REGİONLAR


Beynəlxalq Şahmat Festivalının iştirakçıları yarışın yüksək səviyyədə təşkil olunduğunu vurğulayırlar

Naxçıvan, 8 may, AZƏRTAC

Ulu öndər Heydər Əliyevin anadan olmasının 96-cı ildönümünə həsr edilən “Naxçıvan-2019” Beynəlxalq Şahmat Festivalında artıq 6 tur geridə qalıb.

Festivalda iştirak edən yüksək reytinqli şahmatçılar AZƏRTAC-ın Naxçıvan bürosunun əməkdaşları ilə söhbətlərində tədbirin yüksək səviyyədə təşkil edildiyini vurğulayıblar. Hindistanlı FIDE ustası Mithil Ayqaonkar deyib: “Naxçıvanda keçirilən turnirə Hindistanın Mumbay şəhərindən qatılıram. Turnir çox yüksək səviyyədə təşkil olunub. Mənimlə yanaşı, daha üç hindistanlı şahmatçı beynəlxalq festivalda iştirak edir. Əsas hədəfim reytinq xalımı artırmaq və mükafatçılar sırasında yer almaqdır. Altı turdan sonra 1,5 xal toplamışam. Qarşıda hələ 3 oyunum var və maksimum nəticə qazanmağa çalışacağam. Şəhərinizin gözəl və təmiz olması isə bizi heyrətləndirdi. Bizə göstərdiyi dəstəyə, köməyə görə təşkilatçılara minnətdaram”.

Türkiyəli FIDE ustası Esat Bağlan qeyd edib ki, Naxçıvanda keçirilən festival Azərbaycanın ən böyük iki turnirindən biridir. Dünyanın bir çox zəka sahibləri burada mübarizə aparırlar. O deyib: “Artıq 6 tur geridə qalıb və aktivimdə 2,5 xal var. Hələ turnirin başa çatmasına 3 tur qalır və daha çox xal qazanacağıma inanıram. Bəzi görüşlər oldu ki, qələbə qazana bilərdim, lakin kiçik səhvlər etdim və nəticəsi ağır oldu. Naxçıvana gəlincə, bura çox sakit və təmiz şəhərdir. İnsanların bizə münasibəti isə tam fərqlidir. Düşünürəm ki, bu, bizim bir millət, iki dövlət olmağımızdan irəli gəlir”.

İran İslam Respublikasını təmsil edən şahmatçı Qulami Mehdi Orimi bildirib ki, Naxçıvanda keçirilən beynəlxalq turnirdə ilk dəfə iştirak edirəm. Digər yarışlarda iranlı şahmatçılar mübarizə aparıblar və bu barədə onlardan məlumat almışam. Təşkilatçılıq səviyyəsindən də razılığını bildirən iranlı şahmatçı deyib: “Bura mənə çox doğma gəldi. İnsanların bizə qarşı rəftarı, münasibəti, qonaqpərvərliyi sevindiricidir. Hələ şəhərin gözəlliyi bir başqadır, axşamlar sakit və təmiz şəhərdə gəzmək çox xoşdur. Boş vaxtlarımda atamla şəhəri gəzirik. Ötən günlərdə universitetlərdə olduq, tələbələrlə söhbət etdik. Oraya getməyimizin səbəbi isə təhsillə maraqlanmağımızdır. Çünki mənim bacım hazırda İranda tibb üzrə təhsil alır və atam istəyir ki, rezidentura təhsilini burada alsın”.

Azərbaycanlı qrossmeyster Xəyalə Abdulla isə vurğulayıb ki, “Naxçıvan-2019” Azərbaycanda keçirilən ənənəvi iki turnirdən biridir. Bu festival öz gücünü qoruyub saxlayır və ildən-ilə daha da güclənir. O, müşahidələrini də bölüşərək deyib: “Mən ilk dəfə festivalda iştirak edərkən o vaxtlar cəmi iki naxçıvanlı şahmatçı mübarizə aparırdı. İndi isə artıq burada naxçıvanlı qrossmeyster, beynəlxalq usta, FIDE ustası var. Eyni zamanda, festival çərçivəsində blits-turnirin keçirilməsi biz şahmatçılar üçün xoş oldu, çünki istirahət etdik. Turnirin hələ yarısında olmasına baxmayaraq, artıq şahmatçılarda yorğunluq var, bu da festivalın nə qədər gərgin mübarizə şəraitində keçdiyinin göstəricisidir. Lakin Naxçıvanın öz sakitliyi, təbiəti bizə imkan verir ki, bu yorğunluğu üzərimizdən ataq. Gərgin keçən turnirdə kimin qalib gələcəyini indidən demək çətindir. Qoy, layiq olan qələbə qazansın”.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.