MƏDƏNİYYƏT
Beynəlxalq Muzeylər Günü münasibətilə presstur təşkil olunub
Bakı, 18 may, AZƏRTAC
Mədəniyyət Nazirliyinin təşkilatçılığı ilə 18 may - Beynəlxalq Muzeylər Günü münasibətilə Qobustan Milli Tarix-Bədii Qoruğuna, Qara Qarayevin ev-muzeyinə və Milli İncəsənət Muzeyinə presstur təşkil olunub.
AZƏRTAC xəbər verir ki, səfər zamanı media iştirakçılarına hər 3 məkan barədə geniş məlumat verilib.
Mədəniyyət Nazirliyinin əməkdaşı Türkan Cəfərova bildirib ki, hər il mayın 18-i dünyanın 150-dən çox ölkəsində, eləcə də Azərbaycanda muzeylər günü kimi qeyd olunur. Bu günlə əlaqədar ölkəmizin bütün muzey və qoruqlarında “açıq qapı” günü elan olunub. Artıq mayın 19-dək bir sıra tədbirlərin keçirilməsi planlaşdırılır. Tədbirlərin təşkilində məqsəd insanların muzeylərə cəlb olunması və bu kimi məkanların tarixi-mədəni önəmini diqqətə çatdırmaqdır.
Qobustan Milli Tarix-Bədii Qoruğunu ziyarət edən ispaniyalı turist Antonio Qarsiya bildirib ki, muzeylərlə tanış olmaq insanların biliklərinin artmasına kömək edir. Bu, eyni zamanda, çox əyləncəli bir işdir. Turist Qobustan qayaüstü rəsmlərini İspaniyadakı Altamira qaya rəsmləri ilə müqayisə edərək, hər iki regionun qədim olduğunu vurğulayıb.
Səfər zamanı Qobustan qoruğu barədə jurnalistlərə geniş məlumat verilib.
Presstur iştirakçılarının növbəti dayanacağı Qara Qarayevin ev-muzeyi olub.
Bildirilib ki, Qara Qarayevin ev muzeyi 2018-ci il oktyabrın 1-dən fəaliyyət göstərməyə başlayıb. Muzeydə 3 minə yaxın eksponat nümayiş olunur. Onların sırasında görkəmli bəstəkarın əlyazmaları, şəkilləri, ona hədiyyə olunan kitablar və digər əşyalar vardır.
Milli İncəsənət Muzeyində davam edən turda bildirib ki, muzey respublikanın ən qocaman mədəniyyət ocaqlarındandır. Muzeyin kolleksiyasının yaranması ötən əsrin 20-ci illərinə təsadüf edir. Bu muzeyə o vaxtlar yerli neft milyonçularının müsadirə olunmuş sənət əsərləri daxil idi. Muzey 1936-cı ildən müstəqil bir muzeyə çevrilib, 2010-cu ildən isə milli status alıb. Bildirilib ki, bina alman memarı tərəfindən tikilib. Muzeyin kolleksiyasına 18 mindən çox eksponat daxil olsa da, onlardan yalnız 3 mini nümayiş olunur, qalanları isə fondda qorunub saxlanılır.
Media nümayəndələri pressturdan zəngin təəssüratla ayrılıblar.