İQTİSADİYYAT
Bakıda II “Bankçılıq Forumu” keçirilir YENİLƏNİB
Bakı, 23 noyabr, Elvin Camalov, AZƏRTAC
Noyabrın 23-də II “Bankçılıq Forumu” öz işinə başlayıb.
AZƏRTAC xəbər verir ki, iki gün davam edəcək forum Azərbaycan Banklar Assosiasiyasının (ABA) və İqtisadi İslahatlarının Təhlili və Kommunikasiya Mərkəzinin birgə təşkilatçılığı ilə "Bank sisteminin yeni inkişaf dövrünə adaptasiyası: İslahatlar, Nəticələr və Perspektivlər" mövzusunda keçirilir.
Forumun məqsədi ölkədə həyata keçirilən strateji iqtisadi islahatların nəticələrinin təhlili, maliyyə-bank sisteminin yeni inkişaf dövrünə adaptasiyası, maliyyə dayanıqlılığının möhkəmləndirilməsi, nağdsız ödənişlərin artırılması istiqamətləri, banklarda komplayensin inkişafı və bank sisteminin fəaliyyətinin hüquqi bazasının təkmilləşdirilməsi məsələlərinin müzakirəsi, həmçinin bankçılıq sahəsində yeniliklər və innovasiyalar barədə qabaqcıl təcrübələrin öyrənilməsidir.
Forumda maliyyə-iqtisadiyyat sahəsində tənzimləyici və nəzarət orqanlarının rəhbərləri, kommersiya banklarının yuxarı menecmenti, biznes və ictimai təşkilatların rəhbərləri, beynəlxalq maliyyə institutlarının və xarici ölkələrin Azərbaycandakı səfirliklərinin nümayəndələri, həmçinin digər ölkələrdən dəvətlilər iştirak edirlər.
Azərbaycan Banklar Assosiasiyasının prezidenti Zakir Nuriyev bildirib ki, yeni “mülayim-yumşaq” pul-kredit siyasətinə keçidə başlanılmalıdır. Yeni “mülayim-yumşaq” pul-kredit siyasətinə keçid ilə əlaqədar olaraq monetar və nəzarət orqanları məhdudlaşdırıcı siyasətdən stimullaşdırıcı pul-kredit siyasətinə keçməli, inflyasiyanın hədəflənməsi ilə yanaşı ÜDM artımına, uzunmüddətli kreditlərin aşağı faizli olmasına və manatın volatilliyinin aşağı salınmasına hədəflənməlidirlər. İnflyasiyanın artmasından ehtiyatlanmadan iqtisadiyyatın aşağı monetarizasiya şəraitindən, yavaş-yavaş pul təklifini artırmaqla geniş bazaya keçmək lazımdır.
Türkiyə Banklar Birliyinin İdarə Heyətinin sədri, “Ziraat Bank”ın baş direktoru Hüseyn Aydın Türkiyədə bank sektorunun hazırkı vəziyyəti, dünyada baş verən maliyyə böhranının dünya və Türkiyə banklarına təsirindən söz açıb, Türkiyədə fəaliyyət göstərən bankların təcrübələrini paylaşıb.
İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı bildirib ki, neft gəlirlərinin azalması fonunda “Doing Businnes” və Qlobal Rəqabətlilik hesabatlarında ölkəmizin irəliləməsi və ən islahatçı ölkələr sırasına yüksəlməsi, bu ilin on ayında qeyri-neft ÜDM-in 2,1 faiz və ixracının 23 faiz artması, strateji valyuta ehtiyatlarının 5 milyard dollara çatması birbaşa islahatların nəticəsidir. Hazırda neft qiymətlərinin 60 dolları keçməsinə rəğmən iqtisadi islahatlar davam edir ki, bu da iqtisadi islahatların dönməz xarakter aldığını göstərir.
Onun sözlərinə görə, gələn illərdə ölkədə qeyri-neft ixracının və başda turizm olmaqla xidmətlərin səviyyəsinin artması, idxalın əvəzlənməsi hesabına ölkəyə valyuta mədaxili kanalları çeşidinin və miqyasının artması manatın dayanıqlılığı üçün əlavə imkanlar yaradacaq. 2018-ci ildə dövlət büdcəsi hesabına iqtisadiyyata veriləcək əlavə stimullar ümumi iqtisadi aktivliyi artıracaq. Beləliklə, maliyyə-bank sektoru yaranmış əlverişli şəraitdən istifadə etməli, Kredit Zəmanət Fondu və aqrar sığorta mexanizmindən yararlanmaqla real iqtisadiyyatın maliyyələşdirilməsini gücləndirməlidir. Eyni zamanda, bank sektorunun kommunikasiyası gücləndirilməli, rəqabət mühiti və banklararası bazar inkişaf etdirilməli, blokçeyn və maliyyə texnologiyalarının tətbiqi imkanları araşdırılmalı, risk idarəetməsi gücləndirilməli və bankların kapitallaşdırılması artırılmalıdır.
Mərkəzi Bankın sədr müavini Alim Quliyev bildirib ki, milli iqtisadiyyatda yenidən balanslaşdırma proseslərini monetar siyasətlə aktiv dəstəkləmək üçün 2018-ci ildə də Mərkəzi Bank əsasən dayanıqlı artımın stimullaşdırılmasını və maliyyə sabitliyinin təmin olunması üçün ölkədə makroiqtisadi sabitliyin təmin olunmasını diqqətdə saxlayacaq.
“Gələn il üzrə proqnozlaşdırılan 6,1 faiz səviyyəlik inflyasiyaya nail olmaq üçün hökumətlə koordinasiya olunmuş şəkildə siyasət yürüdüləcək. Bütün alət və mexanizmlərdən istifadə edərək Mərkəzi Bank inflyasiyaya azaldıcı təsir göstərən monetar siyasət yaratmağa çalışacaq. Bu mənada monetar şərait məcmu tələbin inflyasiyanın artımını məhdudlaşdırmağa, həmçinin milli valyutada yığımları stimullaşdırmağa yönələcək”, - deyə A.Quliyev vurğulayıb.
Onun sözlərinə görə, ilin əvvəlindən etibarən valyuta hərraclarında iştirak edən bankların sayı beş dəfə artaraq 20 çatıb. Valyuta hərracları ölkənin Mərkəzi Bankı tərəfindən Azərbaycan Respublikası Dövlət Neft Fondunun (ARDNF) iştirakı ilə təşkil olunur. 2017-ci ilin 10 ayı ərzində ARDNF valyuta auksionlarında təxminən 2,8 milyard dollar satıb. Ümumilikdə 2016-cı ildən bu vaxta qədər Azərbaycan bankları Dövlət Neft Fondundan 4,92 milyard dollar alıb.
Maliyyə Bazarlarına Nəzarət Palatasının baş icraçı direktoru İbrahim Alışov 2018-ci ildən Azərbaycan bankların yeni Maliyyə Hesabatlarının Beynəlxalq Standartları çərçivəsində fəaliyyət göstərəcəyini söyləyib.
O qeyd edib ki, palata bu istiqamətdə banklarla sıx əməkdaşlıq edir. Artıq gələn ildən banklara öz maliyyə hesabatlarını bu standartlar çərçivəsində hazırlamaları tövsiyə ediləcək.
İqtisadiyyat nazirinin müavini Sevinc Həsənova bildirib ki, Azərbaycanda biznesin inkişafını daha da artırmaq üçün əlavə tədbirlər planı təsdiqlənib. Azərbaycan Ümumdünya İqtisadi Forumunun (World Economic Forum) 2017-2018-ci illər üzrə rəqabətqabiliyyətlilik reytinqində 35-ci yeri tutub və “Doing Bussines” hesabatında isə 8 pillə yüksəlib.
S.Həsənovanın sözlərinə görə, biznes mühitinin inkişafını artırmaq üçün təsdiqlənən tədbirlər planı Azərbaycanın beynəlxalq reytinqini daha da yüksəldəcək.
Forumda “Xarici şokların təsirinin minimallaşdırılması istiqamətində görülmüş işlər və yeni çağırışlar” mövzusunda 1-ci panel təşkil olunub. Paneldə “İqtisadi islahatların yaxın və orta perspektivli nəticələri”, “Bank sektorunun sağlamlaşdırılması istiqamətində əldə olunmuş nailiyyətlər və hədəflər”, “Monetar stimullaşdırma ilə makroiqtisadi stabillik arasında balans”, “Makroiqtisadi stabilliyin təmin olunmasında Dövlət Neft Fondunun rolu”, “Yeni dövrdə bank sektorunda insan resurslarının inkişafı məsələləri” mövzularında təqdimatlar keçirilib, geniş fikir mübadiləsi aparılıb.
Həmçinin forumda “Nağdsız cəmiyyətə doğru: ödəniş ekosistemində son trendlər, yeni bazar iştirakçıları və innovativ ödəniş həlləri”, “Müasir bankçılıqda komplayens” və “Bank sisteminin inkişafını hüquqi bazasının təkmilləşdirilməsi məsələləri”nə həsr edilmiş panellər də keçirilib.
“Bankçılıq Forumu” noyabrın 24-də öz işini davam etdirəcək.