Balakən, 2 aprel (AZƏRTAC). Mayın 2-də Balakən Aviasiya Mərkəzində ümummilli lider Heydər Əliyevin anadan olmasının 88-ci ildönümünə həsr olunmuş paraşütdən tullanma üzrə beynəlxalq turnirə start verilmişdir.

AZƏRTAC xəbər verir ki, Könüllü Hərbi Vətənpərvərlik Texniki İdman Cəmiyyəti (KHVTİC) Respublika Şurasının təşəbbüsü ilə ənənəvi olaraq artıq üçüncü ildir keçirilən turnirdə Azərbaycan paraşütçüləri ilə yanaşı, Rusiya, Belarus, Qazaxıstan və Tacikistandan gəlmiş 60-a yaxın idmançı da iştirak edir.

Beynəlxalq turnirin açılışından əvvəl MDB-nin Müdafiə və İdman-Texniki Təşkilatları İttifaqının – (KHVTİC-DOSAAF) sədri, general-polkovnik Sergey Mayev, KHVTİC Respublika Şurasının sədri, general-mayor Novruzəli Orucov və digər qonaqlar müstəqil Azərbaycan dövlətinin memarı və qurucusu, ümummilli lider Heydər Əliyevin Balakən şəhərinin mədəniyyət və istirahət parkında ucaldılmış abidəsi önünə gül-çiçək düzmüş, xatirəsini ehtiramla yad etmişlər.

Qonaqlar Aviasiya Mərkəzində yaradılmış şəraitlə tanış olmuşlar.

Azərbaycan Respublikasının Dövlət Himni səsləndirildikdən sonra general-polkovnik Sergey Mayev çıxış edərək Azərbaycanın böyük oğlu, ümummilli lider Heydər Əliyevin xatirəsinə həsr olunmuş belə bir mötəbər beynəlxalq turnirin açılışında iştirak etməyindən böyük məmnunluq duyduğunu diqqətə çatdırmışdır. Bildirmişdir ki, yarışlar DOSAAF ilə KHVTİC Respublika Şurası tərəfindən imzalanmış proqram çərçivəsində həyata keçirilir. Turnirdə ekstremal və çox cəsarətli idman növü hesab olunan paraşüt idmanının təmsilçiləri yarışacaqlar. Ümidvaram ki, beynəlxalq turnir bu idman növünün kütləviliyinin daha da artmasına, gənclərin ordu sıralarına hazırlanmasına, onların vətənpərvər ruhunda yetişmələrinə öz töhfəsini verəcəkdir.

Qonaq yarışların yüksək səviyyədə təşkilinə görə Balakən Rayon İcra Hakimiyyətinin rəhbərliyinə minnətdarlığını bildirmişdir.

Açılış mərasimində KHVTİC Respublika Şurasının sədri, general-mayor Novruzəli Orucov yeniyetmə və gənclərin hərbi vətənpərvərlik ruhunda tərbiyəsi işini daha da yaxşılaşdırmaq, onların hərbi xidmətə hazırlanması sahəsində cəmiyyət tərəfindən həyata keçirilən tədbirlər barədə məlumat vermişdir. Bildirmişdir ki, ümummilli lider Heydər Əliyevin xatirəsinə həsr olunmuş bu yarışlar artıq üçüncü ildir keçirilir. Bu illər ərzində Balakən Aviasiya Mərkəzində idmançı-paraşütçülərin hazırlanması sahəsində çox böyük işlər görülmüşdür. Bu da təsadüfi deyildir. Nə qədər ki, torpaqlarımız işğal altındadır, gənclərin ordu sıralarına hazırlığına xüsusi diqqət yetirilməlidir. Bugünkü idmançı-paraşütçü, sabahın desantçı-döyüşçüdür. Yetişdirdiyimiz bu gənclər gələcəkdə Milli Ordumuz üçün çox gərəkli kadrlar olacaqlar.

Mərasimdə Balakən rayon icra hakimiyyəti başçısının birinci müavini Azad Balayev çıxış edərək yarış iştirakçılarına uğurlar arzuladıqdan sonra yarışların baş hakimi, beynəlxalq dərəcəli hakim Aleksandr Loxanov turnirin yüksək səviyyədə təşkil olunduğunu diqqətə çatdırmış, yarışın qaydaları barədə məlumat vermişdir.

General-polkovnik Sergey Mayev Rusiya DOSAAF-ı adından Azərbaycanın qabaqcıl paraşüt təlimçilərinə Pokrışkin medalını təqdim etmişdir. Yarış iştirakçılarına KHVTİC Respublika Şurasının hədiyyələri verilmişdir.

Mərasim iştirakçıları çaparların, cəmiyyətin yeni təlim avtomobillərinin yürüşünü izləmiş, gənc idmançıların, özfəaliyyət kollektivlərinin çıxışlarına baxmışlar.

Sonra paraşütçülər öz məharətlərini göstərmişlər. Azərbaycan paraşütçüsü Rəsul Musayevin ulu öndərimizin portreti işlənmiş xalça ilə meydanın mərkəzinə enməsi tamaşaçılar tərəfindən alqışlarla qarşılanmışdır. Paraşütçü xalçanı MDB-nin Müdafiə və İdman-Texniki Təşkilatları İttifaqının sədri, general-polkovnik Sergey Mayevə təqdim etmişdir.

Mayın 3-də paraşütçülər müxtəlif hündürlüklərdən hədəfə dəqiq enmə üzrə yarışacaqlar.

######