Binəqədi rayonunda 12 evdən oğurluq edən şəxslər saxlanılıb VİDEO

Bakı, 7 fevral, AZƏRTAC

Binəqədi rayonu ərazisində fərdi yaşayış evlərindən oğurluqlar edən şəxslər rayon polis idarəsinin 4-cü polis şöbəsi əməkdaşlarının həyata keçirdikləri əməliyyat-axtarış tədbiri nəticəsində saxlanılıblar. Əməliyyat zamanı əvvəllər məhkum olunmuş paytaxt sakini Mirsaleh Məmmədov və Şəmkir rayon sakini Samir Abbasov tutulublar.

Daxili İşlər Nazirliyinin mətbuat xidmətindən AZƏRTAC-a bildiriblər ki, araşdırma zamanı onların Binəqədi, Biləcəri qəsəbələrində 12 evdən pul, qızıl-zinət və məişət əşyaları oğurladıqları üzə çıxıb. Müəyyən edilib ki, oğurluq üçün evlərə əsasən M.Məmmədov daxil olub. Daha sonra o, oğurladığı əşyaları S.Abbasovla birlikdə satıb. Onların digər rayonların ərazilərində də evlərdən oğurluqlar etdikləri məlum olub.

Faktla bağlı araşdırmalar davam etdirilir.