Bakı, 30 mart, AZƏRTAC

Bakıda “İslam həmrəyliyi, mədəni müxtəliflik və milli identiklik” mövzusunda keçirilən beynəlxalq elmi konfransın iştirakçıları Azərbaycan Respublikasının Prezidenti yanında Bilik Fondunda olublar.

Bilik Fondundan AZƏRTAC-a bildiriblər ki, bu qurumun icraçı direktoru Oqtay Səmədov qonaqlara fondun strukturu, fəaliyyəti, maarifçilik istiqamətində həyata keçirdiyi layihələr barədə məlumat verib. Azərbaycanın dünyaya bir sıra modellər təqdim etdiyini diqqətə çatdıran O.Səmədov ölkəmizdəki tolerant mühit, multikultural ovqat, dilindən, dinindən, mədəniyyət fərqindən asılı olmayaraq, bütün insanların firavan birgəyaşayış ənənələri barədə danışıb. Hazırda 21 layihə üzrə fəaliyyət göstərən fondun beynəlxalq əlaqələrindən söhbət açan O.Səmədov “Azərbaycan elmi dünyada”, “Dünya elmi Azərbaycanda” layihələrinin uğurlarını, həmçinin 60-dan çox xarici mütəxəssisin mühazirələrə, “dəyirmi masa” və seminarlara cəlb olunduğunu xüsusi vurğulayıb. İcraçı direktor deyib ki, əlaqələrin genişlənməsi Azərbaycan təhsil müəssisələrində Sofia-Antipolis Universitetinin alim və tədqiqatçılarının mühazirələrinin təşkilinə və təcrübə mübadiləsinə zəmin yaradacaq.

Sofia-Antipolis Universitetinin hüquq və siyasi elmlər fakültəsinin dekanı, professor Kristian Vallar bildirib ki, Bilik Fondu ilə təmsil etdiyi ali təhsil ocağı arasında əlaqələrin qurulması hər iki tərəf üçün müsbət nəticələr verəcək. Azərbaycan və Fransa arasında əməkdaşlığın inkişafında hər iki ölkənin elmi dairələrinin rolu böyükdür.

Azərbaycana əvvəllər də səfər etdiyini xatırladan universitetin hüquq və siyasi elmlər fakültəsi dekanının müavini, professor Ksavye Latour Bakının daha da gözəlləşdiyini vurğulayıb. Azərbaycanda yaşayan bütün xalqlara eyni münasibətin göstərildiyini, tolerantlığın şahidi olduğunu deyən professor dövlətin bu istiqamətdə yürütdüyü siyasətinin maraq doğurduğunu söyləyib.

“Qardaşlaşmış məktəblər” layihəsi haqqında məlumat verən Bilik Fondunun aparat rəhbəri, professor İsaxan Vəliyev xarici ölkələrin orta təhsil müəssisələrinin də artıq bu təşəbbüsə cəlb olunduğunu qeyd edib. O, Fransa məktəblilərinin Azərbaycanın şagirdləri ilə qardaşlaşmasını hər iki ölkənin gənc nəslinin dünyagörüşünün inkişafında mühüm rol oynayacağına əminliyini vurğulayıb. İ.Vəliyev birgə fəaliyyət istiqamətlərinin dəqiqləşdirilməsi, əməkdaşlığın genişləndirilməsi üçün Sofia-Antipolis Universiteti ilə Bilik Fondu arasında niyyət protokolunun imzalanmasını təklif edib.

Görüşdə əməkdaşlığın perspektivləri barəsində geniş müzakirələrdən sonra nümayəndə heyəti fondun əməkdaşlarının müşayiəti ilə dağ yəhudiləri sinaqoqu, Rus Pravoslav Kilsəsi, Heydər Məscidi ilə tanış olublar.

Sonra qonaqlar Bakı Beynəlxalq Multikulturalizm Mərkəzində alimlərlə görüşüblər.

Görüşdə Azərbaycan Respublikasının millətlərarası, multikulturalizm və dini məsələlər üzrə Dövlət müşavirliyi xidmətinin baş məsləhətçisi, professor Etibar Nəcəfov konfrans iştirakçılarına ölkəmizdə yaşayan xalqlar haqqında məlumat verib, “İslam Həmrəyliyi İli” çərçivəsində görüləcək işlərdən danışıb.

Martın 31-də qonaqlar Quba və Şamaxıya səfər edəcəklər.

Qeyd edək ki, “İslam həmrəyliyi, mədəni müxtəliflik və milli identiklik” mövzusunda beynəlxalq elmi konfrans Bilik Fondunun, Azərbaycan Milli Elmlər Akademiyası Fəlsəfə İnstitutunun və Fransanın Sofia-Antipolis Universitetinin hüquq və siyasi elmlər fakültəsinin birgə təşkilatçılığı ilə keçirilib.