Bakı, 10 iyun (AZƏRTAC). İyunun 10-da Bakıdakı Katolik kilsəsi Roma Papası II İohann Pavelin ulu öndər Heydər Əliyevin dəvəti ilə 2002-ci il mayın 22-də Azərbaycana səfərinin 10-cu ildönümünü qeyd etmişdir.

AZƏRTAC xəbər verir ki, yubiley ilə əlaqədar Bakıdakı Müqəddəs Məryəm Ana kilsəsinin möminləri üçün Müqəddəs Messa ibadəti icra olunmuşdur. Messanı əlamətdar hadisə münasibətilə Vatikandan Bakıya gəlmiş kardinal Fernando Filoni yerinə yetirmişdir.

Messadan sonra bu yaxınlarda kilsənin həyətində tikilmiş Pastor Mərkəzinin açılış mərasimi olmuşdur.

Azərbaycandakı Katolik kilsəsinin baş keşişi Vladimir Fekete 2002-ci ildə II İohann Pavelin Azərbaycana səfərinin tarixi əhəmiyyətini qeyd edərək demişdir: “II İohann Pavelin tarixi səfəri nəinki Müqəddəs Taxt-Tacın 1992-ci ildə rəsmən tanıdığı bir ölkənin suverenliyinin təsdiq edilməsi olmuşdur, bu həm də müsəlman ölkəsində yaşayan azsaylı katolik icmasına böyük dəstək idi”. V.Fekete bildirmişdir ki, Roma Papası Bakıdakı çıxışlarında təkcə rəsmi dövlət doktrinası deyil, həm də ölkə əhalisinin hər gün nümayiş etdirdiyi gerçəklik olan tolerantlıq, dini dözümlülük siyasətini yüksək qiymətləndirmişdir. Baş keşiş vurğulamışdır ki, Prezident Heydər Əliyev Roma Papasının səfərindən sonra Azərbaycanın katolik icmasına torpaq sahəsi bağışlamışdır. 2008-ci ildə burada Müqəddəs Məryəm Ana kilsəsi inşa edilmişdir.

Müqəddəs Məryəm Ana kilsəsi layihəsinin müəllifi, arxitektor Paulo Ruceyro mərasimdə demişdir: “Həmin layihə bu ölkənin xalqına hədiyyə olaraq Allah-təala tərəfindən mənə əta edilmiş və məni ruhlandırmışdır”. Onun sözlərinə görə, həmin layihə 10 il ərzində ərsəyə gəlmişdir və onun hazırlanmasına Bakının özünəməxsus memarlığı böyük təsir göstərmişdir.

Dini Qurumlarla İş üzrə Dövlət Komitəsi sədrinin müavini Gündüz İsmayılov demişdir ki, bu əlamətdar hadisə təkcə Azərbaycan və Vatikan arasında münasibətlərin göstəricisi deyildir, həm də Azərbaycan xalqının tolerantlıq nümunəsidir. Azərbaycan dövləti ölkədə bütün dinlərin nümayəndələrinə bərabər münasibət bəsləyir və dini etiqad üçün bərabər şərait yaradır.

Kardinal Fernando Ffiloni demişdir: “Bu gün burada olmağımıza görə biz Allaha, bütün katoliklərə və Azərbaycan dövlətinə minnətdarıq ki, öz cəmiyyətinin, ailəsinin bir hissəsinə çevrilməyə imkan vermişdir”.

Kardinal Fernando Filoni Pastor Mərkəzini ziyarət etdikdən sonra kilsənin daxilində II İohann Pavelin Bakıya səfərinə həsr edilmiş memorial lövhənin açılışı olmuşdur.

Sonra tədbir iştirakçıları “Səfər-2002” sərgisi ilə tanış olmuşlar. Sərgidə II İohann Pavelin Azərbaycan Prezidenti Heydər Əliyev, mədəniyyət, incəsənət xadimləri, müxtəlif konfessiyaların nümayəndələri ilə görüşlərini əks etdirən fotoşəkillər yer almışdır. Qonaqlara Roma Papasının Azərbaycana səfərinin 10-cu ildönümü münasibətilə Katolik Kilsəsinin çap etdirdiyi kitab paylanmışdır. Kitaba II İohann Pavelin və Heydər Əliyevin Bakıdakı görüşləri zamanı çıxışları daxil edilmişdir.