REGİONLAR


Bərdə Regional Mədəniyyət İdarəsində KİV nümayəndələri ilə görüş keçirilib

Bərdə, 13 may, Tahir Ağaməmmədov, AZƏRTAC

Bərdə Regional Mədəniyyət İdarəsində kütləvi informasiya vasitələrinin (KİV) nümayəndələri ilə görüş keçirilib.

AZƏRTAC-ın bölgə müxbiri xəbər verir ki, görüşdə çıxış edən Regional İdarənin rəisi Vəsilə Möhsümova bildirib ki, dövrünün görkəmli ziyalısı Həsən bəy Zərdabinin 22 iyul 1875-ci ildən nəşr etdirdiyi “Əkinçi” qəzeti ilə əsası qoyulmuş Azərbaycan milli mətbuatı cəmiyyətin güzgüsü olub. Ötən 146 ildə Azərbaycan mətbuatı böyük, keşməkeşli yol keçərək bugünkü inkişaf səviyyəsinə çatıb.

Keçmiş Sovetlər İttifaqı dövründə də Azərbaycan mətbuatının öz milliliyini qoruyub saxladığını, Azərbaycan müstəqilliyini bərpa etdikdən sonra isə milli mətbuatımızın inkişafında yeni mərhələnin başladığını diqqətə çatdıran regional idarənin rəisi vurğulayıb ki, məhz bu dövrdə ulu öndər Heydər Əliyev tərəfindən milli mətbuatımıza dövlət qayğısının əsası qoyulub, senzura ləğv edilib, mətbuat haqqında qanunvericilik bazası yaradılıb, KİV-lərin maddi-texniki bazasının gücləndirilməsi istiqamətində əhəmiyyətli addımlar atılıb.

Vəsilə Möhsümova qeyd edib ki, ulu öndər Heydər Əliyevin əsasını qoyduğu bu siyasətin Azərbaycan Prezidenti İlham Əliyev tərəfindən uğurla davam etdirilməsi nəticəsində milli mətbuatımız yeni-yeni nailiyyətlər qazanır. Prezidentin müvafiq Sərəncamı ilə Azərbaycan Respublikası Medianın İnkişafı Agentliyinin yaradılması mətbuatımızın daha da inkişafına xidmət edəcək.

Regional idarənin rəisi Azərbaycan jurnalistlərinin 44 günlük Vətən müharibəsində də rolunu, həmçinin müharibə zamanı əlinə silah alıb döyüşlərdə iştirak edən xeyli sayda jurnalistlərimizin olduğunu xüsusi vurğulayaraq bildirib ki, xalqımız peşə borcunu yerinə yetirərkən Kəlbəcərdə minaya düşərək həlak olan şəhid jurnalistlər Məhərrəm İbrahimovla Sirac Abışovun əziz xatirəsini daim yad edəcək. Prezidentin şəhid jurnalistlərin ailələrini mənzillə təmin etməsi isə bir daha dövlətimizin şəhid ailələrinə qayğısının nümunəsidir.

Tədbirdə çıxış edən mətbuat nümayəndələri görüşün əhəmiyyətini qeyd edərək bildiriblər ki, belə görüşlər KİV nümayəndələri ilə regional idarənin əməkdaşlığını artıraraq onlar arasında əhəmiyyətli körpü rolunu oynayacaq. Onlar, həmçinin çıxışlarında Bərdə Regional Mədəniyyət İdarəsinin, onun fəaliyyətinin işıqlandırılması zamanı dövlət və milli maraqları daim diqqətdə saxlayaraq, bundan sonra da öz vəzifələrini layiqincə yerinə yetirəcəklərini qeyd ediblər.

Sonda KİV nümayəndələri ilə qarşılıqlı fikir mübadiləsi aparılıb, onların təklif və tövsiyələri dinlənilib, onlarla xatirə şəkli çəkdirilib.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.