MƏDƏNİYYƏT
Bakıda Naxçıvan Muxtar Respublikasının yaradılmasının 90 illik yubileyinə həsr olunmuş sərgi açılmışdır VİDEO
Bakı, 12 may (AZƏRTAC). Mayın 12-də Bakı Biznes Mərkəzində Mədəniyyət və Turizm Nazirliyinin təşkilatçılığı ilə Naxçıvan Muxtar Respublikasının (MR) yaradılmasının 90 illik yubileyinə həsr olunmuş sərgi açılmışdır.
AZƏRTAC xəbər verir ki, sərgi Prezident İlham Əliyevin “Naxçıvan Muxtar Respublikasının 90 illik yubileyinin keçirilməsi haqqında” 2014-cü il 14 yanvar tarixli Sərəncamına əsasən reallaşdırılmışdır.
Hökumət nümayəndələrinin, Mili Məclisin deputatlarının, tanınmış elm və mədəniyyət xadimlərinin iştirak etdikləri tədbiri giriş sözü ilə açan mədəniyyət və turizm nazirinin birinci müavini Vaqif Əliyev Naxçıvanın qədim dövlətçilik tarixindən, müasir inkişaf strategiyasından danışmış və bu yubiley tədbirlərinin keçirilməsini yüksək qiymətləndirmişdir.
Bildirilmişdir ki, Naxçıvana 90 il bundan əvvəl Azərbaycanın tərkibində muxtariyyət statusu verilmişdir. Bu, mühüm tarixi hadisə idi. Lakin Naxçıvanın muxtariyyəti asanlıqla qazanılmamışdır. Beynəlxalq Qars müqaviləsi 1921-ci ildə imzalansa da, Naxçıvana 3 il sonra, 1924-cü ildə muxtariyyət statusu verilmişdir. Naxçıvanın muxtariyyəti çətin sınaqlardan keçərək gərgin hərbi-siyasi və diplomatik mübarizələr nəticəsində əldə olunmuşdur.
Naxçıvana muxtariyyətin verilməsinin tarixi zərurət olduğunu söyləyən V.Əliyev demişdir ki, 1919-cu ildə Zəngəzur mahalı Ermənistana ilhaq ediləndən sonra Naxçıvan ölkənin əsas ərazisindən təcrid olunmuşdu. Regionda marağı olan böyük dövlətlər İrəvan və Zəngəzur kimi, Naxçıvanı da ermənilərə güzəştə getmək istəyirdilər. Belə bir gərgin məqamda erməni silahlıları yerli azərbaycanlı əhalini qorxu içərisində saxlayır, qırğın törədir, torpaqların boşaldılmasına çalışırdılar. Buna baxmayaraq, nə böyük dövlətlərin siyasi və diplomatik təzyiqi, nə aclıq, nə də ermənilərin aramsız hərbi müdaxiləsi naxçıvanlıların iradəsini sındıra, onların Azərbaycan ilə bir olmaq istəyinin qarşısını ala bilməmişdir.
Vaqif Əliyev demişdir: “Naxçıvanın bugünkü inkişaf səviyyəsinə çatması ulu öndər Heydər Əliyevin adı ilə sıx bağlıdır. Ona görə ki, Naxçıvan Azərbaycan xalqına dünya şöhrətli şəxsiyyət, ulu öndər Heydər Əliyevi bəxş etmişdir. Ulu Öndər hakimiyyətdə olduğu bütün dövrlərdə Naxçıvana böyük diqqət göstərmişdir”.
Ümummilli Liderin hakimiyyətə yenidən qayıdışı ilə Azərbaycanda, eləcə də Naxçıvanda həyata keçirilən mühüm layihələrdən söz açan V.Əliyev demişdir ki, bu gün Ulu Öndərin siyasi kursunu davam etdirən Prezident İlham Əliyev Azərbaycanı, onun ayrılmaz hissəsi olan Naxçıvan Muxtar Respublikasını da yaşadır və inkişaf etdirir.
Vurğulanmışdır ki, Azərbaycan Prezidentinin diqqət və qayğısı sayəsində Naxçıvan Muxtar Respublikasının inkişafının 2003-cü ildən sonrakı dövrü ümummilli liderimiz Heydər Əliyevin quruculuq xəttinin yaradıcı gücünün daha bir əyani ifadəsidir. Bu xəttin davam etdirilməsi blokada şəraitində yaşayan Naxçıvan MR-də dinamik inkişafı təmin etmişdir.
Naxçıvanın günbəgün gözəlləşməsindən, müasirləşməsindən geniş söz açan mədəniyyət və turizm nazirinin birinci müavini demişdir ki, artıq bu diyarda dövlət və hökumət başçılarının görüşləri təşkil olunur, mühüm konfranslar, forumlar keçirilir. Xüsusi olaraq diqqətə çatdırılmışdır ki, 2018-ci ildə Naxçıvan İslam Mədəniyyətinin Paytaxtı kimi böyük bir missiyanı yerinə yetirəcəkdir.
Tədbirdə Naxçıvan Muxtar Respublikasının Bakıdakı daimi nümayəndəliyinin rəhbəri Bəxtiyar Əsgərov çıxış edərək muxtar respublikada son illərdə aparılmış tikinti-quruculuq işlərindən, qazanılmış nailiyyətlərdən, elmi-mədəni, sosial-iqtisadi inkişafdan, MR-in müdafiə qüdrətindən geniş bəhs etmiş, sərginin təşkilinə görə Mədəniyyət və Turizm Nazirliyinin rəhbərliyinə minnətdarlığını bildirmişdir.
Vurğulanmışdır ki, Prezident İlham Əliyevin müvafiq Sərəncamı ilə qeyd olunan Naxçıvan MR-in 90 illik yubileyi ilə bağlı silsilə tədbirlər bu qədim diyarın tarixinin öyrənilməsi, müasir inkişafının təbliği baxımından olduqca əhəmiyyətlidir.
Sonra tədbir iştirakçıları sərgi ilə yaxından tanış olmuşlar.
Sərgidə Naxçıvan MR-in tarixini, görkəmli şəxsiyyətlərini, rəsmi dövlət tədbirlərini, maddi-mədəniyyət abidələrini, ədəbi mühitini, iqtisadi-sosial inkişafını əks etdirən tarixi sənədlər, fotoşəkillər nümayiş olunmuşdur.
Sərgi tədbir iştirakçıları tərəfindən maraqla qarşılanmışdır.