “Davamlı sahələr: Biznes, liderlik və innovasiya sayəsində əsaslı dəyişikliklər” adlı məruzəsi dinlənilib.

Azərbaycan Respublikası Prezidentinin yanında Dövlət İdarəçilik Akademiyasının rektoru, akademik Urxan Ələkbərov isə “Davamlı inkişaf naminə səmərəli idarəetmə: Azərbaycan Respublikasının nailiyyətləri beynəlxalq təşkilatların hesabatlarında” mövzusunda məruzə ilə çıxış edib. Akademik qeyd edib ki, BMT və UNESCO 2005-2014-cü illəri davamlı insan inkişafı sahəsində tədris ili elan edib və xüsusi fənnin tədris olunmasını təklif etmişdilər. Azərbaycanda isə bu proses ulu öndər Heydər Əliyevin təsdiq etdiyi təhsil strategiyasına görə 2000-ci ildən başlayıb. 2003-cü ildə isə Azərbaycanın Təhsil Nazirliyi orta məktəblər üçün dünyada ilk dəfə davamlı insan inkişafına həsr olunan dərs vəsaitini dərc edib. Bu təşəbbüs BMT-nin baş qərargahında bütün dünyaya Azərbaycanın innovativ ideya və fəaliyyəti kimi tanıdılıb.

Konfrans paralel sessiyalarla davam edib. “Yaşıl iqtisadiyyat. Dayanıqlı infrastruktur. Davamlı inkişafda elmin və innovasiyaların rolu. Özəl və dövlət sektorlarının əməkdaşlığı” adlı paralel sessiyada çıxış edən “Təmiz Şəhər” idarə heyəti sədrinin müşaviri Oktay Məmmədov “Təmiz Şəhər ASC: təcrübəsi, həyata keçirilən ekoloji layihələr və onların davamlı inkişafa töhfəsi” mövzusunda çıxış edib.

Yaşıl iqtisadiyyat haqqında “İqtisadi və Sosial İnkişaf Mərkəzi”nin idarə heyətinin sədri Vüqar Bayramov çıxış edərək bildirib ki, hal-hazırda Azərbaycanda “yaşıl iqtisadiyyat” gündəmdə olan məsələdir. Lakin Azərbaycanın ənənəvi enerji ölkəsi olması bu məsələni əvvəllər gündəmdən kənar saxlayıb. Son illər alternativ enerji mənbələrindən istifadə etməklə bağlı sosial agentlik yarandıqdan sonra “yaşıl iqtisadiyyat”ın gündəmə gəldiyini bildirən V.Bayramov ətraf mühit üçün ziyanlı olmayan iqtisadiyyatın qurulmasının da əsas məsələlərdən birinə çevrildiyini söyləyib.

Azərbaycan Milli Elmlər Akademiyasının (AMEA) İqtisadiyyat İnstitutunun elmi işlər üzrə direktor müavini Allahyar Muradov “Davamlı inkişafda elmin və innovasiyaların rolu” mövzusunda çıxış edib. “Azərbaycanda qəbul olunan dövlət proqramlarının əksəriyyətində qeyri-neft sektorunun, elmin və yüksək texnologiyaların inkişafı, insan kapitalına investisiya və bir çox bu kimi məsələlər əhatə olunub. Bunlar isə Azərbaycanda inkişafın təməli kimi elm sahəsinin vacib hesab olunduğunu göstərir”,- deyə A.Muradov vurğulayıb.

Eyni zamanda davam edən “Ölkənin sağlam gələcəyinin aparıcı qüvvəsi olaraq effektiv gənclər siyasəti. Məsuliyyətli və savadlı gəncliyin formalaşmasında universitetin rolu. Korporativ sektorla uğurlu əməkdaşlıq. Strategiya, layihələr və çağırışlar” adlı sessiyada çıxış edən gənclər və idman nazirinin müavini İntiqam Babayev “Azərbaycanın dövlət gənclər siyasəti” barəsində məlumat verib.

Azərbaycan Respublikası Təhsil Nazirliyində “Sabah” qruplarının icra komitəsinin rəhbəri Elçin Ağakişiyev “peşəkar və rəqabət qabiliyyətli mütəxəssislərin hazırlanmasında sənaye sektoru ilə əməkdaşlıqla universitetlərin rolu” mövzusunda çıxış edib. “Davamlı inkişafın əsas zəmanəti ehtiyatlardan düzgün istifadə etməklə qaynaqlanır. Bütün dünyada 3 əsas ehtiyat var: təbii ehtiyat, insan ehtiyatı və maliyyə ehtiyatı. Ulu öndər Heydər Əliyevin təməlini qoyduğu və Azərbaycanın Prezidenti İlham Əliyevin davam etdirdiyi “qara qızıl kapitalını insan kapitalına çevirmək” siyasəti buna bariz nümunədir”,- deyə E.Ağakişiyev bildirib.

“ADA” universitetinin prorektoru Fariz İsmayılzadə isə “Təhsil sahəsində innovasiya əldə etmək üçün özəl sektor ilə ictimai sektor arasında əməkdaşlıq” mövzusunda çıxış edərək bildirib ki, təhsil sahəsində əldə olunan nailiyyətlər arasında universitetlərin maddi-texniki bazasının artırılması, genişləndirilməsi, müasir tədris komplekslərinin tikilməsi, peşəkar kadrların cəlb olunması, müəllimlərin keçirtdiyi vacib təlimlər və başqa işlər var.

Nailiyyətlərin daha da artırılması üçün özəl sektorlarla əməkdaşlığın vacibliyini qeyd edən Fariz İsmayılzadə 2008-ci ildə yaradılan “ADA fondu”nun məqsədinin də özəl sektorla iş birliyi qurmaq, özəl sektorların universitet fəaliyyətinə və şirkətlərin tədris proseslərinə cəlb edilməsi olduğunu söyləyib. Prorektor bildirib ki, özəl sektorlar vasitəsilə yığılan maddi vəsait hesabına isə imkansız tələbələrə təqaüd verilməsini, kitabxana bazasının genişləndirilməsi və professorların xarici seminarlara göndərilməsini həyata keçirmək asanlaşır.

“Kənd təsərrüfatının davamlı inkişafı üçün mövcud imkanlar və ölkə iqtisadiyyatında yeri. Ərzaq təhlükəsizliyi. Təhlükəsiz ərzaq. Dəyər zəncirlərinin inkişaf etdirilməsi” adlı sessiyada isə “Azərbaycanda kənd təsərrüfatı sahəsinin davamlı inkişafı: mövcud trendlər və çağırışlar”, “Sektorun rəqabət qabiliyyətinin gücləndirilməsinə yönəlmiş Dünya Bankının proqramı”, “Davamlı inkişaf və ərzaq təhlükəsizliyi üçün ilkin şərtlər”, “Sahibkarlığa Kömək Milli Fondu tərəfindən aqrar sahəyə ayrılmış kreditlər və maliyyələşdirilmiş investisiya layihələri” mövzusunda çıxışlar olub.

Konfrans “Biznes daha yaxşı cəmiyyət naminə” adlı müzakirə ilə davam edib.

Qeyd edək ki, konfrans çərçivəsində “Azercell”, “AccessBank”, “ASAN xidmət”, “EY”, “FAO”, SOCAR, AMEA, bir sıra gənclər və qeyri-hökumət təşkilatlarının (QHT) iştirakı ilə sərgi keçirilib.